1 Urúeigu6
Lábunagunu Salomón ténpulu
1Lidan ligadürün lirumudiri larúeihan Salomón Ísüraeli ligía lagumeseruni tábunawagun litenpulun Aburemei, lidan hati le gíribei Sibü le libiaman hati lidan irumu, gádürü-san-gádürü-wein irumu lárigiñe háfuridun Ísüraelina Ehiptugiñe.2Ténpulu to ladügüboun urúei Salomón lun Aburemei wein-sédüñein méturu timigifen, nefu tidabuberen, tareisi-dimí tiñun.3Furumiñeti lasali le tigibugiñebei ténpulu nefu méturu limigifen, ítara kei tidabuberen ténpulu ani gádürü méturu dimí tidabuberen muna tuguya tigibugiñegiñe.4Adaagüda lumuti Salomón tufunederan ténpulu ayarawaguañu lau gürabu miginaguburiti.5Bunaguati giñe ábanya rumu lóubawagu baríeiru le egeyedagubarun muna, rumu ligía luáguñein baríeiru le egeyedagubarun ténpulu dandu geyegu lau lasali keisi geyegu lau rumu le tanagangiñebei.6Le furumiñeti rumu ǘnabugiñe bián méturu luma wein-seingü sentimeturu lidabuberen, rúmuti le ligibuagubei le furumiñeti bián méturu luma ǘrüwa-wein-diisi sentimeturu, ánheinti rumu le íñugiñebei le ligibuagubei bián furumiñeti ǘrüwa méturu luma keinsi sentimeturu lidabuberen; ladüga agidarúeina liña lídangiñe tidabuberen ténpulu bóugudigiñe tibiti luéi láchouruniwa tebu tibiaman tuma tǘrüwan fuló luagu tubarieirun ténpulu.7Lidan tabunún ténpulu dǘbürügüñein le aranserúaali ayusurúa, ítara liña lubeiti maganbún lan marüdiyu ni amu tulu le lauti gürabu lidan tábunawagun.8Ebeluruni lidoun furumiñeti fuló luéigiñeñein tóunwenren ténpulu; lun lawariruniwa lidoun fuló burí le tamidanguabei luma lidoun le lǘrüwan ñeinñein aban esütépu.9Lídanbei lásurun lábunagunu Salomón ténpulu, aba ladouraguni sun tábulugu ténpulu lau índanu luma fulansu le lauti hibúari.10Bunagua lumuti giñe sun rumu le egeyedagubarun sun ténpulu, bián méturu luma wein-seingü sentimeturu liñun rumu ligía, ani ruti giñe wagabu le lauti hibúari lun lágüdahame tubarieirun ténpulu.11Ábati layanuhan Wabureme lun Salomón lariñaga lun:12—Tuáguti ténpulu to bábunaguboun, busentina nariñagun bun ánhabu lan éibuga según nilurudun luma le nubeibei, lun bagunfuliruni sun nugumadin lun bóuserun según ligía, nagunfulirubei füramasei le nadügübei buagu lun Dawidi, le búguchi;13ani naganóuba haganagua Ísüraelina, mígirun neime Ísüraeli, le nageira.14Aba lásuruni Salomón lábunagunu ténpulu.15Aba lafuraruni sun touba ténpulu turageirugugiñe lau fulansu le hibúari. Aba ladouraguni lau fulansu lúmagiñe íñugiñe lun ǘnabun, ani afuraraléi tipisun lau fulansu le gudi.16Afurarati giñe nefu méturu íñugiñe lun ǘnabun múnadagiñe libiti tede ténpulu, aba laransehani lun ligíaba lan Fulasu Sándutimati.17Fulasu le ligibugiñebei Fulasu Sándutimati, disiwídüñein méturu limigifen.18Lau fulansu le hibúari lafurarúa turageirugu ténpulu, adibuhóuati fuluri tuma tin wewe luagu burí fulansu ligía. Sun turageirugu lauñein fulansu le hibúari. Marihínti meha ni aban dübü.19Aba laranseruni Salomón Fulasu Sándutimati tidan ténpulu lun líchugunu lubagüsinina lidaradun Aburemei ñein.20Néfuñein méturu limigifen lurageirugu Fulasu Sándutimati, nefu lidabuberen luma nefu liñun. Adügati Salomón aba latarü le lauti hibúari ligibugiñe Fulasu Sándutimati lárigiñe aba lafuraruni lau golu.21Furá lumuti giñe turageirugu ténpulu luma Fulasu Sándutimati lau golu, lárigiñe aba híchugun güringüri lauti golu ligibugiñe.22Ítara liña lubeiti furá lanu sun ténpulu lau golu, kéisigubeirügü latarü le buga ligibugiñebei Fulasu Sándutimati.23Adügati giñe bián kátaña garünatiña ha láutiña fulansu le oliwu lun Fulasu Sándutimati. Kada aban hádangiñe gádürüñein méturu dimí liñun.24Kada aban lídangiñe harüna bianñein méturu luma wein-seingü sentimeturu limigifen. Ítara liña lubeiti lídangiñe lígirugu harüna lumoun le aban, gádürüñein méturu dimí limigifen kada aban.25Ábanmeme haweinamun bián kátaña garünatiña hagía; kéisigubeirügü wariñagun gádürü méturu dimí hamigifen biángubei, ani ábanmeme giñe hagaburi.26Gádürüñein giñe méturu dimí hiñun.27Aba líchuguniña Salomón lidan Fulasu Sándutimati. Tuleñuhañalinti buga kátaña garünatiña hagía harüna, ítara liña lubeiti dagá lan larüna aban luagu touba muna le aban luáguya le aban touba muna. Ánheinti biámaya arünaü le ígiragubei aba laguuragun lungua lidan lamidan Fulasu Sándutimati.28Lárigiñe ábaya lafuraruniña Salomón bián kátaña garünatiña hagía lau golu,29adibuhati giñe kátaña garünatiña luagu sun touba ténpulu bóugudigiñe luma múnadagiñe tibiti, adibuhati giñe tídibu yaraüwa luma fuluri tuagu.30Furá lumuti giñe tipisun ténpulu lau golu, bóugudigiñe luma múnadagiñe.31Lun ebeluruni lidoun Fulasu Sándutimati adügati bena lau fulansu lauti oliwu, bena ligía gágiriguati íñugiñe libiti, séingüñein lubeiti larigei.32Lauti fulansu oliwu biángubei bena, ábati lagiwerirun kátaña garünatiña, tídibu yaraüwa luma fuluri luagu, lárigiñe aba lafuraruni lau golu.33Lun ebeluruni lidoun lasali le tamidanguabei ténpulu, adügati máruku le lauti fulansu le oliwu, le gádürüguati larigei.34Lauti fulansu le gudi biángubei bena ani agararahati biángubei dan ladaarúniwa.35Aba lagiwerirun kátaña garünatiña, yaraüwa luma fuluri luagu, lárigiñe lafuraruni lau golu.36Adüga lumuti giñe tiyadün ténpulu le múnadagiñebei lau ǘrüwa lafileirun dübü luma aban lafileirun wagabu le hibúari.37Lidan ligadürün lirumudiri larúeihan Salomón lidan hati le gíribei Sibü híchigei tipisun litenpulun Aburemei;38lídanti únsuhali irumu lau larúeihan, lidan hati le Bulu, le liwidün hati lidan irumu ligía tásurun ténpulu sunsuinagubei, lidan sun katei. Lidan lubeiti sedü irumu lábunaguoun Salomón.Bible Society of Honduras