2 Urúeigu24
1Lidan lidaani larúeihan Hoakimü, aba lebelurun Nabukodonosoru le lurúeite Babilónia fulasurugún lau erei, aba lerederun Hoakimü lábugiñe lubafu Nabukodonosoru luagu ǘrüwa irumu. Lárigiñe aba lasansiragun laritagun Hoakimü aba liñuragun lungua luagun Nabukodonosoru.2Gama lumoun aba lóunahan Bungiu saragu híwerutiña luagun Hoakimü Kalüdéana, Síriana, Moábüna hama Amonna. Aba lóunahaniña Bungiu kóntüra Hudá, lun hagünrinchaguni, kei buga lariñagagüdüni Aburemei houn lani profetagu.3Lasuseredunbei lira lun Hudá, ladüga ítara liña lan laransehani Bungiu lun lagidarubei lan liñúarürugugiñe ladüga sun burí figóu le buga ladügübei Manasési,4luma luagu hata maduruntiña le láwiyuragüdübei, le aubei labuinchagüdei Herusalén. Ligía lamaharunbei Bungiu feruduna lani luagu figóu le.5Le líbiri asusereduti luáguti Hoakimü luma burí katei le buga ladügübei, anihein bürüwañu tidan liliburuna asusereduti hawaguti lurúeitegu Hudá.6Aba lounwen Hoakimü, aba larúeihan Hoakín le liráü leweñegua.7Lúmagiñe dan ligía, aba máfuridunhali lan lurúeite Ehiptu lageiragiñe, ladüga ragüla buga lurúeite Babilónia sun lufulasun lúmagiñe liraüraü duna le Ehiptu darí duna Éufüratesi.
Lanügǘniwa Hoakín hama lánigu lun Babilónioun
8Disiwídü irumu lau Hoakín dan le lagumeserunbei arúeiha, aba larúeihan ǘrüwa hati Herusalén. Neusutá tíribei lúguchu, Herusalénna, liráü Elünatán.9Gama lumoun wuribati ligaburi ligibugiñe Bungiu, kei meha lagüchagu.10Lidan dan ligía, aba houdin lisudaran Nabukodonosoru le lurúeite Babilónia kóntüra Herusalén, aba hegeyedaguni lun hábürühan luagun.11Dan le añaha lubéi ageindagua, ligía lachülürün Nabukodonosoru.12Ábati lederegeragun Hoakín le lurúeite Hudá lungua tau sun lúguchu, lani úfisigu hama luwügüriñanigu ha uágubaña lemenigida lun lurúeite Babilónia, aba ladaüraguniña. Lidan liwidün lirumudiri larúeihan Nabukodonosoru lasusereda katei le.13Lárigiñe aba lasagaruni Nabukodonosoru sun irisini le tídanbei litenpulun Aburemei luma le tídanbei luban urúei, ítara kei buga lariñaguni Aburemei, bougua lumuti sun katei golu le meha ladügübei Salomón tun luban Aburemei.14Lárigiñe aba lanügüniña sun lílana Herusalén adaüra, ábutigu hama habuidun-agei súdaragu, sun gadiñeburitiña hama nadagimeintiña gürabu, darí hóustarun diisi-milu adaürütiña. Úatiña erederutiña fulasurugu haweidigia gürigia ha gudemetimabaña.15Barǘ lumuti giñe Nabukodonosoru Hoakimü adaüra tau sun lúguchu, lúmari, lani úfisigu hama gürigia hátima wéirigubaña fulasurugu. Aba lanügüniña Herusaléngiñe lun Babilónioun.16Sédüñanu-milu gürigia íñugutiña lanügün lurúeite Babilónia, milu gadiñeburitiña hama nadagimeintiña gürabu, bóugudin hawéi sun wügüriña héretiña ha gayaraati houdin wuriburugu.17Lárigiñe aba líchuguni lurúeite Babilónia Mataníasi urúeime leweñegua Hoakimü le libase, aba lasansiruni liri, aba líchugun Sedekíasi luagu.Larúeihan Sedekíasi
18Wein-aban irumu lau Sedekíasi dan le lagumeserunbei arúeiha, aba larúeihan unsu irumu Herusalén. Amutáli tíribei lúguchu, Libünáana, liráü Heremíasi.19Gama lumoun wuribati lóuserun ligibugiñe Aburemei, ítara kei meha lóuserun Hoakimü.20Ligía lagañidunbei Bungiu houn lílana Herusalén luma houn lílana Hudá, aba labugaguniña liñúarürugugiñe.Bible Society of Honduras