2 Krónikasi24
Larúeihan Hoasi
1Sedü irumu lau Hoasi dan le lagumeserunbei arúeiha, arúeihati bián-wein irumu Herusalén. Siwiá bugaha tíribei lúguchu, Bérüsewana.2Buiti bugaha lóuserun Hoasi ligibugiñe Wabureme sun wínwangili lan fádiri Hoyadá.3Maríeigüda lumuti Hoyadá Hoasi hama bián würiña ha áubaña garahüñügua lan.4Átiri dan lárigiñe, aba líchaagun Hoasi lungua lun laranserunu litenpulun Wabureme,5aba lóundaruniña fádirigu hama Lewitagu lariñaga houn:—Éibuga huméi sun burí luburugute Hudá, habudahame seinsu hámagiñe sun Ísüraelina lun taransehóun litenpulun Wabungiute sagü irumu. Furese humá lau katei le.
Gama lumoun móufudahantiña Lewitagu.6Ábati lagúarun urúei lun fádiri le íñugutimabei, lariñaga lun:
—Ka uagu máfaagungidibu lubéi lun hanügüni Lewitagu ídemuei Hudaagiñe luma Herusaléngiñe le bugaha uágubei lariñaga Moisesi hama lílana Ísüraeli lun labudahóun tun lúbaanina daradu?7Ladüga Atalía tomeme meha wuribaniboun, hama ha afalarubarun, beluhaña meha litenpulunrugun Wabungiute, aba hanügüni sun ílagu le ñeinbei lun hadügün kultu houn haguariuan.8Ábati ladügagüdün urúei aban bágüsi aba híchugunu lurugabu tubenari litenpulun Wabureme, bóugudigiñe.9Aba híchugun uganu lidan sun Hudá luma Herusalén luagu lunti lan lichugún ídemuei le meha uágubei lariñaga Moisesi le lubúein Bungiu houn Ísüraelina lidan fulasu mageirawati lun Wabureme.10Ábati houdin sun ábutigu hama sun lílana fulasu lau ugundani íchigei hídemuei tidoun bágüsi darí tabuinchun.11Ábaha hanügünu Lewitagu bágüsi lun urúei lun larihini ida tiña lan; dántiha gíbeeli seinsu tidan, ábaha hanügünu Lewitagu bágüsi lun urúei, lubaatiha liabin aban hádangiñe lani urúei abürühati hama láugiñetiña fádiri le íñutimabei lun habahüdüni seinsu; lárigiñe ábaya híchugunu lidan tubara. Ítara liñaha hadügüni sagü weyu, gíbetitiha seinsu hóundarun.12Ábaha lederegeruni urúei luma Hoyadá seinsu ligía houn ha arihubaña lau wadagimanu tidan ténpulu lun hadaradurun abouhatiña dübü hama sarafangei lun haransehanu litenpulun Wabureme. Gasu giñeha hadaradurun úfisigu lun hawadigimarini gürabu luma buronse lun taransehóun ténpulu.13Aba hagumeserun ha arihubaña lau wadagimanu nadagimein, awanseti wadagimanu háhaburugu saragu, aba taranserun litenpulun Wabureme según furumiñeti pülanu, aba terederun buidu.14Dan hagumuchunbei, aba hanügüni seinsu le ígiragubei lun urúei luma Hoyadá, aba hóunahan adaagüdei tílagu ténpulu dandu le lunti kultu kei le lunti adagaragüdüni gudawarügüti, luma burí guliyeru, luma amu burí umegeguni le lauti golu luma le lauti pülata. Sun wínwanñu lan Hoyadá, súnwandan ladagarawagüdün adagaragüdüni gudawarügüti litenpulunrugu Wabureme.15Gama lumoun aba laweiyadun Hoyadá, aba lounwen. San-darandi irumu lau dan le lóunwenbei;16aba hábununi luburuguterugu Dawidi, habadu urúeigu, lugundun buiti bugaha lóuserun hama Ísüraelina, luma Wabungiute labu tuma ténpulu.17Lárigiñe lounwen Hoyadá, aba hayabin lábutigu Hudá, aba híchugun uéiriguni lun urúei. Aba lígirun lun heweridihani,18aba hígirunu litenpulun Wabureme le Habungiute hagüchagu, aba hadügün kultu tun liyawa Asera luma houn amu guáriuagu. Ladüga figóu ligía lagañida Wabureme luma Hudá labu Herusalén.19Lau sun lira óunahati Wabungiute profetagu houn lun hagiribuduba lan lun. Gama lumoun meberesegúntiña gürigia lau hererehan profetagu.20Ábati lebelurun lani Wabungiute sífiri lidoun Sakaríasi le liráü fádiri Hoyadá, aba lararamun lidan aban ubaraü íñuti, aba lariñagun houn lílana fulasu.
—Lariñahare Wabungiute: “Ka uagu maganbun hubalin nugumadin? Ka uagu háluahei hilamiserun guánarügü? Kei ígira humaadina lubéi, nígiraadün giñe!”21Gama lumoun aba húaradun kóntüra ligía, aba lachamuraguagüdün urúei dübü luagun houn tibürürünrugu litenpulun Wabungiute.22Bulíei lumuti urúei Hoasi lubuidun leseriwiduni Hoyadá le lúguchi Sakaríasi, aba láfaruni Hoasi Sakaríasi le liráü, le ariñagubei oura le lóunwenbei:
—Ariha láamugei Wabungiute katei le, fáyeigüda ligíame luagu!23Fiu dan lárigiñe, aba hageindagun Síriana luma urúei Hoasi, lárigiñe hawanserun chülǘ Hudá luma Herusalén, aba hagumuchun hau sun ábutigu, aba hasagarahani fulasu, aba hóunahani sun le hanügübei lun lurúeite Damasüku.24Fiúrügüñanu wuriburuguna Síriana ñǘbuintiña, gama lumoun aba lederegerun Wabureme saragu súdaragu háhaburugun, ladüga hígiruni Wabureme le Habungiute hagüchagu. Ítara liña lasufuriruni Hoasi abeichúni le ladünabei.25Dan le hóudinbei Síriana, ígira haméi lau sandi, aba heledegun lani úfisigu kóntüra ligía lun hafayeiragüdüni luagu lounwen fádiri Hoyadá, aba háfaruni tidan ligabanan guánarügü. Lárigiñe aba hábununi luburuguterugu Dawidi gama lumoun mama lidan hamúaha urúeigu.26Añahán ha buga eledegubaña lubá: Sawadü le liráü Simatü aban Amonna luma Hosabádü le liráü Simürítü aban Moábüna.27Le hawaguti lirahüñü Hoasi, profesía burí le kóntürabei luagu, laransehanu litenpulun Wabungiute, anihein bürüwañu tidan haliburun urúeigu. Aba larúeihan Amasíasi le liráü leweñegua.
Bible Society of Honduras