Wos Ananun4
Fainda kosmai ro firnanemya
1Ne, romawa yena mko, mkomnaf navye wos farkarkor ro sinan kma mkovesi! Mkomamepen na, insa nari mko swarnanem.2Roi yafarkor faro mko nane navye napyum, inja mko kurpum awerna.3Fafisu yave kapira, romawa bonjos ro sinan ayesuya,4kamam fyarkor aya. Ikofen, “Waswarepen wos ananun ayena, wapok befnderna vaveri. Waserepen nako akyurfasna ayena, insa kenem bedi ifo kuker aski.5Ivye wasmai firnanem ma wafawi nanem! Waswarepen navye kaku wos ananun ayena ma wasawen awerna.”6Besyowi firnanemya, rarirya firnanemya nari ikadaun au; waswar kuf i, irya nari iwaren warek au insa kenem bedi iknon.7Roi eve fandun kaku insa wafrur veponya isoine besewar insa wasmai firnanemya. Rosai wayomna, vepon kakuya isoine besewar fa wasmai swarnanemya.8Besyowi firnanemya, irya nari ikanow nakaki kaku au. Waurepen i, irya nari idaw som faro au.9Nari vyuk ve au wower ai pampen vedoser ro vrumri.10Wamnaf ve aya, romawa yedi! Mamepen pyum wos ananun ayena, irya nari ras kenem bedi ikwan kaku.11Yafarkor ve au kwar firnanemya ma rari kenem venapesya.12Waso pyum na ido, royo nari idadwarek auva ro fafisu wambranya ma nari kwarkarva ro fafisu wafrarya.13Waswarepen vesyakwar wos farkarkor rosai wasmai kwar ro aya. Mamwarek pyum na, snar kuker wos farkarkor annane, irya nari nadaw kenem vepyum faro au.14Waso awer rari snonkaku vevarvorsya, ma waso farari awer frur sena.15Waryar bur nyan evesyani. Waso awer si. Vinkwan bur si ma wambran pdef!16Snonkaku vevarvorsya senef fasawva rofyor sifrur roi vevyeva vaim. Sivor senef rari rofyor sifrur fanor snonkaku vese vaim.17Varvor ma frur pakakrekya imnis raris anan ma aninem faro si.18Neyan snonkaku vevyevasya pyampan imnis remaryai. Skarkar ma sisapi imboi sifawiva. Ro varya, snonkaku vekenem pyumsya nyan simbran roya imnis ori vesampir; iyar fawas rao favye muma ido fyadameser.20Romawa yedi, mamepen wos ayenane! Wamnaf wos ananun ayena.21Wasawen awerna, imboi wadu na ro snembrido.22Snonkaku vekarapyum na sya nari sikenem ma sismai pararei.23Wepenpyum snembri, snar snembri iso vefaraser marandan kenem bedi.24Wawos roi vekakuva awer. Wasawen vinkwan bur au wos ankarkar ma wawos vefrur fa snonkakusya sivoryayena.25Ivyekada makabesuya susoyov monda roi venapes, ma mam kako faro roi vepyum.26Kwara pyum kaku rofyor wafrur vaim, irya roi kwara fa wafrurna nari wasmaina.27Vinkwan bur vavyevaya, ma wakenem kuker snevenapes. Wambransar bur awer nyan venapesya.The Seed Company