1 থিষলনীকীয়4

1বিনিখাইনৗ, জৗবথানাইয়াও বিদা-ফংবায়ফৗর আরৗ বিবো-বিনানাওফৗর, দা জৗঙৗ ফৗরবু যীশুনিয়াও নৗংছৗরখৌ গৗসৗ সিংনিফ্রায় খাওলায়ৗ, মাব্রৈ ঠাংনানৈ থানানৈ ঈশ্বৗরখৌ সন্তুষ্ট খৗলামনৗ নাংগৌ, বে বিষয়ৈ নৗংছৗরখৌ ফৗরৗংদৗংমৗন, আরৗ নৗংছৗরৗ থাবায়বৗদৗংবৗ, বিবাদিনৗ বিনিখ্রুই সাবসিননৈ থাবায়দৗ।2মানৗনা ফৗরবু যীশুনি একথিয়ারজৗং যে ফৗরৗংথাইফৗরখৌ জৗঙৗ নৗংছৗরনৗ হৗবৗদৗং, বেখৌ নৗংছৗরৗ মিথিগৌ।3ঈশ্বৗরনি গৗসৗয়া বেনৗ, যে নৗংছৗরৗ গৗথার জা, বিনিখাইনৗ গাছেন জিনাহারি খৗলামনায়খৌ নৗংছৗরৗ এংগার।4আরৗ গৗথারৈ আরৗ মান গৗনাঙৈ থানৗ, নৗংছৗরৗ সাফ্রৗমবৗ গাও গাওনি দেহাখৌ হমথানৗ ছৗলৗংদৗ।5আরৗ ঈশ্বৗরখৌ জাইফ্রা মিথিয়া, বি গুবুনহারিফৗর বাদি নৗংছৗরৗ মৗদৗমনি থাখৈ বান জিনাহারি পাপফৗরখৌ খৗলামনৗ লুবৈনায় ফৗরবাদি জানৗ নাঙা।6বে বাথ্রায়াও রাওবৗ গাওনি বিদা-ফংবায়নি আরৗ বিবো-বিনানাওনি বিরুদ্ধনাও গৗরৗন্থি দা মাওথৗং এবা বিখৌ দা ঠগায় থৗং। মানৗনা জৗঙৗ সিগাঙাওনৗ নৗংছৗরখৌ বুংখাদৗং আরৗ সাবধান খৗলামখাদৗং যে ফৗরবুআ বেফৗরবাদি পাপনি থাখৈ সাজা হৗনায়।7মানৗনা ঈশ্বৗরা জৗংখৌ অধৗরৗমিয়া জানানৈ থাবায়নৗ লিংহৎনাখৈ, নাথায় গৗথার জানানৈ থাবায়নৗছৗ লিংহৎদৗং।8বিনিখাইনৗ, জাই মানসিয়া বে ফৗরৗংনায়খৌ (সৗলৗংথায়খৌ) এৎগারৗ, বিয়ৗ মানসিখৌ এৎগারদৗং বে অৗঙা, নাথায় ঈশ্বৗরখৌছৗ এৎগারৗ জাইয়া নৗংছৗরনৗ গাওনি গৗথার জিউখৌ হৗয়ৗ।
9দা, গাওজৗং গাও অনজ্লাইনায়নি বিষয়ৈ জৗংনে নৗছৗরনিয়াও লিৎনাংগৌ গৈলিয়া, মানৗনা গাওজৗং গাও অনজ্লাইনায়নি বাথ্রাখৌ ঈশ্বৗরা গাওনৗ নৗংছৗরখৌ ফৗরৗংখাবায়।10আরৗ নংথারগৌ, নৗংছৗরৗ নৗংছৗরনি অনজ্লাইনায়খৌ ম্যাসিডোনিয়া হাদৎনাও থানায় গাছেন বিদা-ফংবায়ফৗর আরৗ বিবো-বিনানাওফৗরখৌ দিন্ঠিবায়, অব্লাবৗ নৗংছৗরখৌ জৗঙৗ গৗসৗ সিংনিফ্রায় খাওলাইয়ৗ জাহাথে নৗংছৗরনি বে অন্নায়া দানিখ্রুই রাসিনছাও রাসিন জালাংথৗং হৗন্নানৈ।11সিগাঙাও জেরৈ বাদি জৗঙৗ নৗছৗরখৌ বুংদৗংমৗন, বিবাদিনৗ শান্ত জীবন যাপন খৗলামদৗ, গাও গাওনি খামানিয়াও ব্যস্ত থাদৗ আরৗ গাও গাওনি আখাইজৗং মাওনানৈ খামায়নৗ গৗসৗ গুদুং জাদৗ।12জাহাথে নৗংছৗরনি সানফ্রৗমবৗনি জীবন যাপন খৗলামনায়নি গেজেরজৗং গুবুন সমাজনি মানসিফৗরনিফ্রাইবৗ সন্মানখৌ মৗন্নায় আরৗ নৗংছৗরহা গাওনি নাংগৌফৗরনি থাখৈ রাওনিছায়াওবৗ সিনাৎনাংনায় অৗঙা।
13নাথায় ও বিদা-ফংবায়ফৗর আরৗ বিবো-বিনানাওফৗর, জাইফ্রা থৈনানৈ থাংবায়, বিছৗরনি বিষয়ৈ নৗংছৗরৗ মিথিয়ালাবা থানায়খৌ জৗং লুবৈয়া, নৗংছৗর যেন (জাহাথে) আশা গৈয়ি গুবুন মানসিফৗর বাদি দাহা খৗলামা।14মানৗনা জৗঙৗ ফৗথাইয়ৗ যে যীশুআ থৈবায়, আরৗ থৈনায়নিফ্রায় ঠাংখাংফিনবায় হৗন্নানৈ, আরৗ বেবাদিনৗ জাইফ্রা বিখৌ ফৗথাইনানৈ থৈলাংনায়ফৗরখৌ ঈশ্বৗরা যীশুজৗং লৗগৗছে লাবৗফিন্নায় হৗন্নানৈ জৗঙৗ ফৗথায়ৗ।15মানৗনা জৗঙৗ ফৗথায়ৗ যে ফৗরবুনি বৗচৗননিফ্রায় নৗংছৗরনৗ বেখৌ খৗথায়ৗ যে, জৗঙৗ জাইফ্রা বে সমসিম গৗঠাঙৈ দং, জাইফ্রা ফৗরবুনি ফৈফিননায় সমসিম ঠাংনানৈ থানায়, বিছৗরৗ মাবাব্লাবৗ থৈনানৈ থাংনায় মানসিফৗরনি সিগাং বিজৗং লৗগৗমৗননায় অৗঙা।16মানৗনা ফৗরবুআ গাওনৗ গেদেৎ হুকুমহৗনায়জৗং, গাহায় আরফ'নি গৗব্রাবমৈ গাব্জ্রিনাইজৗং, আরৗ ঈশ্বৗরনি ফেমফা ছুনায়জৗং লৗগৗছে স্বৗর্গৗনিফ্রায় অৗংখাৎবৗনায়, আরৗ খ্রীষ্টখৌ ফৗথাইনানৈ থৈনায়ফ্রা সিগাং ছিখাংগ্রৗনায়।17বিনি উনাও, জৗঙৗ জাইফ্রা গৗঠাঙৈ দাসিমবৗ দৗনজানায়, নখ্রাঙাও ফৗরবুখৌ লৗগৗ লাহৈনৗ বিছৗরজৗং লৗগৗছে জৗমৈয়াও লাংখৗজানায়। আরৗ অরাই সমনি থাখৈ জৗঙৗ ফৗরবুজৗং লৗগৗছে থানায়।18বিখাইনৗ, বে গাছেন খৗথাফৗরখৌ বুংনানৈ নৗংছৗরৗ গাওজৗং গাও সান্তনা হৗজ্লাইদৗ।

The Seed Company

https://app.library.bible/content/4e52604fbda8b59f