2 পিতর1
1আং শিমোন পিতর, যীশু খ্রীষ্টনি দাস আরৗ প্রেরিত, জাইফ্রা ধৗরৗমিয়া ঈশ্বৗর আরৗ বাছাইগিরি যীশু খ্রীষ্টজৗং আরৗ জৗংজৗং লৗগৗছে দাম গৗছা ফৗথাইনায়খৌ মৗনবায়, বিছৗরনৗ আঙৗ বে লাইজামখৌ লিৎহৎদৗং।2ঈশ্বৗর আরৗ ফৗরবু যীশুনি জ্ঞাননি গেজেরজৗং নৗংনি অনুগ্রহ আরৗ শান্তিয়া গৗবাং জাথৗং।3জাইয়া গাওনি মহিমা আরৗ মৗজাংখৌ জৗংনৗ হৗনৗ জৗংখৌ লিংহৎবায়, বিনি সম্পর্কয়াও জৗংনি জ্ঞাননি গেজেরজৗং ঈশ্বৗরনি বৗলৗয়া জৗংখৌ ধৗরৗমিয়া জীবন যাপন খৗলামনৗ থাখৈ গাছেনবৗ নাংগৌখৌ হৗয়ৗ।4মানৗনা বে জিনিসফৗরনি থাখৈ বিয়ৗ জৗংনৗহায় বিনি মহান আরৗ দাম গৗছা সিমানফৗরখৌ হৗদৗং, জাহাথে জৗঙৗ গাজ্রি লুবৈনায়নি দ্বারৈ সংসারনি লুবৈনায়নিফ্রায় রক্ষা মৗনান ঈশ্বৗরনি আখল-আখু বাদি জানৗ হানায়।5আরৗ বে কারননি থাখৈ, নৗংছৗরৗ ফুরা আগ্রহী জানানৈ ফৗথাইনায়াও মৗজাং আখল, আরৗ মৗজাং জ্ঞান,6আরৗ জ্ঞান, আরৗ গাওখৌ হমথানায়, নাংঠাবনায়, আরৗ ঈশ্বৗর ভক্ত,7আরৗ ঈশ্বৗর ভক্তনি আখল-আখুয়াও বিদা-ফংবায়ফৗর বাদি অনজ্লাইদৗ, আরৗ বিদা-ফংবায়ফৗর বাদি অনজ্লাইনায়াও গৗসৗমানিজৗং অন্নায়খৌ নাজাও।8মানৗনা বে আখলফ্রা নৗংছৗরনিয়াও থাব্লা, আরৗ বে আখলফ্রা নৗংছৗরনিয়াও বাংলাংব্লা, জৗংনি ফৗরবু যীশু খ্রীষ্টখৌ মিথিনায়াও নৗংছৗরৗ মাওছৗগ্রা আরৗ বিথাই থাইছৗগ্রা জানায়।9নাথায় জাইয়া বেফৗর আখলফ্রা গৈয়া, বিছৗরৗ গৗজানখৌ নুহৎনা আরৗ খানা, বাওজৗববায় যে বিছৗরৗ বিছৗরনি গৗডৗনি পাপনিফ্রায় ছুস্রাংজাবায়।10বিনিখাইনৗ, ও বিদা ফংবায়ফৗর আরৗ বিনানাওফৗর ঈশ্বৗরজৗং লিংজানায় আরৗ বিজৗং সাইখ'জানায়খৌ গৗগৗমৈ লাখিফ্লাইনৗ থাখৈ গৗসৗমানিজৗং নাজাদৗ, মানৗনা নৗংছৗরৗ বেখৌ মাওব্লা, ছৌখুঠুনায় অৗঙা।11আরৗ বেবাদিনৗ মাওব্লা, জৗংনি ফৗরবু আরৗ বাছাইগিরি যীশু খ্রীষ্টনি জৗবনৗ গৈয়ি রাইজৗয়াও হাবনৗ নৗংছৗরনৗ ঠাল্লায়ৈ একথিয়ার হৗনায় জানায়।12বিনিখাইনৗ আঙৗ নৗংছৗরনৗ বেফৗর জিনিফৗরখৌ গৗসৗখাংফ্লাইহৗনায়, নৗংছৗরৗ যদিও বেফৗরখৌ মিথিখাগৌ, আরৗ নৗংছৗর নাজাওনায় নংগৌয়াও গৗগৗমৈ দংব্লাবৗ।13আং সান্নৗ যে জেব্লাসিম আঙৗ বে দেহানি থাম্বুয়াও থানায় অব্লাসিম নৗংছৗরখৌ গৗসৗখাংহৗনৗ হানায়া ঠিক।14মানৗনা আঙৗ মিথিগৌ জৗংনি ফৗরবু যীশু খ্রীষ্টআ, আংনৗ রাইঠিনায় বাদি আঙৗ বে সংসারনিফ্রায় গৗখ্রৈ থাংনাংনায়।15আরৗ আঙৗ হাজাছে নায়নৗ হাস্থাইনায় যে আং থৈনায়নি উনাওবৗ নৗংছৗরৗ বেফৗরখৌ জেব্লাইবৗ গৗসৗখাংনৗ হানায় বাদি।16জৗঙৗ ফৗরবু যীশু খ্রীষ্টনি বৗলৗগ্রা ফৈগৌনি সৗমৗন্দৈ নৗংছৗরখৌ বুঙামৗন অব্লা জৗঙৗ চালাকয়ৈ দৈহুননায় সলকবাট্টাফৗরনি উনাও থাবায়াখৈ, নাথায় বিনি মহিমাখৌ জৗঙৗ গাওনি মগনজৗং নুদৗং।17বিয়ৗ বিফা ঈশ্বৗরনি ফ্রায় মান আরৗ মহিমা মৗন্দৗং জেব্লা বয়নিখ্রুয়বৗ দেৎসিন মহিমানি ফ্রায় বিনি সৗদৗব ফৈদৗং, “বিনৗ আংনি অনজাগ্রা বিসা হৌয়া বিজৗংনৗ আঙৗ খুশি জায়ৗ। বিনি খৗথাখৌ খৗনাছং।”18স্বৗর্গৗনিফ্রায় বুংহৎনায় বে রাওখৌ জৗং জৗংনৗ খৗনাদৗং, বে সমাও বিজৗং লৗগৗছে জৗঙৗ গৗথার হাজৗয়াও দংমৗন।19আরৗ নবিফৗরনি বুংলাংনায় খৗথায়া জৗংনি সিগাঙাও নংথারগৌ হৗন্নানৈ রাসিন সৈথৗ জাবায়। সান হাবনায় আরৗ ফুংনি অলংবারনি স্রাঙা নৗংছৗরনি গৗসৗয়াও নুজায়াগৌমানি বে নবিফৗরনি খৗথায়ানৗ খৗমসিয়াও স্রাং হৗগ্রা বাতি হৗন্নানৈ নৗঙৗ বেখৌ গৗসৗহৗব্লা মৗজাং জানায়।20সিগাঙাও বয়বৗ নৗংছৗরৗ মিথিনানৈ লা, শাস্ত্রনি খৗথাখৌ রাওবৗ নবিয়া গাওনি গৗসৗনি সান্নায়জৗং অনুবাদ খৗলামনৗ হায়া।21মানৗনা নবিনি বুংনায়া মানসিনি সানখাংনায়জৗং জায়াখৈ, গৗথার জিউনি দৈদেনজানানৈ মানসিফ্রা ঈশ্বৗরনি বুংনায় খৗথাখৌছৗ খৗথাদৗং।
The Seed Company