2 Krónikasi13
Larúeihan Abiamü Hudá
1Lidan irumu disiwídü lidan larúeihan Heroboamü, ligía lagumeserun Abiamü arúeiha Hudá.2Arúeihati ǘrüwa irumu Herusalén. Mikaíasi bugaha tíribei lúguchu, liráü Urieli Gibeana.Ábati ñein lan wuribu hadan Abiamü luma Heroboamü.3Aba lagumeseruni Abiamü wuribu hau gádürü-san-milu súdara anuadahóuarügütiña. Heroboamü hau widü-san-milu súdara anuadahóuarügütiña.4Rara ligíati Abiamü luagu wübü Semaraímü le láraabuterugubei Éfürain, aba lagúaragun, lariñaga:
—Heroboamü hau sun Ísüraelina, aganba humana!5Ibidiñeti san hun luagu derege lani Wabungiute le Lubungiute Ísüraeli arúeihani lun Dawidi luma houn ladügawagun lun súnwandan lábugiñe aban daradu le magurudúaditi?6Lau sun lira garabaguati Heroboamü le liráü Nabatü, le lubúein Salomón le liráü Dawidi luagun labureme.7Aba hóundarun átiri wügüriña mafisiutetiña ha salufuritiña lumoun, aba hawügürihóun lun Roboamü le liráü Salomón, kei nibureingili lubéi ani débili ligía. Méreti lubeiti lun lagagibudagun hama.8Guentoti, busentün hawügürihóun lun lugumadin Wabungiute le lábugiñebei hererehan ladügawagun Dawidi, ladügarügü gibe humá ani húmagiñeñanu lan bágasu burí láutiña golu ha ladügübaña Heroboamü hun lun hagíaba lan hubungiutegu.9Ma funagia bugagua humá lufadirinigu Wabungiute ha ladügawagun Aarón hama Lewitagu, aba híchugun fádirigu ha habusenrun kei hadüga néchanigu ha gibe tubungiutegu? Furumiñeguarügü le ñǘbuinti ederegeragua lungua lau aban bágasu wügüri hama sedü gábara, gayaraati lafadirihan houn búngiugu ha mama búngiugu!10Ánheinti wagía, Bungiu Waburemebei, ani mígirun wamagili. Fádirigu ha eseriwidubaña lun Wabungiute ladügawagun Aarón, ani ha arihubaña lau kultu Lewitagu.11Hagía, dagagüdatiña lun Wabungiute wéyuagu áriebu: Adagaragüdüni gudawarügüti, luma kupali, dagagüda hamutu fein anuadirúatu luagu aban dábula harumati según échuni, be hamuti giñe lanpu le luágubei lebu sanudelu le golu sagü rábounweyu. Lugundun gúnfuli wamuti le labusenrubei Wabureme le Wabungiute, ánheinti huguya ígira humaali.12Subudi huméi lubeiti luagu anihein lan Wabungiute hama lufadirinigu wabá wabá, luagu aranseru lan giñe fidu lun tínwinrun lun lagumeserun wuribu kóntüra huguya Ísüraelina, mageindagua humá luma Bungiu le Habungiute hagüchagu, lugundun magañeirúnbadün.13Ariñagaali bugati Heroboamü lun hadügün súdara ha árigibaña aban geyeguaü lun hábürühan hawagun háganiñu hanagangiñe, aba lubeiti herederun hiibe-agei luwügüriñan Heroboamü hagibugiñe lánigu Hudá, sun añaha lan ha árigibaña ábürüha hawagun hanagangiñe.14Dan le harihinbei lánigu Hudá hárigoun, ligía gefén hamá luagu lábürühouña lan hawagun hagibugiñegiñe luma hanagangiñe. Ábati hagúarahani Wabungiute, aba hínwinruni fádirigu fidu.15Danti hadügünbalin lílana Hudá agúaraguni le lánina wuribu, aba lagünrinchaguni Wabungiute Heroboamü hau sun Ísüraelina ligibugiñe Abiamü luma Hudá.16Aba héibaagun Ísüraelina hawéi lílana Hudá, ladüga lederegeruniña Wabungiute houn.17Aba láfaragun Abiamü hama lumutuniña seingü-san-milu súdara anuadirútiña Ísüraeligiñe.18Ítara liña hǘnabudaguagüdüniwa Ísüraelina lidan dan ligía, ánheinti lánigu Hudá aba héredun, ladüga hárügüdün luagu Wabureme le Habungiute hagüchagu.19Aba léibaahani Abiamü Heroboamü, aba lanügüni uburugu Beteli luéi, Hesaná luma Éfürain lau sun burí lirahüñü fulasu le geyegubei lau.20Siñá lumuti bugaha Heroboamü lubafu árügüda lárigoun sun wínwangili lan Abiamü. Lagumuhóun dan, aba lasandiragüdüni Wabureme, aba lounwen.21Ábati lederebugudun larúeihan Abiamü. Katorusuñanu bugaha lúmarigu, wein-bián lirahüñü wügüriña disisi würiña.22Le líbiri asusereduti lun Abiamü luma sun le ladügübei lidan libagari, anihein bürüwañu tidan liliburuna asusereduti to lani profeta Idó.
Bible Society of Honduras