Amosu1
1Anihán uganu le libihubei Amosu, le hóuniri mudún Tekóa, lúmagiñe Wabungiute libügürü Ísüraeli, bián irumu lubaragiñe hárabaganali, lidan lidaani Usíasi le lurúeite Hudá, luma Heroboamü, le liráü Hoasi, lurúeite Ísüraeli.2Dan le laganbagüdüni Wabureme lumalali, le ítarabei kei wayuhuru luéigiñe wübü Sión, uburugu Herusalén, saüti sagadi, mabei ligía luwübüri Karümélu.
Lasiadiruni Bungiu ageiraü le yarafabei lun Ísüraeli
3Lariñahare Bungiu: «Gasu nabeichuniña Damasükuna ladüga adügaaña saragu wuribani; ladüga hamuligiduniña lílana Galaadü lau amuligülei lauti gürabu.4Ligía náguduboun lubéi lúbaana larúeihan Asaeli, ani láguduboun watu ligía lani burí Ben-adadü palasiu.5Nadaarubei burí lubenari Damasüku lau erei; nagünrinchagubei le arúeihabei Bikatü-awén luma le agumadihabei Betü-edén, hanaawaguba Síriana adaürawagúa uburugu Kirü». Aburemei ariñagubalin.Filistéa
6Lariñahare Aburemei: «Gasu nabeichuniña Gásana ladüga adügaaña saragu wuribani, barǘ hamutiña lílana aban fulasu dayarüti kei adaürǘtiña aba haluguruniña keisi idamuni uburugu Edomu.7Ligía nágudubei lubéi burí lubarieirun Gasa, ani láguduboun watu ligía lani burí palasiu.8Nagünrinchagubei le arúeihabei Asüdódu luma le agumadihabei Asükalón. Nábürühaba luagun Ekürón lau nubafu, dagá lumoun lagumuhóun Filistéana lóunweba!» Aburemei ariñagubalin.Tiru
9Lariñahare Bungiu: «Gasu nabeichuniña Tíruna ladüga adügaaña saragu wuribani; ani derege hamutiña lílana aban fulasu dayarüti ha úmabaña adügaaña lan aban daradu keisi íbirigu labun lubafu Edomu.10Ligía nágudubei lubéi burí lubarieirun Tiru, ábame lágudunu watu ligía lani burí palasiu».Edomu
11Lariñahare Bungiu: «Gasu nabeichuniña Edomuna ladüga adügaaña saragu wuribani, ladüga héibaahaniña Ísüraelina tau hefeinte háhaburugu lun háfaraguniña hilagubei ígiraguagüdatiña houngua lun hagañi, meredehati hayereehabu.12Ligía nágudubei lubéi Temán, ábame lágudunu watu ligía lani burí Bosurá palasiu».Amón
13Lariñahare Bungiu: «Gasu nabeichuniña Amonna ladüga adügaaña saragu wuribani; ladüga habusenrun haweiridagüdüni hamúan, aba hadarahani haragei würiña dageinatiña lóubawagu Galaadü.14Ligía nágudubei lubéi burí lubarieirun Rabá, gudalóunme watu ligía lani burí palasiu labadinagua agúarahani lánina wuribu luma areinchuni lánina luéyuri luriban dan.15Ábame lanügǘn lurúeite hau sun luwügüriñanigu ha wéirigubaña keisi adaürǘtiña lidoun amu fulasu». Aburemei ariñagubalin.Bible Society of Honduras