Wos Ananun18
1Snonkaku vekenem ro mankundikyara monda fandun vyena;swaruser vebor ro snonkaku vese vevuk swaruser isawen pum na.2Snonkaku venawnowerya imewer ismai fawawiimarisen dawos monda rosai kyarana.3Kofrur sasar ido nari kosmai koryaye ro snokaku;kofrur roi vefrur mamyai ido nari kosmai anonef.4Wawos snonkaku imnis raris soren veramen,imbape wos firnanemya imnis marei vedaf.5Mankakaraya syasar rofyor iwaira snonkaku rari vevyeva,ma vyuk samamyai faro snonkaku vesasarvaya.6Snonkaku venawnower dawawos ido ifnai monda mbriwer,awawos vyena newari snonkaku sya ave smuni,7Wawos snonkaku venawnower nun vavyeva ve i;roi ikofenna nfes mankundi.8Fawar vekakuva nrok pyum kaku,snonkakusya simarisen srowerna.9Snonkaku eve rer fararur vyena,kyarfiva imnis snonkaku vemarisen vekakok.10Manseren Allah irya kaderen vekaki ma vedworem;snonkaku venapessya sra mura ro diwa ma sismai mov veknon.11Imbape snokaku venanasya skara vo sovo nana senaiso vekadaun siimnis ayar keru vekaki veyar warek kota.12Snonkaku vemararessya nari sisapi,snonkaku sne vekakivasya nari sismai som.13Wamnaf vaimbo kwarem veponirya wafawi royova ma nari waser anonef.14Snonkaku kenem veryav, nari vyarsonem marindi venyanem i;imbape kenem veryavya isyava ido, snekyar vebor vyenakam nadawer kako.15Sane snonkaku veswar nanem ismai fawawiya,ma kneram snonkaku swaruser veknon iryav ismai farkarkor.16Faferesya vyuk mkei faro snonkakufa isrow kuker snonkaku veba eve nasan.17Snonkaku veyawos rawer kaku ro raryur vave mankara, kyara vo dovo wawos vyenaiso vekakuna,imbape wawos vyena nari nevekara user fafisu mbrov vyedi ryama.18Kuker mnasen, fanfavriya imbrore,kako mbrov fandu snokaku vena papoiksya nari nambror kaku.19Naek kofrur fa sne fedufya syamswen kaku fa kofanam i isyadi ro kota vesambrav kaku;fanfavriya imnis asyopder ro kerwa veba kota siyar warek kuker fofen kerui.20Wawos vesasyar ro kosvasnanari nawarye ve mankunko.21Ramarya ismai papoik fa fyaspar kenem ine rova imkok i;snonkakuyo irya nari ismai sasuref ro rosai dawoskwar.22Mundiri vesmai vin kenem vepyum, irya ismai roi vepyum,swa vyedi Manseren Allah vin Vyuk ve i ndirya.23Snonkaku vesavarar fyararyor kuker sne vekakiva;snonkaku venana kyarem kuker marares.24Manivov vevyevasya sisya,imboi manivov kona ve karyersya sisyadi ro naek kovesi.
The Seed Company