Danieli7
Uénedü hawaguti gádürü mónsturu
1Luagu aban áriebu, lidan furumiñeti lirumudiri larúeihan Bélisasarü Babilónia, aba gewenedü lan Danieli. Dan le lagagudunbei, aba labürühani katei burí le súdinitimabei lidan luénedü. Anihán katei le burí labürühabei:2«Aba narihin lidan nuénedü láfuhan garabali luéigiñe gádürügubei oubaü, aba lánhinhani barana.3Sódini aba háfuridun gádürü mónsturugu wéinamutiña baranahagiñe, ámuñegueinarügütiña hesetirun hawariuagua.4Le furumiñeti, lenege liñún, gama lumoun garünati kei ágila. Sun anaha lan aríaguei, aba lahulún larüna, aba liñurawagun múarugugiñe, aba hararamagüdüni lau bián lugudi le lanagangiñebei, aba hararamagüdüni kei aban wügüri. Aba lichugúniwa aban sesu lun kei hasesun gürigia.5Le habiaman, lenege aban osu, íñuti aban louba luéi le aban, ñeinñein ǘrüwa uruhurei liyumulugu; aba naganbun lariñawagún lun: “Houbei sun wiñaadu le biyaraati!”6Le háürüwan, lenege aban leoparüdu, gama lumoun ñeinñein gádürü arünaü lanagawagu; aba giñe narihin luagu gádürüñein lan lábulugu, aba lederegerun ubafu lun.7Le hagadürün mónsturu le narihubei lidan nuénedü, hanarimeti, hanufunati, lau aban lanarime erei. Gürabu lari, ani wéinamuti; sun le ligibugiñebei günringua lumuti lau lari, le ígiraguti, aba ladügüraguni. Ámuti mónsturu ligía hawéi sun ha narihubaña lidan nuénedü, díisiñein liganchun.8Sun anaha lan aríaguei liganchun, aba narihin lachülaagun ábanya ganchu ñǘraütimati labadinaguagiñe líbiri ganchu, ábati lahulún ǘrüwa ganchu luéi, lun gabara lan le lagumuhóun le achülaagubei, le gágubei libe hagu gürigia, gayuma ligía aba iyumaü le adimurehabei lau saragu pantaü.Laguseragüdün Bungiu
9Aba nasigirun aríagua, darí ladagaragüdüniwa fiu lala urúei, aba lañuurun aban Weiriei Mutu, harutu ladaüragun kei mouru anhein lídiburi ítara liña kei liyu mudún le harumati. Watu gemeti haláü ligía lau sun lubalaba,10ñeinñein aban watu gemeti éibaaguti kei duna ligibugiñe. Ñéinñanu milu milu eseriwidei le ñurulubei luagu lala, hama míñunu míñunu rara ligibugiñe. Aba lagumeserun aguseruni, aba tadaarúniwa líburu».11«Auti, naríaguña, aganbahei luéirigun burí katei le lariñagubei liraüraü ganchu, Sun anaha lan aríagua aba háfaruni mónsturu, aba lañügürihóun, lárigiñe aba lagurún wáturugun lun lágudun.12Aba giñe lagidarún habafu híbiri mónsturugu hawéi, gama lumoun igirúatiña lun hasigirun abagarida darime lachülürün hóurate.13Aba nasigirunmeme gewenedü áriebu ligía:«Sódini aba narihin liabin aban kamá liráü wügüri lidan dúeri, aba lidin le ñeinhin lubéi Weiriei Mutu, aba lanügǘn yarafa lun.14Aba líchugun ubafu luma uéiriguni luma arúeihani lun, aba heseriwidun sun néchanigu lun. Masansiragunbei lubafu, magünrinchawagunbei giñe larúeihan».
Lanichigu uénedü
15Au Danieli, aba nasandirun lárügüdünina anufudei, ani nidiheri nuguya luagu sun le narihubei,16aba nayarafadun lun aban hádangiñe ha rárabaña ñein, aba namuriahan luma lun lafuranguagüdüni sun katei le nun. Aba lánharun, lariñaga nun:17“Añahán gádürü mónsturugu ha, hagía gádürü urúeigu ha lúnbaña hagumadiruni ubóu.18Gama lumoun lárigiñeme, ábame lederegerúniwa arúeihani houn lumutuniña Bungiu Suntigabafu, ábame hani lan lun sun dan”.19Busentina yebe nasubudiruni luáguti hagadürün mónsturu le ámubei hawéi ha híbiri, ladüga hanarimeti, gürabu lari, buronse lúbara, günringua lumuti sun katei lau lari aba ladügüraguni le ígiraguti.20Busentina yebe giñe nasubudiruni luáguti diisi liganchun, luma luáguti liraüraü ganchu le gágubei, gayuma ligía le adimurehabei lau saragu pantaü, darí lun kamá lan hamuga wéiriti luéi le líbiri ganchu, ábürüha ligía ǘrüwa ganchu le wéinamubei luéi lun líchugun ubaraü lun,21ábati narihin lageindagun ganchu ligía hama lumutuniña Wabungiute, aba lagañeiruniña,22darí liabin Weiriei Mutu ligía aba líchuguni haricha lumutuniña Bungiu Suntigabafu houn, ladüga gúnfulihali dan lun hárügüdüni lumutuniña Wabungiute arúeihani.23Aba lariñagun:“Le ligadürün mónsturu, ábanbei ligadürün arúeihani ubouagu, ámubei luéi le líbiri. Lágüragubei sun ubóu, dügügualéime günringua.24Diisi ganchu le barihubei, hagía diisi urúeigu ha lúnbaña harúeihan lidan arúeihani ligía. Hárigiñeme, ábame lawarirun ábanya luagun ubafu, ámubei hawéi ha furumiñebaña, ábame lábürügüdün ǘrüwa hádangiñe urúeigu ha.25Lanabubei urúei ligía Bungiu Suntigabafu, ábame lagumuchaguagüdüniña lumutuniña Wabungiute; láluguba lasansiruni lilurudun Wabungiute luma burí luéyuri lufedun Bungiu, herederuba lumutuniña Wabungiute lábugiñe lubafu luagu ǘrüwa irumu dimí.26Gama lumoun lañuuruba aguseragüdüti, ábame lagidarún ubafu luéi ábame lagünrinchawagun sunsuinagubei.27Ábame líchugun arúeihani, ubafu luma uéiriguni houn lumutuniña Bungiu Suntigabafu Laduraruba harúeihan lun súnwandan, ábame heseriwidun lílana sun ubóu houn, adüga hameime le habeibei”.28«Anihán lébehabei nabahüdahan. Au Danieli, aba nadiheridun saragu, aba lasansiragun nigibu; gama lumoun mariñagun numuti katei le ni ka un».
Bible Society of Honduras