2 Samueli16
Ladimurehan Dawidi luma Sibá
1Málügili lúmagiñe lásügürüni Dawidi lábulugu wübü, ligía liabin Sibá le lumusun Mefi-bosetü lubaroun. Barüina liña bián burigü lau sádili barüina bián-san fein, san durudia tautu beibei, san fein tautu igu luma aban gueru diwéin.2Aba lariñagun urúei lun:—Kame san banügei sun katei le?
Lariñaga Sibá lun:
—Burigü ha, lun hawariruniña liduheñu urúei, fein to tuma in, lun heigin súdaragu, diwéin, lun hatun ha abuchadutiña uagu lidan fulasu mageirawati.3Aba lariñagun urúei lun:
—Hageigia libari biyubudiri Saulu?
Lariñaga Sibá lun:
—Rédeiha uburugu Herusalén, lugundun haritaguati luagu háguyugüdaali lan Ísüraelina arúeihani le meha yuubei lun láruguti lun.4Lariñaga urúei:
—Anhán, guentó, bani sun le meha lánibei Mefi-bosetü.
Aba labuluchagun Sibá ligibugiñe urúei, aba lariñagun:
—Agurabatina fuleseihabu humá nun, urúei, súnwandan!5Dan lachülürünbei urúei Dawidi Baurimü, aba láfuridun aban wügüri hádangiñeti liduheñu Saulu ñéingiñe. Simí líribei wügüri ligía, liráü Gerá, íñaragueina ligía,6achamuragueina dübü luagun Dawidi hama lani úfisigu; lau sun aramudañuhañalin lan gürigia hama lúniri urúei,7aba líñaraguni Simí, lariñaga:
—Beiba yáagiñe, gáfarahati buguya le!8Bei laadibu Wabureme luéigiñe sun áfarahani le badügübei lau báfaraguniña liduheñu Saulu lun barúeihan leweñegua! Guentoti, deregelá Wabureme arúeihani lun Abüsalón le biráü, abunhati guentó asufurira luagu buriban, mama amu katei buguya luéidigia aban gáfarahati!9Ábati lariñagun Awisái le liráü Seruiá lun urúei:
—Ka san uagu lanabaguei ounli hilaali le urúei? Nadürüraali lichügü!10Lariñaga urúei lun:
—Lirahüñü Seruiá, mama hani bísinisi lira. Ánhana líñaragua, Waburemerügü liña ariñagubei lun ladügüni. Ani ánheinti ítara liña lubéi, kábagia garicha lun lararamuni?11Lárigiñe aba lariñagun lun Awisái luma houn lani úfisigu:
—Busenhali ligía niráü guánarügü láfarunina hilagubei, gúbumeti aban hádangiñe lani Benhamín türibu! Ígira huméi lun líñaragunina, háfuga Wabureme ariñagubei lun lun ladügüni!12Háfuga danme larihini Wabureme nasufurirun, ábame lóunahan abiniruni nun leweñegua íñarawaguni le naganbubei uguñe.13Aba lasigiruni Dawidi léibugun hau lánigu, aba lidin Simí loubafurugun laragachun wübü, úaragua luma Dawidi, íñaragueina, achamuragueina dübü iñuraheina ligía kaliki.14Dan lachülürünbei urúei hama gürigia ha lúmabaña luagun duna Hordán, buchaali hawagu saragu, aba hemeraagun ñein.
Lebelurun Abüsalón Herusaléun
15Beluha bugati Abüsalón Herusaléun hau sun Ísüraelina luma, luma giñe Aitoféli.16Ábati lidin Usaí Arükíta le lumada Dawidi lubaroun Abüsalón agúaraheina:—Gabagarilá urúei, gabagarilá urúei!17Ábati lariñagun Abüsalón lun:
—Anihán san beteingiragülebei lun bumada? Kagia uagu midin bubéi luma?18Lariñaga Usaí lun:
—Siñati, lugundun gasu nerederun luma urúei le lanúadirun Wabureme hama sun Ísüraelina.19Libiaman katei, anhein lunti lubéi neseriwidun lun somu gürigia, lunba liráü numada. Neseriwiduba lubeiti lun urúei ítara kei buga neseriwidun lun lúguchi.20Ábati lariñagun Abüsalón lun Aitoféli:
—Kagia hariñagubei lun wadügüni?21Lariñaga Aitoféli lun Abüsalón:
—Gámaribaña lubúalinigu búguchi ha lígirubaña óunigiroun palasiu. Ítara luba hasubudiruni sun gürigia Ísüraeli luagu iyereeguhaadibu lan lun búguchi, ábatimame hárügüdün ha búmagiñebaña anigi.22Ábati haranserun ubaraü luba Abüsalón tábulugu palasiu, aba lagamariduniña sun lubúalinigu lúguchi ñein hagibugiñe sun Ísüraelina;23lidan bugaha dan ligía, ítara liña ladügün aban álügüdahani luma Aitoféli kei lálügüdahoun tidan lererun guánarügü Wabungiute. Ítara liña meha luéirigun Aitoféli dandu lun Dawidi kei lun Abüsalón.
Bible Society of Honduras