1 Urúeigu5
Lidaradun Salomón luma Iramü
1Dan laganbunbei Iramü le lurúeite Tiru, luagu anuadirúaali lan Salomón lun larúeihan leweñegua Dawidi, le lúguchi, aba lóunahaniña lóunagülegu lumoun, lugundun hínsiñegubeiñein buga Dawidi lun Iramü.2Ábati lóunahan Salomón ariñaga lun Iramü:3«Subudi bumuti luagu mábunun lan Dawidi le núguchi aban ténpulu lun Labureme le Lubungiute, lugundun wuriburuguñein lan súnwandan, darí lun lederegeruniña Wabureme láganiñu lun.4Gama lumoun guentó, rúhali Nabureme le Nubungiute ñuruguaü nun lidan sun fulasu, máganihadiwa, malamiserun wagía.5Nábunagua lubeiti aban ténpulu lun Aburemei le Nubungiute kei buga lariñaguni lun núguchi Dawidi, dan le lariñagunbei lun, luagu liráü lan le lunbei líchuguni Aburemei lun larúeihan leweñegua, ligíaba lan ábunaguagüda aban ténpulu lun.6Ruba lubeiti lúrudu lun háchuahan hibúari nun Líwanugiñe. Hóudiba numusuniña íderaguaña bumusuniña, ábame nafayeiruni le baguburahan luagu hawadigimari bánigu, lugundun subudi bumuti buidu luagu ua lan ni aban wádangiñe gawadigimaridaditi fulansu kei Sidonna».7Dan laganbuni Iramü uganu le lóunahabei Salomón lun, aba lagundaarun saragu, aba lariñagun:—Biniwalá Aburemei uguñe, ladüga líchugun aban isaani chu tau lun Dawidi, lun lalidihani óunwenbu néchani le!8Lárigiñe aba lóunahan Iramü ariñaga lun Salomón:
—Resibi naali uganu le bóunahabei nun, ani nóunahabei sun hibúari luma gudi le bamuriahabei.9Hanaagubei numusuniña Líwanugiñe chülǘ baranahoun, ábame hanügüni ñéingiñe baranaha baranaha kei bálüsa le ñeinhin lumuti babusenrei, ábame lafaragadúniwa ñein, lun banügüni. Leeti namuriahabei buma, lun bíchuguba lan burí éigini houn niduheñu.10Aba lubeiti líchuguni Iramü sun hibúari luma gudi le labusenrubei Salomón lun;11aba líchugun Salomón éigini tun lani Iramü palasiu, anihán sun le líchugubei Salomón lun: Gádürü-míñunu-gádürü-san-milu líburu türigu luma gádürü-milu-gádürü-san líturu garaba le lauti oliwu. Ságüha irumu líchuguni Salomón sun le lun Iramü.12Aba lubeiti líchugun Aburemei lichú aau lun Salomón kei buga lariñaguni lun. Aba giñe ladügün Iramü daradu luma Salomón, aba ñein lan darangilaü hadan.13Ábati líchigagüdün Salomón lúrudu lidan sun Ísüraeli, lun hóundaragun wügüriña lun hawadigimaridun lun urúei, aba lubeiti hóundaraguagüdün darandi milu wügüriña,14aba hounahóun wügüriña hagía Líwanu, diisi-milu wügüriña sagü hati. Ábatiha herederun wügüriña hagía aban hati Líwanu, bián hati hábiñe. Adonirámü, ligía arihubei lau wadagimanu.15Ñéinñanu giñe ǘrüwa-wein-diisi-milu anaagutiña, hama gádürü-wein-milu áchuahatiña wewe áraabu,16bóugudin hawéi ǘrüwa-milu-ǘrüwa-san ábutigu ha adundehabaliña nadagimeintiña.17Aba lóunahan urúei asagara óunwenbu burí dübü, dübü burí gebegiti luma dübü burí le aransehóuati lun tugudiname muna.18Aba haranseruni ábunagutiña ha lani Salomón hama lani Iramü fulansu luma dübü lun tábunawagun ténpulu.
Bible Society of Honduras