2 Samueli17
Lagadeiruni Usaí laransehan Aitoféli
1Lárigiñe aba lariñagun Aitoféli lun Abüsalón:—Ruba üma nun lun nanúadirun duusu-milu wügüriña ñüdün náamuga éibaahei Dawidi áriebu le.2Danme débilihali ani buchá luagu, ábame nábürühan luagun, ábame nanufudedaguagüdüni, ábame hanurahan sun mutu ha lúmabaña. Urúeirügüba náfara,3lárigiñeme ábame narandaragüdüniña sun lílana fulasu buma, ítara kei tarandarun würi to sun liñabei tamarieidun luma túmari. Lounwen aban wügüri báluahabei, ábame darangila hamá sun lílana fulasu.4Maribanti larihín saminaü le lun Abüsalón luma houn sun lani Ísüraeli eweridihatiña.5Óunahati giñe Abüsalón luagu Usaí le Arükíta, lun lariñaguni laritagun.6Dan lachülürünbei Usaí ligibugiñoun Abüsalón, aba lariñagun Abüsalón lun:
—Anihán lererun Aitoféli. Kagia bariñagubei, adüga waméi odi madüga waméi? Anhein magundan bubéi lau, ariñagabéi woun kaba lan wadüga?7Lariñaga Usaí lun:
—Mabuidunti le laritagubei Aitoféli guentó.8Subudi bumuti bungua luagu ganigi lan búguchi hau sun lánigu, ani gáñitiña lan guentó kei aban animaalu to ueitu lagidarúa tiráü. Subudi bumuti giñe luagu aban lan wügüri wuriburuguna búguchi, ani másügürün lubéi lan áriebu hama híbiri lánigu.9Reiti guentó mosu anihein lan aramudagu lagadábugiñe dübü o lidan lan amu fulasu. Bóugudin luéi lira, keime laburuchagun luagu ábürüha lan fiu hádangiñe bánigu lidan furumiñeti dunguaü, ñéinbaña aritagutiña luagu féridi hamá lan bánigu wuribu;10Íbinimeti le ganigitimabei, íbinime le gáñibei kei aban liñún, leferidirubei luguraasun sunsuinagubei; lugundun sun gürigia Ísüraeli, subudi hamuti luagu ganigi lan búguchi hau sun lánigu.11Saminaü lubeiti le níchugubei bun guentó, lun hóundaragun sun Ísüraelina ha aganóubaña lúmagiñe Dan darí Bérüsewa, ha gíbebaña kei sagoun laru beya, ábame babuguruniña buguya guánarügü wuriburugu.12Ábameti wábürühan luagun búguchi le ñein lumuti wadarirei. Ábame wábürühan luagun kei lábürühan serenu luagun múa, meredebei wínwanñu ni ligía, ni mutu ha lúmabaña.13Ánheindügü aramudagua lidan somu uburugu, sun Ísüraelina wanügüba gúrudu, ábame waduruguduni uburugu ligía lidoun fulasu le ñéingiñe lubéi léibaagua duna, meredebei ni aban dübü ñein.14Gúndaati Abüsalón hama sun Ísüraelina lau le lariñagubei Usaí, buiti larihín houn luéi le lariñagubei Aitoféli (ladüga haritaguaali buga Wabureme lagünrinchaguni le yebe laritagubei Aitoféli, lun lanügüni wuribani luagun Abüsalón.)15Lárigiñe aba lasubudiragüdüni Usaí luáguti saminaü le líchugubei Aitoféli lun Abüsalón luma houn ábutigu Ísüraeli, luma saminaü le líchugubei Usaí houn fádirigu Sadoku luma Abiatárü,16lun gayaraabei lan hawisaruni Dawidi furese, lun hariñagun lun, lun merede lan lidan fulasu mawübüriti le lídanbei fulasu mageirawati áriebu ligía, lun lan lánhiñuragun loubafurugun Hordán, lun mafarún lan ni ligía, ni ha lúmabaña.17Keiti ñeinñein lan Yónatan luma Aimaasi uburugu En-roheli, ani mabusenrúntiña harufudagun houngua luagu añahein lan ñein uburugu, aba tidin aban musu awisaraña, furese furese aba houdin abahüdaguei lun urúei.18Gama lumoun aba larihiniña aban nibureinti, aba lidin ariñagei lun Abüsalón. Ábati hafuresehan, aba hachülürün lúbiñoun aban wügüri lílana Baurimü, aba hebelurun lidoun aban fusu le ñeinbei lidan bürürü.19Aba tadouruni lúmari wügüri ligía lidáü fusu, aba tafuruhan türigu le ewenihóuaali ligibuagu. Úati ni aban gefenti luagu lira.20Dan hachülürünbei lánigu Abüsalón, aba hariñagun tun würi tuguya:
—Hagéi Aimaasi luma Yónatan?
Tariñaga houn:
—Sügütiña yáagiñe, aba hárügüdün luagun duna.
Ábati houdin lánigu Abüsalón áluahaña, gama lumoun kei madari hamaniña, aba hagiribudun Herusaléun.21Lárigiñe houdin, aba láfuridun Aimaasi luma Yónatan fúsurugugiñe, aba héibaagun awisarei urúei Dawidi; aba hariñagun lun, lun lásaarun furese, lun lan lánhiñuraguni duna, ladüga ariñagaali lan Aitoféli houn lun hábürühan hawagun.22Ábati lásaarun Dawidi furese hau sun mutu ha lúmabaña, aba hánhiñuraguni Hordán. Laruganbei binaafin hiñuguaaña súngubei.23Dan larihinbei Aitoféli luagu madügǘn lan le lariñagubei, aba lawariruni lilügün burigü, aba lidin lúbiñe, lageiroun. Lárigiñe laransehani luáguti hama liduheñu, aba látigiragun lungua. Ítara liña lounwen, aba labunún lidan lumuaha lúguchi.
Dawidi uburugu Manaímü
24Lidan oura le lánhiñuragunbalin Abüsalón hau sun Ísüraelina Hordán, ligía lachülürün Dawidi uburugun Manaímü.25Ru laaliti buga Abüsalón Amasá hábutime súdaragu leweñegua Hoabü. Amasá ligía, liráü aban Ísümaelina gíriti Itürá, gámari laaru meha Itürá Awigaili to tiráü Naasü, tamulelua Seruiá to lúguchu Hoabü.26Aba líchugunu Abüsalón hau Ísüraelina hakianpun-agei lumúanrugu Galaadü,27dan lachülürünbei Dawidi Manaímü, aba liabin Sobí le liráü Naasü, le lílana Rabá le lani Amón lubaroun; Makirü, le liráü Amieli le Lodebárüna; luma Bárüsilai, le Rogelímüna le lani Galaadü.28Aba hanügün gabana lun, dabarasi luma sóudieru le lauti múa, barütiña giñe türigu, sebada, fulúaru, lila nadü le warúaruti, ábasi, lenteha,29sírudu, furumasu le hani bágasu luma le hani mudún, lun leigin Dawidi hama gürigia ha lúmabaña, lugundun haritagun luagu kei lídanñanu lan fulasu mageirawati, buchabei lan hawagu, lamá hagíame, mágürabu.Bible Society of Honduras