Sarmur Randak21
Ishak vye veyaven
1Manseren Allah vye vok Sara i raris rosai Danun kwar.2Fafisu Allah dap soser kwarya imnis, fyor Abraham vye mansar bos kaku, Sara fyadores ma daven romawa snonya.3Abraham nyir romawa anya ve Ishak;4ma fafis Ishak vye ras ri war ido, Abraham vye sunat i, raris sasoser ro Allah i5Fafis Ishak vye veyaven anya, Abraham ikenem pasibarek usin oser kwar.6Sara ikofen radine, “Allah I frur kwar fa yambrif. Snonkaku mundiri vemnaf mnuk ine sikako nari simbrif ma siryav so aya.”7Pyam wos vyeja wer ra dine, “Snonkakusya skara vo sove nari yakapar romawayo ve Abraham iva. Imbape inema yakapar vardi kwar ro fafisu snon yavukya vye mansar bos kaku.”8Romawa anya isur iba, inja ro ras spaf i bur sus snar vyesya, Abraham ifrur munara papyaf veba kakuya.Hagar ma Ismael suve veyau
9Ro ras oso, Sara myam Hagar romawa vye Ismael i ifnak pyum kuker Ishak i va.10Sara myam su raposa ikofen ve Abraham i “Wawan vinfyan aniya fa dun romawa vyediya vo subur. Romawa anya ipok daksmai rarwas ro nana banna nari vekain faro Ishak i.”11Abraham imarisen wos Sara vyanna vaveri, snar Ismael ikako romawa vyediri.12Imbape Allah dawos faro Abraham i, “Snembri kyorwanan awer snar vinfyan be Hagar i ma romawa vyani. Waso monda Sara marisen vyedi, snar ro Ishak i monda nari wasmai er vebor veba yanun kwar faro au ani.13Rarirya kako faro Hagar romawa vyedi nari yafrur i fa up vyesya sakve er veba, snar i kako rumkun bedirya.”14Meser myas ro arwo primya ido, Abraham vyuk faro Hagar i roveyan ma inoken beser warya fa vyaryam su posa iwan su fa sumbran subur. Mura Hagar imbran vye diwai kuker Ismael i ro maper benir ve Bersyeba.15Fafis war ken suvaryam ani ivro, Hagar ryir Ismael i fa vyarek ro ai kus na bav na,16ma kyain vinkwan bur romawa anya ndokada rof usin oser, iwasen ro sneri radine, “sneri muk ma yasambrav vaveri fa yamampum bo romawa ayeja imar.” Mura ido vin ani kyanes. 17Allah ryower Ismael mkarem vyedi, ma ro nanki yaswa manakya Allah vyedi dawos faro Hagar i, vo dove, “Hagar, rosai evedar snembri vye virvarya? Wamkak awer. Allah Imnaf mkarem romawa banya kwar.18Rwamura mam romawa bannya, wakanow i ma be i fa iknon. Nari Yavuk fa up vyesya sve er veba.”19Insape Allah Vyuk fa Hagar myam isnai bos kaku, isof myam war veyer oso. Muraido Hagar rya iser war yaro inoken aiwan kefya, posa vyefa romawa vyanya dinem.20Allah isaramper Ismael i. Romawa anya isur iba; ma vye knam ro maper Paran, ma vye snonkaku vesamnaf eve kir kaku.21Hagar dun vin Mesirya fa vyuk.22Ro fafisu anya wairek Abimelekh ma snon mambri vye Pikhol i, surama susrou kuker Abraham i ma sukofen, “Allah ifnovek au ro roi vebor wafur na.23Rarirya, fores ro dine ro varpon Allah, snar nari wafrur mnis faro aya, ma kako romawa ayesya, rova kpu ayesi. Imnis yafrur pyum faro au kwar, wafrur rarirya kako faro aya ma kako sup kwaindo ine.”24Abraham ikofen, “Imbo yafores!”25Imbape ro varpurya Abraham fyafko Abimelekh i, snar war veyer vyedi manfamyan Abimelekh vyesya sfasyari.26Abimelekh ikofen, “Aya ma yakfawi mansei vefrur rariryanyava. Wakofen badir ve aya ro raso vepon va, insape ras ine yakmnaf mnuk ine.”27Mura Abraham vyuk domba ma sapi ri veso faro Abimelekh i, posa snonkaku ansuya sufes eren.28Abraham irwas domba mkun di fik ro fandu domba vyesya,29mura Abimelekh ikmom ma ifuken faro i, “Wafrur rarirya kukro?”30Abraham kyarem ve i, “Wun domba mkun ri fik sine mufa insa sve avyair fandu au kuker aya, ma Amber kwarem ve aya, snar war veyer ine aya vevai inya.”31Evedar sap mov anya ve Bersyeba, snar snon ansuya sufrur sowar ro mov anya.32Sufes eren ro Bersyeba ra posa, Abimelekh ma Pikhol sukaver ve sup Filistin.33Abraham kyer aiknam Tamariskaya fa vye swarapepen ro Bersyeba ma ro fafisu anya mov ani nya ive mov isyom faro Manseren Allah, vekain fioro.34Raimnaido Abraham vyarek kawan koper ro sup Filistin.The Seed Company