Tasinɛ6

Jamɛ̃rɛ̃ Ɓeli labeenɛ linɛ Rɛnɛutɛ

1Kɛɗɔn n zɛ jamɛ̃rɛ̃ ɓeli vi gbete shɔ gau nya rɛnɛ atette vi manzii tɛ, n nta yeenya vi suru nɛ̃ɛ̃tiwi wɔ gbete kaa nya naa jallɛ, nɛ <<Apɛ!>>2N kɨnnɔɔ rɛ n zɛ gbɛntɛn puru. U shɔ gẽnɛ sã taa a naa, shɔ ãu salabu kpatitɛ. Shɛ naa shɔgbete ɗashariutɛ yɛ yɛɗɔu ɗashariuyɛ.
3Kɛɗɔn jamɛ̃rɛ̃ ɓeli labeenɛ linɛ rɛnɛ au pɛsiyɛ; ang nta vi suru au pɛsiyɛ shanɛ, <<Apɛ!>>4Gbɛntɛn wɔ shɛ sɔ̃nrɛ nweri. U shɔ gẽnɛ shɔ ãu kaka nɛu n ti sɨi a kotipi, aru shɔu nyɔki zɔ. Shɔ ãu zaalitɔ pɛ̃niba.
5Kɛɗɔn jamɛ̃rɛ̃ ɓeli labeenɛ linɛ rɛnɛ e taati rɛ; n nta vi suru e taati shanɛ,<<Apɛ!>> N kɨnnɔɔ rɛ n zɛ gbɛntɛn hɨmri. U shɔ gẽnɛ sã vi-vitesinɛ au naa.6N nta viwɔ kaa nya naa yeenya u ɗɔ anɛ atette visuru nɛ̃ɛ̃ti, au shanɛ, <<Waa visha gbete ayuu viɗɔnwanɛ leegbete, waa visha bale taati ayuu viɗɔnwanɛ leegbete. Ɔkɔɔ lɛsi nɔɔ zetunɛ a mii inabini!>>
7Kɛɗɔn jamɛrɛ̃ ɓeli vi rɛnɛ nɛ̃ɛ̃tiurɛ; n nta yeenya vi suru shanɛ, <<Apɛ!>>8N kɨnnɔɔ rɛ n zɛ gbɛntɛntɔ pusang-pusang. U shɔ gẽnɛ shɔ ɓau niinɛ vɔrɔ, kpati kotipi gɨu a knti maani. Shɔ ãyi kakarɛ nɛi sã vigbete atette vi nɛ̃ɛ̃ti a vi kotipi, i nyɔrɛ a nyaba sɨitaanɛ, nwo, vɔrɔbii, a viɓiliyini.
9Kɛɗɔn jamɛ̃rɛ̃ ɓeli virɛnɛ e maani rɛ, n zɛ shɔgbete shɔ nyɔkiyiyɛ suru a ntɔ laazã aru gbeteyi nwari shɔ Ɗanyaruubii a sisɨn gbete i shi au yuuniyɛ.10I ɓanya a kakani i shanɛ, <<Uɓeyelapa a vi tɛu kaka ɓayɛ, shɔ wɔsɔ-wɔsɔ a shɔ tɔ̃vɨn! A yɛ yeeri shɔ kotipi ayi tasiu raa i nyɔkiuyɛ ruu kɛpi ɗavi au yuuni viya?>>11Kopiya shɔ ãyi fãrã puru, shɔ geliyinɛ, nɛi susupɛ sekaa, setɛ i jawɛrɛyi a shɔ sisɨn ãnɛyi shɔ nyokitɛ kpai, naa shɔ nyoki wɔyi siyɛ.12N zɛ jamɛ̃rɛ̃ ɓeli virɛnɛ maangbete tɛ. Kɛɗɔn tipi ɓɛ pẽnɛba, a ɗa rii hɨmri naa fãrã hɨmri, shɛlɛ rii nweri kpai naa kpaa.13Sɛyi ɗɔɔ a tipi naa jaa sɨnti gbãnki ɗɔɔyɛ aɗagbete sɔrɔ kɛ shɛnɛ a gãgãniyɛ.14Konyasi nii rɛ naa shɔ livi, ko-pi kɔpɔ shɔpiya a tipi gbete mii kayɛ i gisi kati aɗɔgbete i si ɗɔnni.15Kɛɗɔn kpati kotipiyi, yupɛ̃ni gɔmnatiyi, a yupɛ̃ni sojayini, shɔvinaayi a kaka kiririyi, a shɔ gãsiyini piti kpai, fooyi a shɔgbeteyi ɓa fooyi ɓani, i ɓusiyi yuu a puru a gogotari a kɔpɔ kɔpɔ.16I ɓaa kɔpɔyi nya a tariyini nɛ, <<Ɔ zɨɨnɛ au bi a ɓusiyitɔ a shɔgbete ɔ̃ a lakpatin ɗekɨn ni, a jamɛ̃rɛ̃ sisɨn lɛsinɛni!17I lee sisɨn lɛsinɛu atɛ, piyɛ shidɔɔ pi leeuni piya?>>

The Word for the World International

https://app.library.bible/content/6fec21b499f7e625