Wos Ananun19
1Snonkaku vesavarar imboi kenem venapes,ipyum syadi ro snonkaku veyankarkar ma venawnower.2Mayaryarenya ifranser fawawiyava ido, ipyumba;snonkaku vesawsaw nari ifrur sasar.3Snonkaku simbran sasar snar sifawi rorova,varpurya svuk sasar ve Manseren Allah I.4Snonkaku venana, manivov vyesya sibor kaku;snonkaku vesavarar manivov vyesya sibur i.5Snonkaku veyawos kakuva ro varpon mankakara, nari ismai samamyai,snonkaku veyawos ankarkar vesyakwar nari dande bur samamyaiva.6Snonkaku sibor sve sewar fa sifrur marisen snonkaku eve nasan;snonkaku sibor sve sewar fa se manivov snonkaku veyan navye.7Snonkaku vesavarar naek vyesya smamkyof i,naba syadi manivov vyesi.Vyesewar fa dakawos si,imbape sefanduniva.8Mundiri vesewar fawawi nanemya, irya iswar mankundi;ma mundiri vewasen epen rosai fyarkor kwar, nari ikenem kuker aski.9Snonkaku veyawos kakuva ro varpon mankakara nari ikfis bur samamyaiyava,snonkaku veyawos ankarkar vesyakwar nari imar.10Snonkaku venawnower isyusva fa ikenem kuker kamayai,ma kako mamfamyanya isyusva fa vyeparensa snoporya.11Snonkaku veswar nanem imasasor fasawva.Ismai ararer snar fyakman snonkaku vefrur sasar faro i.12Masasor wairek ifrur makak imnis singa kuv babo vesnirem;imboi frurpyum vyena namnis wawur vefamasi rokaker.13Romawa venawnower vyedar sinan kmari vye mompraf.Vin vefarvuk bekain rakrok imnis mekem vepaporem vemananaiva ro rum rido.14Rum ma arasai nairya var rarwas kosmai ro sinan kovesi,imboi swa veswarnanem irya vinManseren Allah vyuk ma ve ko.15Snonkaku vemananon imarisen denef vesyakwar,varpur mura snonkaku anya nari ibiser.16Snonkaku vesoyuser Allah sasoser Vyena, irya fyaduru kenem vyedi,imboi snonkaku eve rer na nari imar.17Mundiri vefnovek snonkaku vesavarar irya ifrur nyaki faro Manseren Allah I;nari Manseren Allah myunsu na faro i.18Waprer romawa bedi fafis ibava,mbaido nari ras nawama kenem vyedi vye mompraf.19Snonkaku vemasasor fasaw, nari ismai vavyevaya.Rofyor wafnovek i rarwan oser, nari vye fandun wafnovek i vesyakwar.20Rofyor wamarisen farkor ma wamnaf wos ananun,irya varpurya nari wafo kuker firnanem.21Snonkakusya skara aw nabor kaku ro sisnesna,imbape Manseren Allah aw Vyena naiso nari Ifrurna.22Rari vepyum nafnai-vedar fa snonkaku sibor simarisen.Savararya ipyum syadi ro ankarkarya.23Wararyof faro Manseren Allah I, nari wakenem kuker payamyum,nari wasmai kananon ma wakfis bur marindi.24Snonkaku vemananon bos kakuya;isu rovean ro svari monda pyapum bos kaku.25Snonkaku vemararesya sipreri inido, snonkaku vefawi karyonbaya ismai farkarkor.Snonkaku veswar nanemya sisonek inido nari iswar nanem syadi wer.26Romawa veprer ma veyau sinan vyesuya,irya romawa vefrur mamyai ma rari vyedi ivyeva.27Romawa yedi, rofyor wamewer wasmai farkarkor werdi,nari befnder rosai farkor kwar an na.28Snonkaku veyawos kakuva ro varpon mankakara, irya myamkyof sasoserya;frur ninyan snonkaku, irya marasrisen faro snonkaku rari vevyeva.29Samamyaiya fyasoskwar faro snonkaku vemarares,snonkaku venawnower nari ismai parader.
The Seed Company