Wos Ananun11
1Manseren Allah imsor snonkaku vekif wankyara veradaduimbape iryav kaku faro snonkaku veyuf wankyara vekakudam.2Snonkaku vemarares nari sisma anonef;snonkaku verun mankunsya sirya snonkaku vena firnanem.3Snonkaku rari vepyumsya napnapesya fyarkinsi;snonkaku veyawos ankarkar nari vye mompraf snar ankarkar vyena.4Fafis komar, arasai vebor ne faindava;imbape kakakuya nari fyaspar snonkaku bur marmar.5Snonkaku kenem venapessya imbran ro neyan vepyom snar napnapes vyena,imbape snonkaku vevarvorya kenem vyedi vyemomprafe.6Snonkaku venapes ismai faspar snar saso asuser vyena;snonkaku veyankarkar isapi ro denem snar an nambri vyena.7Snonkaku vevarvorya imarido, sanekayar vyenakam namar;naba syadi kyara fa nari ismai nana nabor.8Snonkaku kenem venapes nari dande bur samswenya;imbape snonkaku vevarvor ismai ananjar.9Fawar snonkaku vevarvor nafnai marmar faro snonkaku min vyesi,imbape snonkaku venapes ismai faspar snar fawinanem vyena.10Kotaya ifo kuker doryav marisen rofyor snonkaku kenem venapesya ismai kamayai;imbape snonkaku vevarvorya imar ido kawasasya simarisen syadi.11Vok snonkaku venapes nbawes kotaya fa iryewen ma imbrar ve varpon;imbape wawos snonkaku vevarvor sya sena nafrur mkok kota.12Mansei vekoryaye min vyedi, ifawi nanemba veri;snonkaku vefawi nanem, kyain fasis monda, iwos famfnomba.13Snonkaku vefamfayai abar vekakuva ikram woskunes nava,imbape snonkaku vesmai kayaryarya ikada fyamrum wos vevyeva.14Manfarkinya isyava ido er vebaya nari ivesisye,imboi snonkaku vevuk wos ananun sibor ido, kankenem vepyumya isya kako.15Wafrur ap fa nari bak pyan snonkakuyo nyaki vyena ido, nari vyedar fa wasmai marindi.ipyum syadi wafrur radirya nawer insa wakenem kuker kananon.16Vin vevesyowi ismai ararer;snonkaku vevarvor iryur monda arasai.17Snonkaku evenavye vesyakwar nari ismai sasuref;imbape snonkaku evarvor vye ninyan mankundi.18Snonkaku vevarvor iryur arasai vemyomen,mbape snonkaku vevuver kakaku ismai sasuref vekain fiorobis.19Mundiri vefrurpyum vesyakwar, nari ikenem kuker aski;imbape mansei veyom vavyevaya, imbran yov marmar.20Manseren Allah vye mbrov snonkaku sne vevarvor sya,imboi iswar snonkaku sne venapes sya.21Kakudam, snonkaku vevarvorsya sikfisbur vave ninyanyava;snonkaku kenem venapes nari sismai faspar.22Vin vedoser imboi rari vepyumbaimnis rofafyai brawen ro randip snonipoi.23Snonkaku venapes fandun sena nadaw roi vepyum,imbape snonkaku vevarvorsya roi sefandun isoine masasorya monda.24Snonkaku veyan bo vevov, nana vyena nfanfanfon vesyakwar,Snonkaku veyardu nana vyena nari syovarar.25Mundiri verarwas vok vyena ido nari ismai kamayai,snonkaku vemarisen vefnovek min vyesi nari ismai fanfnovek kako.26Mansei veyardu fasis pokem, isma fras ro snonkakusya;imboi snonkaku vevovya, nari iser ararer.27Mansei vefrur pyum vesyakwar nari kawasa vebor simariseni;mbape mansei vesewar vavyevaya nari samswenya inyanem i28Mansei vekyar faro nana vyena nari irwu imnis airam vemas;snonkaku rari venapes nari isur imnis kpiwer babo.29Mundiri vefrur mkok kina vyedi, nari daksmai royova ro nana kina vyedi;snonkaku vefawi nanemba nari vye manfyan faro snokaku vefawi nananemya.30Snonkaku venapes imnis aiknam kankenem;snonkaku vefirnanem kawasa sibor nari siso i.31Snonkaku venapes sya nari sismai sasuref kako fafis sisya kaker ro supswan ine,snonkaku vevarvor ma vesasarsya nari sismai kandera naba syadi wer.
The Seed Company