Wos Ananun24
--19--
1Snembri fyawe awer faro snonkaku vevarvor,ma be manivov awer kuker si.2Skara fa sifrir epen snonkaku vesema sawos monda roi vefnai marindi.--20--
3Kinaya vye vevawes kuker firnanem ma fawawiirya nari syambrav.4Kuker fawawiya, sim vyena sisernakuker arasai vekakur ma eve maeja.--21--
5Snonkaku vesmai firnanemya papoik vyedi isyadi snonkaku vesambravya;fawawiya isyadi ro samamvravi.6Farmamunya imbran baim iser kakara vemawes kaku resari,ma snonkaku vevuk swarusersya sibor ido, nari mbrovsya simufer.--22--
7Snonkaku vefawi rorova, firnanemya syamswen kaku faro i.Vye fasis monda fafisu eve vukorsya siryur fa sawos roi eve fandun.--23--
8Snonkaku vekara ker aw roi vevyevanari sap i ve snonkaku vefrur mbriwer.9Aw snonkaku vefawi nanemba vefrowes snonkaku fa sisapi irya sasar nairi,Snonkaku vefanfayaiker snonkaku vese, oserovaveri fa imariseni.--24--
10Swaruser bena namar ro fafisu marindi ido,nfasna vadir auma snonkaku vesambrav mankunba risau.--25--
11Kwor wanan awer fa per snonkaku vesasarva sun fa sive smun;faspar snonkaku sismer fa sun be mov sive smun ra imar.12Fyor wakofen vo wove, “Ayama yakna fanduno kukriva.”Imbape Allah myam epen au. Ifawi ma Kyara user swaruser bena. Myunsu faro snonkaku raris frur sena.--26--
13Romawa yedi, wan umber no, snar sipyum kaku.Snar umber vero naremsya san marnden kaku.14Rarirya firnanemya ipyum faro rur bedi.Fyor wasmai i kwar ido, ras varpon bedi iyarpyum.--27--
15Wamnis awer snokaku rari vevyeva veyaw favefasyar snonkaku kenem venapesya rum vyedi;16snar, snonkaku kenem venapesya isapi rarwan ri fumo wero, nari ikvawes kaver wer,imboi snonkaku rari vevyevaya nari kyarvaken ma vye mompraf kaku.--28--
17Waryav awer rofyor mbrov bedi ismai marindi,ma wamarisen awer rofyor isapi;18snar, Manseren Allah nari myam frur banine ma kyara au ve snonkaku vevyeva,muraido nari Imsor mbrov banya werva.--29--
19Wamsor awer faro snonkaku vefrur vavyevaya.Snembri fyawe awer faro snonkaku rari vekarfivasya;20snar snonkaku rari vekarfivasya ras varpon isya ve siva,imnis ra padamara vembrer.--30--
21Romawa yedi, wararyof monda faro Manseren Allah I, ma swom faro wairekya,Waso awer snonkaku eve mbrov si,22snar marindi Allah i orovaido wairek vyuk faro i imsinba,ma snonkaku evesya anya korpeser monda nari vye mompraf.Wos ananun evesena
23Snonkaku vefirnanem sikofen radine:Mankakaraya ipok myarvak ra var oser awer.24Rofyor vyuk sasar ve snonkaku vevarvoryava,nari snonkakusya sifrasi ma sawos ninyani.25Imboi mankakara vevuk sasar faro snonkaku vesasar idonari ismai aski ma sve syowi i.26Mundiri vevuk kankarem kuker wos venapesirya manivov vevye.27Fasos yaf bena vaim ma wasmai fararur vaim ido,farvuk awer ari.28Wawos kakuva awer faro min bedi kuker wawos veveknamba;wawos awer wos ankarkar vekur i.29Wakofen awer radine, “Raris ifrur yov aya, rarirya kako yakfrur yov i.Yamunsu faro snonkakuyo raris frur vyena ve aya.”30Ras oso yambranuk ro snonkaku vemyarenbaya yaf vyedima snonkaku vefawi nanembaya yaf anggur vyedi.31Ro yamam rodiyanya isoine asr borek ma ampyampumberma ayar vyena nkarvaken.32Yamam ma yakara user na ra posa idoyasmai farkarkorya ra dine:33Yakain yaper vramin fa yamnaisu, ma yakofen,“Ae, yavarek fasaw resari, ave yenef.”34Rarirya fafisu yenef kakerya, ananjarya ma savararya ifyafer aya,imnis snonkaku verama vefasyar aya kuker romamun.The Seed Company