Sarmur Randak22
Allah Iwan Abraham i fa Vyuk Ishak fyarsarser
1Fafisu ri veso nande Allah imyouvir Abraham kakyar vyedi. Allah dor Abraham i, “Abraham!” Inja Abraham kyarem, “Ayaisine, Manseren Allah.”2Allah dawos ve i, “Rwave sup Moria, wun romawa bonjos bemanmin kaku ani, Ishak i. Ro diwa ro bonpir nari yakur fasnai ve au, wakun romawa banine fa vye farsarser ve Aya.”3Meser fyas arwo baboya ido, Abraham kyes aivyovek veraren apen vefarsarser anna posa ikanow na fa fyes epen na ro keledaiya bori. Abraham dun Ishak i vo sumbran vinkwan kaku mura ve mov Allah kyur fasnai kwar faro i.4Ro ras eve kyorya ro swaf vevinkwan kaker Abraham myam raro mov ani.5Inja ikofen faro Manfamyan vyansuya, “Muwaf ro dine kuker keledai anine. Aya kuker romawa ine nura vediwara fa nufarsaser ve Manseren Allah I, ra posa, nari nukaver muma wer.”6Abraham vye aivyovek anna fa Ishak vyarna, imboi mankundi dun inoiya ma anum vefrur forya. Fafisu sumbran anya,7Ishak ifuken, “Kamam!”Abraham kyarem faro Ishak i, “Rosai befandun i?”
Ishak ifuken wer, “Kuyun apyame, aivyovek vape domba mkun kufarserya ryoiso?”8Abraham kyarem, “Allah mankundi nari vefasos domba mkunyani.” Romura sumbran pdef.9Fafisu sumbran ra ro mov Allah Ikofen vadir faro Abraham i anya, insape vyaus apen farsarserya ma ryir ai vyovek anna ro bo. Posa fyes epen romawa vyanya ma ryir i fa vyarek ro apen farsarser anya bori ro aivyovek na bo.10Posa ido dun inoiya fa ive vyuk iwan bos romawa ani.Abraham imbe iwanbos Ishak i fa vye farsarser11Vape manakya Manseren Allah vyedi dor ro nanki faro i, “Abraham, Abraham!”
Abraham kyarem, “Ayaisine, Manseren!”12Manakya Manseren Allah vyani dawos wer ve Abraham i, “Mun awer romawa iya orovaido be i ra movo nawer.” “Snar Yafawi kaku be syowi ma wamkak faro Aya, evewar rwir kapaper romawa bonjos banya faro Aya.”13Insape Abraham myam ve vandivar ido domba snomanya knapur vero vukoryansya ssawer ro papusna. Abraham dun domba anya fa vyuki farsarser faro Manseren Allah I fa fyadwer romawa vyanya.Domba snoman14Abraham nyir mov anya ve “Manseren Allah fyasos roi eve fandun na.” Ma isof ro kurine snonkaku sikofen radine “Ro bon anya bori Manseren Allah fyasos roi eve fandun na.” 15Rarwan eve suruya manakya Manseren Allah vyani dor ro nanki faro Abraham i,16“Manseren Allah ikofen: Yafores kuker Snonsnon Ayedi, snar waso user Aya ma rwir vararwi romawa bonjos banya ve Aya,17inja nari Yave vok au kuker nana ma Yavuk kpu besya fa sibor simnis mak vero farsyos ma yen morem bero swan andir. Romawa kpu besya nari simerkar mbrov sesi.18Er vebor ro supswan nari sfararyor ve Aya insa Yave vok si raris mov Yave vok kpu besya raya -- snar waso user sasoser Ayena.”19Raposa Abraham kyaver ve manfamyan vyan suya, insape skora ve Bersyeba; Abraham kyain ma nya mnu ro diya.20Abraham naek vyeja snori Nahor i. Fafisu ri veso nande, Abraham ryower, Nahor swar Milka i nya romawa snon di war kwar, sisoine:21Us, romawa rakya; Bus, bedar kasunya; Kemuel, ro varpurya eve sinan be Aram;22Kesed, Haso, Pildas, Yidlaf, ma Betuel,23ro varpurya eve sinan kma ve Ribka i. Irya romawa ri war Milka ikapar ve Nahor, Abraham vedar vyani.24Nahor vye kya vinya venirve Reuma, vin anya dakkapar Tebah, Gaham, Tahas, ma Maakha.
The Seed Company