Wos Ananun23
--6--
1Fafisu kwain wanan so snonkaku vebarara oso ido,mamepen pyum roivebor vero varpon bedi.2Wanambri rarisowero,rwun fandun bena.3Snembri isararan awer anan vemafen fyasos na,imbude ive vye na fa nafrowes au ndi.--7--
4Wamor vekandera awer fa nwa nana.Wambrer kakara banine.5Snar, kumpan besya nari korpeser monda vo sipromes,kumpan besya ryari prer sya sisur ro si, inja siswor ve nank iwaryas imnis mankankan.--8--
6Wanan so awer snonkaku veyanfarmbramsya.Snembri isararan awer rovean vemafen vyena.7Snar snonkaku evesya ani kyor epen fasis na ro sneri do.Ikofen ve au, “indo wan ma winem wer,” imboi sneri kyarfiva yov au.8Rosai wan kwar anna nari bai kaver na,ma wos vemarnden bena faro i ne faindava.--9--
9Wakofen farkor awer snonkaku venawnowerya;snar nari kyorwef wos vepyum bena.--10--
10Wamiser awer was vekwar ro saprop,ma fasyar awer saprop mnuk awak param sena.11Snar Manseren Allah irya mambewarek vepoik syadi,iso nari eve sano warek si.--11--
12Mamepen pyum kaku wos farkarkor na,ma wamnaf pyum farkarkor veyun fawawi.-- 12--
13Kwambru awer fa farkor romawa bedi.Nari imarva fafisu mun i kuker aprer.14Kakudam, muni kuker aprer,irya faspar rur vyedi bur mun aivuiya.--13--
15Romawa yedi au, firnanemya isya ro au idosneri iryav kaku.16Yaryav kakufafisu yamnaf wawos wos venapes.--14--
17Snembri fyawe awer faro snonkaku vesasarsya.Wararyof monda faro Manseren Allah I18insa ras varpon bedi imawes,ma kayaryar bena nadawer monda awer.--15--
19Wamnaf ve aya, romawa yedi! Ivyekada wafo kuker firnanem.Waknon ser au ma waso pyum kaku rari kenem venapesya.20Wakenem so awer snonkaku vemasarserma venambri sya.21Snar nari sisapi ro sovararya.Wenef ra dirya kwar ido, fyorova ido nari wafmar sansun eve kinak.--16--
22Wasoyuser sinan kmami, i evewar au sya ni.Rofyor sinan snami vye vinsar kwar, fasnai syowi bena faro i.23Ananun vekaku, firnanem, farkarkor,ma swarnanem nakame fandunfa ne vekoves, imbape ivye ne vevov awer.24Sinan kma oso iryav snar romawa vyedi ikenem kuker napnapes;romawa vesmai firnanem ifrur doryav kmari.25Ivye kada wafrur doryav sinan besuya;ivye kada vin vekapar aunya ifo kuker aski marisen.--17--
26Romawa yedi! Mam epen pyum kaku wawos ayenama wakenem raris mov yakenem raya.27Vin vevyeva vevov vinkundiirya denem veyun ve marindi.28Dores waf imnis manfasyarma ifrur fa snon sya sibor sefnder vin svuk si.--18--
29Wafawike roi vekur snonkaku veyinem war anggur sibor kaku,ma verepen ker swan vepakrek?Snonkaku anya ismai samswen ma marindi.Kyain rakrok ma fyafko vesyakwar.Mkassu sufanandik ma baken vyedi vye parpar,imboi roi nane kyara pyum riryakada nari dande bur na.31Mam mura ve war anggursya nawer,sisnai pyum kaku ma sposer sne ro syobis,seveyinem kuker andeidi.32Arwori fyas ido ryari ikako isos au,ifrur fa wasyur.33Mkamsi pyawe, swaruser bena narvarenma wawos sadadworek.34Ryari ausya ri pum padaren kapal ro sorenya faduri;vrumbri vye diwawai ma wambran farsapi.35Mura ido nari wakofen, “Rya ono siprer ma svaser aya,imboi yaswar kaver roi evesya annava.Ae, mkasi myarvak kaku!Yave fandun yinem anggur no wer!”The Seed Company