1 যোহন2
1আংনি আংগৗ বিসাফৗর, আঙৗ বেখৌ নৗংছৗরনৗ লিৎহৎদৗং জাহাথে নৗংছৗরৗ পাপ মাওয়া। নাথায় যদি ছৗরবা পাপ মাওয়ৗ, জৗংনি জানানৈ বিফানিয়াও-খাওলায়নৗ সাছে উখিল দংখায়ৗ, বিয়ৗ বে ধৗরৗমিয়া যীশু খ্রীষ্টআনৗ।2বিয়ৗ জৗংনি পাপফৗরখৌ প্রায়শ্চিত্তনি থাখৈ বুলি হৗবায়, আরৗ জৗংনি থাখৈ বান অৗঙা নাথায় সংসারনি বয়নিবৗ পাপফৗরনি থাখৈ।3জৗঙৗ মিথিগৌ যে জৗঙৗ যদি বিনি আদেশফৗরখৌ মানিয়ৗ অব্লা জৗঙৗ বিখৌ মিথিগৌ।4ছৗরবা বুঙৗব্লা, “আং বিখৌ মিথিগৌ,” নাথায় বিনি আদেশফৗরখৌ মানিয়াব্লা, বিয়ৗ ছৗলৈগ্রা আরৗ বিনিয়াও নংথারগৌ গৈয়া।5নাথায় যদি ছৗরবা বিনি খৗথাফৗরখৌ মানিয়ৗব্লা, ঈশ্বৗরনি অন্নায়া নংথারগৌ বিছৗরনি গেজেরাও ফুরা জায়ৗ। বেখৌ হায় জৗঙৗ মাব্রৈ মিথিগৌ যে জৗঙৗ বিনিয়াও ঠাংনানৈ দং।6ছৗরবা বিনিয়াও থানায়নি দাবি খৗলামব্লা, জেরৈ যীশুআ খৗলামা মৗন বিবাদি জীবন যাপন খৗলামথারনাংনায়।7আংগৗ লৗগৗফৗর, আং নৗংছৗরনৗ গৗদান আদেশ লিৎনাখৗছৈ, নাথায় জাজেন্নায়নিফ্রায় নৗংছৗর খৗনাবৗনায় বে গৗজাম আদেশখৌনৗ। বে গৗজাম আদেশনি বাথ্রাখৌনৗ নৗংছৗরৗ খৗনাদৗং।8অব্লাবৗ আং দা নৗংছৗরনৗ গৗদান আদেশ লিৎনাইয়া, খ্রীষ্টনি জীবন আরৗ নৗংছৗরনি জীবনা বে নংগৌখৌ দিন্ঠিয়ৗ, মানৗনা খৗমসিয়া জৗবলাংদৗং আরৗ নংথারগৌয়ৈ স্রাঙা সিগাঙাওনৗ জৗংসাৎবায়।9ছৗরবা দাবি খৗলামৗব্লা আঙৗ স্রাঙাও দং নাথায় গাওনি ফংবায় কিন্বা বিনানাওখৌ মুগৈয়ৗব্লা, বিয়ৗ দাবৗ খৗমসিয়াওনৗ দং।10ছৗরবা গাওনি ফংবায় আরৗ বিনানাওখৌ অন্নৗব্লা, বিয়ৗ স্রাঙাও থায়ৗ, আরৗ বিনিয়াও বিখৌ ছৌখুঠুনায় খৗলামনায় অৗঙা।11নাথায় ছৗরবা গাওনি ফংবায়ফৗর কিন্বা বিনানাওফৗরখৌ মুগৈয়ৗ, বিয়ৗ খৗমসিয়াওনৗ থায়ৗ আরৗ খৗমসিয়াও থাবায়ৗ আরৗ বিয়ৗ গাও ববেহা থাঙৗ, বেখৌনৗ মিথিয়া; মানৗনা খৗমসিয়া বিখৌ খানা খৗলামবায়।12আংনি আংগৗ বিসাফৗর, আং নৗংছৗরনৗ লিৎদৗং, মানৗনা বিনি মুঙৈ নৗংছৗরনি পাপফৗরনি হিসাবমা ক্ষমা হৗজাবায়।13বিফাফৗর, আঙৗ নৗংছৗরনৗ লিৎহৎদৗং, মানৗনা জাইয়া জাজেন্নায়নিফ্রায় দং, বিখৌ নৗংছৗর মিথিনায়খায়, আঙৗ নৗংছৗরনৗ লিৎহৎদৗং। জৗহৗলাওফৗর, নৗংছৗরৗ গাজ্রি সাছেখৌ ফেজেনবায়খায়, আঙৗ বেখৌ নৗংছৗরনৗ লিৎহৎদৗং।14আংনি বিসাফৗর, আঙৗ নৗংছৗরনৗ লিৎহৎদৗং, মানৗনা নৗংছৗরৗ বিফাখৌ মিথিগৌ, বিফাফৗর, আঙৗ নৗংছৗরনৗ লিৎহৎদৗং, মানৗনা জাইয়া জাজেন্নায়নিফ্রায় দং, বেখৌ নৗংছৗরৗ মিথিগৌ। জৗহৗলাওফৗর, আঙৗ নৗংছৗরনৗ লিৎদৗং, মানৗনা নৗংছৗরৗ বৗলৗগ্রা, ঈশ্বৗরনি খৗথায়া নৗংছৗরনিয়াও থায়ৗ, আরৗ নৗংছৗরৗ গাজ্রি সাছেখৌ ফেজেনবায়।15নৗংছৗরৗ সংসারখৌ কিন্বা সংসারাও জায়খিয়া জিনিসফৗরখৌ অন্নৗ নাঙা। ছৗরবায়া সংসারখৌ অন্নৗব্লা, বিছৗরনিয়াও বিফানি সত্যয়া গৈয়া।16সংসারাও গাছেনখৌবৗ এরৈবাদি মৗদৗমনি লুবৈনায়, মগননি লুবৈনায় আরৗ জৗংনে যে বিষয় দং বিখৌনৗ ডুগা খৗলামনায়, বে গাছেনবৗ বিফানিফ্রায় অৗঙা, নাথায় সংসারনিফ্রায়সৗ ফৈয়ৗ।17বে সংসার আরৗ বে লুবৈনাইয়া থৈলাংবায়, নাথায় জাইয়া ঈশ্বৗরনি গৗসৗ বাদি মাওয়ৗ, বিয়ৗ জেব্লাইবৗ থায়ৗ।18বিসাফৗর, জৗবনায় সময়া খাঠৈ জাবায়, আরৗ জৗরৈ নৗংছৗরৗ খৗনাখাবায় যে খ্রীষ্টশত্রুআ ফৈদৗংছৈ আরৗ দানৗ খ্রীষ্টশত্রুআ গৗবাং নুজাফৈখাবায়, বেজৗংনৗ জৗবনায়নি সময়া খাঠৈছৈ হৗন্নানৈ জৗঙৗ মিথিয়ৗ।19নংথারগৌয়ৈ বিছৗরৗ জৗংনি দলনি অৗঙা মৗন, বিনিখাইনৗ বিছৗরৗ জৗংনিফ্রায় অৗংখাৎলাংবায়, মানৗনা বিছৗরৗ জৗংনি দল মৗনব্লা, বিছৗরৗ জৗংজৗং থানায়মৗন। নাথায় বিছৗর জৗংনিফ্রায় অৗংখাৎলাংনায়জৗং বিছৗর রাওবৗ জৗংনি দলনি অৗঙা মৗন হৗন্নানৈ, বেখৌ রৗখায়ৈ দিন্ঠিয়ৗ।20নাথায় নৗংছৗরৗ গৗথার মৗনছেনিফ্রায় অভিষেক মৗন্দৗং, আরৗ নৗংছৗরৗ গাছেনবৗ নংগৌখৌ মিথিগৌ।21নৗংছৗরৗ নংগৌখৌ মিথিয়া হৗন্নানৈ আঙৗ লিৎবায়, বে অৗঙা, নাথায় নৗংছৗর মিথিখাগৌখায়সৗ আঙৗ লিৎদৗং, আরৗ মানৗনা নংথারগৌনিফ্রায় ছৗলৈনায়া ফৈয়া।22ছৗলৈগ্রায়া ছৗর? বিয়ৗ জাইয়া অস্বীকার খৗলামৗ যে যীশুয়ানৗ মসিহ, বেবাদি মানসিয়ানৗ খ্রীষ্টশত্রুআ বিয়ৗ বিফা আরৗ বিসা সানৈখৌবৗ অস্বীকার খৗলামৗ।23মানৗনা ছৗরবায়া জাইয়া বিসাজ্লাখৌ অস্বীকার খৗলামৗ বিয়ৗ বিফাজৗং গৈয়া, জাইয়া বিসাজ্লাখৌ সিমান লায়ৗ বিয়ৗ বিফাজৗং দং।24জাজেন্নায়নিফ্রায় নৗংছৗরৗ জেখৌ খৗনাবায় বেফৗরখৌ গৗসৗয়াও লা। নৗংছৗরৗ বেফৗরখৌ গৗসৗয়াও লাখিয়ৗব্লা, নৗংছৗরৗ জেব্লাইবৗ বিসাজ্লা আরৗ বিফানিয়াও থানায়।25আরৗ বেনৗ জৗবনৗ গৈয়ি গৗঠাঙা, বেখৌনৗ জৗংনৗ বিয়ৗ জবান হৗখাদৗং।26জাইফ্রা নৗংছৗরখৌ গুবুন লামাজৗং লাংনৗ হাস্থায়দৗং, বিছৗরনি বিষয়ৈ খৗথা বুংনৗ আঙৗ বেখৌ নৗংছৗরনৗ লিৎদৗং।27নাথায় নৗংছৗরৗ খ্রীষ্টনিফ্রায় অভিষেকখৌ মৗনবায়, বিয়ৗ নৗংছৗরনিয়াও থানায়, নৗংছৗরৗ রাওজৗংবৗ ফৗরৗংজানৗ নাংনায় অৗঙা। মানৗনা বিনি জিউয়ানৗ নৗংছৗরনৗ মৗনফ্রৗমখৌবৗ ফৗরৗঙৗ, আরৗ বিনি ফৗরৗংনায়া নংথারগৌ, নংখাই অৗঙা। বিনিখাইনৗ জিউনি ফৗরৗংনায় বাদি খ্রীষ্টনিয়াও থা।28আরৗ দা, আংনি আংগৗ বিসাফৗর, জেব্লাইবৗ নৗংছৗরৗ খ্রীষ্টনিয়াও থা, বিয়ৗ জেব্লা নুজাফৈনায়, অব্লা জৗংনি ফুরা ফৗথাইনায়া আরৗ বিনি ফৈনায়াও লাজিনাঙা বাদি।29যদি নৗংছৗরৗ মিথিগৌ যে বিয়ৗ ধৗরৗমিয়া, অব্লা নৗংছৗরৗ বেখৌবৗ মিথি, সঠিক মাওগ্রায়াসৗ ঈশ্বৗরনি বিসা।
The Seed Company