Wos Ananun12
1Snonkaku veswar kuf faro fawawi, imarisen fa ismai wos sansonek;mbape snonkaku vemewer vemnaf wos sansonek irya snonkaku vefawi rorova.2Snonkaku vena rari vepyumsya sisyus faro Manseren Allah,mbape snonkaku veyankarkar nari sismai marindi.3Oso vaveri fa nari syambrav pdef kuker rari varvor vyena;mboi snonkaku venapes nari idworem, ma imyowva.4Vin vefawinanem iser sanandik ma sane vemarisen ro swa vyedi,vin vefrur mamyai swa vyedi imnis kaku dafduf veyanakuk kor sinan.5Snonkaku kenem venapes skara roi veyun payamyum;snonkaku vevarvor sya saw monda ankar frowes wanan.6Wawos snonkaku vevarvor nafnai marmar;wawos snonkaku venapes nfaspar snonkaku.7Snonkaku vevarvor nari simufer ma simar ra sefromo;imbape snonkaku venapes nari skain nako sikapar siryewen.8Snonkaku sismai ararer snar swarnanem sena;snonkaku sismai anonef snar fawi rorova sena.9Ivye komnis snonkaku vemankasva imboi kofararur faro mankun ko,ipyum syadi ro kofrur ve snonkaku eve nasan mboi kananjar nanan.10Snonkaku venapes fyadurupyum rofanfan vyesi;imbape snonkaku evarvor vyeninyan si.11Manamom vefararur marvak ro yaf vyena ismai roveyan nabor,vape snonkaku vesawen fafisu faro roi eve faindava irya snonkaku vefawi nanemba.12Snonkaku evarvor sneri fyawe nana snonkaku kenem vekarfiva sena;snonkaku venapesya imnis raris ai knam vemarem vevuk bon.13Snonkaku evarvorsya wos vekarfiva sena namnis denem vefor mankun si;snonkaku venapes sikfisbur neyan samswen.14Snonkakusya sismai sasuref raris wawos ma frur sena;vavyak faro si namnis raris roi sifrur kwarna.15Snonkaku vefawi nanembaya vyavir mankundi ve snonkaku vefrur sasarva,imboi snonkaku vemarisen vemnaf farkarkor, irya snonkaku vefirnanem.16Snonkaku vefawi nanembaya sneri ipraper ido, fafis anya veri dawos sneduf vyena;imboi snonkaku swaruser veknon vye fandunba fafisu ismai anonef.17Snonkaku venapes, fyawar roi vekaku ro varpon mankakara,imboi snonkaku kenem venapesva, fyawar monda wos ankarkar.18Wawos pusmar imnis rorabi vewanuk sane;wawos vekaku namnis raris aryawin vevuk pararei.19Wawos vekaku nari nkain fioro-fioro,imboi wos ankarkar nari fyorova namyomen.20Snonkaku veyau frur vevyeva sneri ifo kuker ankarkar;mbape snonkaku veyau payamyum sisma marasrisen.21Snonkaku venapesya nari ismai marindiva ,snonkaku vevarvor ismai ananjar vesyakwar.22Manseren Allah vye mbrov snonkaku veyankarkarsya;imbape Imarisen faro snonkaku rari venapessya.23Snonkaku swaruser veknon ikram fasis fawawi vyena;mbape snonkaku venawnower fyasnai bos fawi nanemba vyena.24Wafararur nasrawen ido, irya nari besnopor;imbape mananonya ifnai vedar vave manfyan.25Sane vekamanen pyankar samambrav,wos vemyaren nbuk doryav.26Snonkaku venapes myam farfir manivov vyesi;imbape snonkaku evarvorya dun snonkaku ve nyan vesunkarkir.27Snonkaku vemananonya nari ismai roi syewar nava;kuker fararur marvak snonkaku sismai arasai nabor.28Snonkaku vembran ro neyan venapes nari ikenem kuker aski;snonkaku vembran ro neyan vevyeva imbranyov marmar.
The Seed Company