Danieli6
Danieli lidan huyu le ñein habéi liñún
1Aba líchugun Daríu san-wein gumadimatiña lun hetenirun lun ámuñegueinarügü fulasu le lábugiñebei larúeihan.2Aba líchugun ǘrüwa hábuti gumadimatiña, lun haríaahani hawadigimari san-wein gumadimatiña, meferidirun láamuga urúei lidan ni kata. Danieli aban hádangiñe ǘrüwa hábutigu gumadimatiña hagía,3furese aba lerederun hóugiñe súngubei ladüga lueirin lubafu; ligía laritagunbei urúei lun líchuguni lun ligía lan ariha lau gumadi fulasurugu.4Ábati hálugun hábuti gumadimatiña hama gumadimatiña hadarirun lébuna híchugun lidurun Danieli, lun hariñagun luagu mabuidun lan labuguruni arúeihani, gama lumoun kei aban lan wügüri harumati Danieli, madaritiña mégeiti lidan luadigimari; siñatiti híchugun lidurun.5Lau sun lira saminamémetiña luagun katei le, aba hariñagun:—Madaribadiwa lébuna wíchugun lidurun Danieli luéidigia lidan katei le luáguti ligaburi lafiñen luagu Lubungiute.6Aba lubeiti hebelurun lidoun úarani lun houdin adimureha luma urúei Daríu, danti le hachülürün lumoun, aba hariñagun:
—Gabagari humá urúei lun sun dan!7Óundaraguaaña sun lúrudugu ha abugurubalin fulasu, aba lúaradun haritagun lun láfuridun aban lúrudu lun ua lan ni aban ayumuraguti lun ni aban bungiu, ni lun ni aban wügüri luéidigia lun urúei luagu darandi weyu. Le adüraaguti, ábame lagurún lidoun huyu le ñein habéi liñún.8Gufirümabéi lubeiti lúrudu, ábame baseiniruni luéi lasansirawagún; úaragua luma halurudun Médiana hama Pérüsiana le siñabei lagünrinchawagun.9Aba laseiniruni urúei Daríu lúrudu.10Danti le lasubudirunbalin Danieli luagu séiniwaali lan lúrudu, aba lidin lúbiñoun, aba ladaaraguni lufunederan lisounburun le luágunbei Herusalén, aba láhuduragun lun lafurieidun lun Lubungiute. Ǘrüwa wéiyaasu luagu weyu ladügüni kéiñaha ladügüni súnwandan.11Ábati hebelurun wügüriña hagía úara lúbiñoun Danieli, aba hadariruni afurieida luma eremuha lun Bungiu.12Aba houdin adimureha luma urúei luagu lúrudu, hariñaga lun:
—Uruei, sagaadün aban lúrudu le ñein lubéi lariñaga luagu sun lan le ayumuraguti lun furumiñeguarügü bungiu o furumiñeguarügü wügüri bóugudin huéi, luagu lagurúba lan lidoun huyu le ñein habéi liñún, ma ítara liña?
Lariñaga urúei,
—Anha, ítara liña. Ani gasu lagunfulirún lúrudu úaragua luma halurudun Médiana hama Pérüsiana le siñabei lagünrinchawagun.13Ábati hasigirun ariñaga:
—Danieli, aban hádangiñe huríu ha asagarúbaña hageiragiñe, míchuti ni murusun inebesei lun urúei ni lun lúrudu le asagarúbei, ladüga ariha wamaali adügei lafurieidun ǘrüwa wéiyaasu luagu weyu.14Dan laganbunbalin urúei katei le, aba lírudagun saragu, aba láluahan ida luba lan lesefuruni Danieli. Houcha lumuti yebe sun liyaraati lun lesefuruni chülǘ lumoun lálüdün weyu,15gama lumoun ábaya hayabin wügüriña hagía lumoun urúei, hariñaga lun:
—Subudi humuti, urúei, buidu buidu, luagu según lan halurudun Médiana hama Pérüsiana, ua lan lúrudu laseinirun urúei lun gayara lan lagünrinchawagun.16Ábati lariñagun urúei lun lanügǘn Danieli lun lagurún lidoun huyu le ñein habéi liñún. Gama lumoun lubaragiñebei lagunfulirun siadi, aba lariñagun urúei lun Danieli:
—Sefulábu Bubungiute le unbei beseriwida lau saragu úarani!17Dan le lídanhali huyu Danieli, aba hanügün aban dübü aba híchuguni luagu liyuma huyu, aba laseiniruni urúei lau lubagün, luma lau habagün ha íñugubaña lidan larúeihan, lun giñe lagunfulirun le lariñagubei lúrudu lau deregüdaü lidan likesin Danieli.18Lárigiñe, aba lidin urúei tidoun lani palasiu, aba larounrun méiginga, madügün ligía ni kata lídangiñe katei le ladügañahabei; siñati giñe larumugun sun áriebu ligía.19Kei larugadun, aba lásaarun, aba lidin furesegueina le ñein lubéi huyu le ñein habéi liñún.20Dan layarafadunbei urúei, aba lagúarun lun Danieli lau umalali híruti, lariñaga:
—Danieli, lubúein Bungiu le wínwanbei, sefu lumutibu san Bubungiute le unbei beseriwida lau saragu úarani hawéi liñún?21Aba lóunabun Danieli, lariñaga:
—Gabagari humá urúei lun súnwandan!22Óunaha lumuti Nubungiute lani ánheli, aba ladouruni hayuma liñún lun madügün hamá ni murusun damichi nun, ladüga subudi lumuti Nubungiute luagu madurun nan, madügün au ni kata wuribati hun, urúei.23Ábati lagundaarun urúei saragu, aba lariñagun lun lasagarún Danieli lídangiñe huyu le ñein habéi liñún. Dan le hasagarunbalin, madaritiña ni murusun biti luagu ladüga lemenigidun luagu Lubungiute.24Lárigiñe, aba lariñagun urúei lun hanügǘn ha buga íchugubaña lidurun Danieli, aba hagurún lidoun huyu le ñein habéi liñún, hau sun hámarigu hama hasaanigu; lubaragiñebei hadagarun, chubaaña liñún hawagun, aba hañaünrüdaguniña.25Ábati labürühan urúei Daríu houn sun gürigia lidan sun fulasu lariñaga:
«Ayumahatina darangilaü luma awanseruni hun,26ru numuti giñe nererun lun inebewa lan Lubungiute Danieli lidan sun fulasu le lábugiñebei narúeihan».
«Ladüga ligía Bungiu le wínwanbei ani anihein súnwandan. Magünrinchawagunbei larúeihan, magumuchun ligíame lubafu.27Ligía asalbahabei ligía esefuhabei, ligía adügübei seini hanarimeburiti sielu luma ubouagu. Ligía esefurubalin Danieli hawéi liñún».28Aba lasigirun Danieli kei ábanmeme gürigia wéiriguti lidan gumadi lidan larúeihan Daríu luma lidan larúeihan Siru, le urúei Pérüsiana.
Bible Society of Honduras