1 Krónikasi5
Ladügawagun Rubén
1Añahán lirahüñübaña Rubén le lígirama Hakobu: Anoku, Falú, Esürón luma Karümí. Rubén meha ígiramaübei le tímatimaati, gama lumoun féridi lumuti liricha keisi ígiramaü, ladüga lagamaridunu aban hádangiñe lubúaligu lúguchi, aba lásügürün irichaü ligía houn lirahüñü Hosé, le ábanya liráü Hakobu. Gama lumoun ñǘbuinti Hudá lun gabafubei lan hawéi líbirigu, aba láfuridun aban ábuti lídangiñe, gama lumoun lani meha Hosé irichaü keisi ígiramaü.4Ladügawagun Hoeli: Semaíasi, Gogu, Simí, Mikaíasi, Reaíasi, Baali, luma Beerá, le hábuti lánigu Rubén, le lanügübei Tigülátü-Pileserü le lurúeite Asiria adaürǘwa.7Líbirigu Beerá, según habürüdün liduheñu: Heieli, le furumiñeti, Sakaríasi8luma Bela le liráü Asasi, libari Sema le liráü Hoeli. Aba laganóun Bela Aroerü, aba lachawaragun lumúan darí Nebu luma Baali-meón.9Aba lerederun luéigiñe oubaü le ñéingiñe lubéi laboucha weyu, chülüti lumúan darí laru fulasu mageirawati, le agumeserubei lúmagiñe luéigiñe duna Éufüratesi, ladüga aba lan hagibedagun libiñanigu lóubawagu Galaadü.10Lidan lidaani larúeihan Saulu, awuribuhatiña lánigu Rubén hama tadügawagun Agarü, gama lumoun aba hagañeiruni lánigu Rubén wuribu aba herederun aganawa luéigiñe oubaü le ñéingiñe lubéi laboucha weyu libiti Galaadü.Ladügawagun Gadü
11Añahán ladügawagun Gadü ha meha aganóubaña hagibugiñe lánigu Rubén lubadu Basán, darí uburugu Salüká:12Hoeli, le furumiñeti, lárigiñe Hoeli, Safán, ñéingiñe Haanái, ñéingiñe Safatü.13Anihán hiri haduheñu: Mikaeli, Mesulámü, Sebá, Horái, Hakán, Sia, luma Éberü, sédüñanu.14Lirahüñü meha Abiaili sun ha, le liráü Urí, Uri liráü Haróa, Haróa liráü Galaadü, Galaadü liráü Mikaeli, Mikaeli liráü Hesisái, Hesisái liráü Hadó, Hadó liráü Busu.15Aí le liráü Abüdiéli libari Guní, ligía meha hábutibei liduheñu.16Aganawatiña meha sun hagía Galaadü, Basán, luma lidan burí lirahüñü aüdü, luma burí áraabu Sarón darí lumoun láfadaragun.17Sun hagía bürüwatiña lidan lidaaniwagu Hotamü, le lurúeite Hudá luma lidan lidaaniwagu Heroboamü le lurúeite Ísüraeli.Hawaguti bián türibu dimí
18Ladügawagun meha Rubén luma Gadü hama hamidan lani Manasési türibu, súdara meha ganigitiña hagía, anuhein sun tuwuyeri áruma hama ani aranserúatiña buidu lubá wuribu. Bián-wein-gádürü-milu-sedü-san-ǘrüwa-wein wügüriña ha aransetiña lubá wuribu.19Aba hageindagun hama tadügawagun Agarü, luma Heturu, Nafisi luma Nodabü;20gama lumoun aba líderaguniña Bungiu, aba hábürühan tadügawagun Agarü hama hapanaagu háhaburugun, ladüga hamuriahan luma Bungiu lamidangua wuribu lun líderaguniña. Aba líderaguniña Bungiu ladüga hemenigidun luagu.21Lárigiñe aba hanügüniña habiñanigu háganiñu, dimí-san-milu kameyu, bián-san-dimí-milu mudún hama bián-milu burigü. Barütiña giñe san-milu gürigia keisi adaürǘtiña.22Saragu haña áganiñu óunwegutiña, lugundun wuribu ligía luéigiñeti lóubadina Bungiu. Ábati herederun aganawa lidan burí fulasu ligía darí lumoun lidaani hasagarawagun hageiragiñe.23Aganawatiña ladügawagun lamidan lani Manasési türibu lidan fulasu le lúmagiñebei Basán darí Baali-erümón, Senirü luma wübü Erümón, lugundun gíbetiña meha.24Añahán hábutigu haduheñu: Éferü, Isí, Elieli, Asüriéli, Heremíasi, Odawíasi luma Hadieli, sun hagía, súdaragu ganigitiña, wügüriña díseti laganbahoun hawagu ani hábutigu haduheñu.25Gama lumoun aba hiñuragun houngua luagun Habungiute hagüchagu, aba háhuduragun houn habungiutegu gürigia ha meha lagünrinchagubaña Bungiu, áfaragualaña hagibugiñe.26Ligía línchahanbalin Lubungiute Ísüraeli Pulu, le lurúeite Asiria, lememe Tigülátü-pileserübei, aba lasagaruniña lánigu Rubén, lánigu Gadü hama hamidan lani Manasési türibu hageiragiñe: Aba lanügüniña uburugun, Ala, Aworu, Ará luma duna Gosán le ñein habéi dagá lumoun dan le.Bible Society of Honduras