2 Krónikasi25
Larúeihan Amasíasi
1Wein-seingü irumu lau Amasíasi dan le lagumeserunbei arúeiha, arúeihati wein-nefu irumu Herusalén, Hoadán bugaha tíribei lúguchu, uburuguna Herusalén.2Buiti bugaha lóuserun Amasíasi ligibugiñe Wabungiute, gama lumoun móuserunti lau úarani sunsuinagubei.3Dan le lárügüdagunbei Amasíasi lungua buidu lidan larúeihan, aba láfaraguniña sun úfisigu ha buga áfarubalin lúguchi.4Gama lumoun máfaragun lumutiña harahüñü lugundun lariñahare tidan líburu to ñein lubéi lilurudun Moisesi: «Máfarawagunbaña agübürigu luagu hadurun hasaanigu, ni isaanigu luagu hadurun hagübürigu, kada aban lun lounwen luagu lidurun guánarügü».5Aba lóundaruniña Amasíasi sun wügüriña ha lílana Hudá hama lílana Benhamín, aba lafanreinhaniña kada iduheñu lábugiñe hagumadin ábutigu milidaru. Lárigiñe aba labahüdüniña sun ha gúnfulihañabaña wein irumu lun iñun, ǘrüwañanu-san-milu súdaragu ha aransetiña lun wuribu, ha gayusuraditiña eféin luma idaüdinaü le hadáü ageindagutiña.6Adügati giñe daradu hawagu san-milu súdaragu Ísüraelina luagu sedü-milu-bián-san-ǘrüwa-wein líburu pülata.7Gama lumoun aba liabin aban luwügürin Wabungiute lumoun, aba lariñagun lun:—Uruei, móundaragua hamá lisudaranigu Ísüraeli buma, lugundun úati Wabungiute hama Ísüraelina ni hama lánigu Éfürain.8Gama lumoun anhein busén bubéi banügüniña lun híchugun erei bun wuriburugu, leferidiragüdübei Wabungiute wuribu bun, lugundun gabafuti Wabungiute dandu lun lídehan kei lun lábürügüdün.9Aba lariñagun Amasíasi lun luwügürin Wabungiute ligía:
—Kábati asusereda lau sedü-milu-bián-san-ǘrüwa-wein líburu pülata le ru naalibei houn lisudaranigu Ísüraeli?
Lariñaga luwügürin Wabungiute ligía lun:
—Anihein gíbeti luma Wabungiute lun líchugun sügǘ lau lira bun.10Ábati lafanreinraguagüdüniña Amasíasi súdaragu ha buga ñǘbuinbaña lun Éfüraingiñe aba hóudingua hábiñoun. Gama lumoun aba hagañidun luma Hudá.11Aba lárügüdün Amasíasi anigi, aba lanügüniña lumutuniña luagun fulasu wayati le lani Salu, aba háfarun diisi-milu wügüriña ha Seirüna.12Ragǘ hamaña Hudaana ábanya diisi-milu wügüriña wínwanñu aba hanügüniña lábulugun aban wübü gadübüriti; aba hachagaruniña ñéingiñe, aba hóunwegun sun hagía.13Sunti buga dan le, ha buga gürigia ha manügün lubaña Amasíasi lúmagua ha lagiribudagüdübaña hábiñoun, aba hebelurun luburuguterugun Hudá lúmagiñe Samariagiñe darí Betü-orón, aba háfarun ǘrüwa-milu gürigia, barǘ hagía saragu katei le híweruhan.14Dan lagiribudun Amasíasi lárigiñe láfaraguniña Edomuna, barǘ lumutiña lubungiutegu Seirü lúmagua, aba lanügüniña lubungiutegume, huduguati houn, águdaha ligía kupali houn.15Aba lagañidun Wabungiute lun Amasíasi, aba lóunahan aban profeta ariñaga lun:
—Ka uagu bánharunbei houn habungiutegu néchanigu, búngiugu ha buga mabafubaña lun hesefuruniña hánigu buéi?16Gama lumoun dan lariñagunbei profeta ítara, aba lariñagun urúei lun:
—Ru wamaadibu funagia lánime urúei eweridihati? Rédeibei katei le! Odi busentibu bafarún?
Aba lederaguagüdün profeta, gama lumoun aba lariñagun:
—Subudi numuti luagu haritaguaali lan Wabungiute lagünrinchagunibu ladüga badügüni katei le luma luagu mafalabáni neweridihan.17Gama lumoun aba lafalaruni Amasíasi le lurúeite Hudá heweridihan amu, aba lóunahan ariñaga lun Hoasi le liráü Hoakasi le libari Heú le lurúeite Ísüraeli: «Ñǘbuinba aríagua wamaamuga woungua».18Gama lumoun aba lóunahan Hoasi ariñaga lun:
—Óunahan hiiyu ariñaga lun hibúari Líwanuna: “Ruboun biráü lun niráü lúmarime”. Gama lumoun aba lásügürün aban animaalu gáñiti ñéingiñe, aba laburechaguni animaalu ligía hiiyu.19Bariñahare luagu áfaraguaba lan Edomuna, pántatibuti luagu lira, aba báluahan lanwoun buéirigun. Gama lumoun buítimati lun berederun búbiñe. Ka uagu báluahei bilamiserun guánarügü luma lilamiserun Hudá?20Gama lumoun madügünti Amasíasi gasu lau, lugundun aranse laali lan Wabungiute lun ítara luba lan, lun lederegerubaña lan labun lubafu Hoasi, ladüga háhuduragun houn lubungiutegu Edomu.21Ábati láfuridun Hoasi lun lidin ageindagua luma Amasíasi Betü-sémesi le lumúanrugubei Hudá.22Aba lagañeiruni Ísüraeli wuribu luagu Hudá, aba héibaagun kada aban hábiñoun.23Aba ladaürüni Hoasi le lurúeite Ísüraeli Amasíasi uburugu Betü-sémesi, lárigiñe aba lanügüni Herusaléun, aba lachigin aban üma luagu baríeiru le Herusalénbei san-gádürü-wein méturu luagu, lúmagiñe Lubenari Éfürain darí lumoun Lubenari Kaaná.24Barǘ lumuti giñe sun golu luma pülata luma sun ílagu le litenpulunrugubei Wabungiute lábugiñe laríaahan Owedi-edomu luma burí lidan irisini le tídanbei lani urúei palasiu. Lárigiñe lanügün fiu gürigia lau éregu, aba lagiribudun Samarioun.25Nibagariti Amasíasi le liráü Hoasi, le lurúeite Hudá keinsi irumu lárigiñe lounwen Hoasi, le liráü Hoakasi, le lurúeite Ísüraeli.26Le líbiri luáguti Amasíasi lúmagiñe furumiñeti darí lumoun lagumuhóun, anihein bürüwañu tidan haliburun lurúeitegu Hudá luma Ísüraeli.27Lúmagiñe oura le ladireirunbei Amasíasi luéi Wabureme, aba leledewagun lubá Amasíasi Herusalén, aba lanurahan uburugun Lákisi; gama lumoun aba héibaahani darí uburugu ligía, aba háfaruni ñein.28Lárigiñe aba hanügüni luagu aban gabayu, aba hábununi le ñein habéi lagüchagu Luburuguterugu Dawidi.
Bible Society of Honduras