2 Urúeigu25
Lábürühan Herusalén
1Weyu diisi lidan diisi hati lidan linefun lirumudiri larúeihan Sedekíasi, aba lidin urúei Nabukodonosoru kóntüra Herusalén hau sun lisudaranigu, aba legeyedaguni. Aba líchugunu likianpun ligibugiñe Herusalén, aba ladaagun wáyelesi geyegua lau uburugu lun lábürühan luagun.2Rédeiti uburugu geyewaguañu lau darí liunsun lirumudiri larúeihan Sedekíasi.3Weyu nefu lidan gádürü hati ligía laweiridúntima ilamaü fulasurugu, úaali ni kata lun heigin gürigia.4Ábati hadügün aban hunrenti luagu lubarieirun uburugu, aba lanurahan urúei hau sun súdaragu uburugugiñe áriebu, lau sun geyegu hañalin lan Kalüdéana uburugu. Aba háfuridun lídangiñe bena le labadinaguabei bián baríeiru, lídangiñe lémeri tufulurin-agei palasiu, aba hárügüdüni lémeri fulasu wayati le lani Hordán.5Gama lumoun aba héibaahani súdaragu Kalüdéana urúei Sedekíasi, aba hárügüdüni luagu fulasu mawübüriti Herikó. Aba hígiruni sun lisudaranigu, aba hafanreinragun.6Aba hárügüdüni Kalüdéana urúei, aba hanügüni lun lurúeite Babilónia, uburugun Ribülá, lumúanrugu Amatü. Aba lasiadiruni Nabukodonosoru Sedekíasi ñein,7aba lóunahan adürürei hachügü lirahüñü Sedekíasi liñúarü. Aba lasagaragüdüni biángubei lagu Sedekíasi, aba hagüraguni lau güringüri lun hanügüni Babilónioun.Tagünrinchawagúniwa ténpulu
8Weyu sedü lidan liseingün hati lidan lidisinéfun lirumudiri larúeihan Nabukodonosoru, le lurúeite Babilónia, aba lachülürün Nebusaradán le lani urúei úfisi, ani hábuti lúniri urúei uburugun Herusalén.9Aba lágudunu ténpulu, lani urúei palasiu, tuma burí sun muna to uburuguboun to haban gürigia wéirigutiña,10aba háguruni súdaragu Kalüdéana ha úarabaña luma baríeiru le geyegubei lau Herusalén.11Lárigiñe aba lanügüniña Nebusaradán gürigia ha erederubaña uburugu hau sun ha buga ñǘdünbaña lúmagiñe Nabukodonosoru, hama híbiri gadiñeburitiña adaürǘwa Babilónia.12Fiúrügüñanu hádangiñe gürigia gudemetiña lígira lun hábunagun ichari.13Aba hagünrinchaguni Kalüdéana ílagu burí lauti buronse le ténpulurugubei: Wagabu, ebu luma óunwenbu lagei duna, aba hanügüni sun buronse Babilónioun.14Barǘ hamuti burí giñe lagei baligi, chóbuli, isiresi lun líbaahoun limechan lanpu, guliyeru, sun katei lauti buronse le eseriwidubei lun kultu.15Barǘ lumuti giñe gumadan le hábuti óunigirutiña sun katei le lauti golu luma pülata; lagei leñegura watu luma burí kopu wéinamuti.16Siñati burí lamisurahóuniwa katei lauti buronse le ladügagüdübei urúei Salomón tun ténpulu: Bián wagabu, óunwenbu lagei duna luma burí ebu, ladüga lanarime lihürü.17Ñeinñein lóugiñe widü méturu luagu liñun kada wagabu, íñugiñe libiti, ñeinñein aban kapitéli lauti buronse lóugiñe bián méturu liñun, ñeinñein aban ayarawaguni lauti gürabu geyegu lau lauti buronse güranáda luenden. Aban labu biángubei wagabu ligía.Hanügǘniwa lílana Hudá adaürawagúa Babilónioun
18Daü lumuti giñe hábuti lúniri urúei, Seraíasi fádiri le íñutimabei, Sofoníasi, le fádiri le lárigibei hama ǘrüwa túniri ténpulu.19Hádangiñe lílana uburugu, daü lumuti úfisi le meha hábuti súdaragu, hámaya seingü wügüriña eseriwidutiña lun urúei ha ñéinbaña uburugu, milidaru le abudahabei wügüriña lun hasudarahan hama ǘrüwa-wein lílana uburugu íñugutiña ha ñéinbaña uburugu.20Aba lanügüniña Nebusaradán sun gürigia ha ligibugiñoun lurúeite Babilónia, uburugun Ribülá, lumúanrugun Amatü. Aba láfaraguagüdüniña lurúeitegu Babilónia ñein.Ítara liña hasagarun lílana Hudá hageiragiñe.
Lagumadihan Gedalíasi Palestina
22Aba líchuguni Nabukodonosoru Gedalíasi le liráü Aikamü, libari Safán lun ligía lan ariha hau gürigia ha buga lígirubaña Hudá.23Dan hasubudirunbalin hábutigu lisudaranigu Hudá hama hawügüriñanigu katei le, aba houdin Misüpá lun hadimurehan luma Gedalíasi. Ñǘdünti Ísümaeli le liráü Netaníasi; Hoanán le liráü Karéa, Seraíasi le liráü Tanumetü, le Netofána; luma Hasaníasi le liráü aban wügüri Maakana. Ñǘdüntiña giñe hawügüriñanigu hama.24Aba ladügün Gedalíasi aban fiñún houn, luma houn hawügüriñanigu, aba lariñagun houn lun manufudedun hamá hawéi úfisigu Kalüdéana, lun lan herederun aganawa fulasurugu ábame lan heseriwidun lun lurúeite Babilónia, luagu buídubei lan lidin houn.25Gama lumoun lidan lisedün hati, aba liabin Ísümaeli le liráü Netaníasi, libari Elisamá le meha hádangiñebei liduheñu lurúeite Hudá hau diisi wügüriña aba háfaruni súngubei hagía Gedalíasi hau sun huríu hama Kalüdéana ha lúmabaña uburugu Misüpá.26Leti hanufude gürigia hawéi Kalüdéana, aba houdin Ehiptun, dandu wéinamuhaña hama ñǘbürigiña keisi hani súdaragu úfisigu.Láfuridun Hoakimü furisunrugúgiñe
27Weyu wein-sedü lidan duusu hati, lidan irumu darandi-sedü luéigiñe lasagarun Hoakimü le lurúeite Hudá lageiragiñe, ligía lagumeserun Ewili-merodákü arúeiha Babilónia, areidati lun Hoakimü, aba lasagaruni furisunrugúgiñe,28aba lóuseruni buidu sügǘ hau híbiri urúeigu ha lúmabaña ñein Babilónia.29Ítara liña laragachunu Hoakimü daüguaü to meha layusuruboun furisunrugu, aba leigin luma urúei darí lounwen.30Lidan sun libagari Hoakimü resibiti giñe fáyeiti sagü weyu lúmagiñe lurúeite Babilónia.Bible Society of Honduras