Ibraayiib6
1Aflaay oon utꞌaliim ilaamaab Umasiihiib ikatiib ishti dꞌiinaat, hayiska tꞌaliimiib yakaana. Suur allamamnaneeb ituubti asaas ishaga tooyat istoobiinaaywa Ukwaasanaay wꞌiimaaniibwa masi hadiidnayeet toona kitti.2Aree tꞌatoomsooyti sootiiwwa, yꞌayi dadaastiiwwa, yꞌayaani yaktiibwa, whukwim udaayimiibwa hadiidnayeet toona kitti.3Aree Ukwaasana wꞌidin iniiweek, hinin bak sakni niyad.4Baliin wꞌiimaanoohna yꞌishni idꞌiin malya kak masi agarti haay yꞌeena? Baraah tibreeti miyaaw dꞌamisiyaaniit, Eeshuuk Imugaddasa yꞌadhadhna,5baraah Ukwaasanaay ibhaliyeet daayiinaayt dꞌamisiyaana, aree harꞌook yꞌiiniib udamaani akrireet daayiinaayt dꞌamisiyaan.6Baraah wꞌiimaanoohna yꞌishni idꞌiina, bareeh masi ituubsiti adgiramtiniina kitti. Baraah masi Ukwaasanaay Wꞌoor sallabiyaaniit barooh oodehayi suurii sikwꞌiib daaseen.7Whaash aabreet bariiyooh kehii iyaamiib oobrii yamee gwꞌiiniib, aree baliib whaashiib yꞌeed yꞌaadana harroob rayiisiiniib Ukwaasanaayt tibaraka iniin.8Laakiin whaash naweetwa adaarwa yaksiiniib takweet kiibari, aree atooꞌitaab ikatiyeena itrakwkwi. Wꞌagiyaay baruuh ituuliw indi.9Yꞌarawaan, hinin bak hadiidnayeek han, bareeyookna whaaliib akiidaat nibari, daayiinayt sakteena aree baliit taana umidhhan imooriimna.10Ukwaasana daalim kiiki, baruuh ushagaayookna iibdhan kiidi, baraak barooh areetaaneeb ooreer han iibdhan kiidi. Baraak bariiyooh oodehay tishamna, aree bareetooh tushamaam tisoorariimna.11Isꞌayaayookna sidik tikwasiini jillaay, kassaakna oon ushaga ookna wꞌagiya ookiik tisoorariimneet toona hookna nhariw.12Hasra dehay tikatiineet toona hookna kinhariw. Laakiin baliib wꞌiimaaniiwwa utarmuumaaywa toona tuwaadiyaamaat kwasaameen tꞌiiteeb tikatiineet toonaati.
Ukwaasana Uwaadiya Usidkiib
13Ukwaasana Ibraahiimii dehaay waadiyaab idꞌiyihoob, baruuh toona waadiyaayaab ikatiyeet tankwiikweet toona halafooya. Barooh ooknaayka aree winkaab gaal han biihaayeet toonaati sabbii, baruuh halafooyanihoob oosmiisooh halafooya.14Baruuh “Ani sidik barook baaraki hook andi, aree gwida firaay iyaaw hook andi.” idi.15Aree Ibraahiim utarmuumaay yhagit harꞌii, malya toona dehaay waadiyaamaat imri.16Uudehay bareeh iknaayeeka winkaanaay halafooyeena, aree tehalafooy toona tꞌattiyoodiyaat akkadtini, aree kassooh wꞌamgwasuura tisingiid.17Ukwaasana baliib toona tuwaadiyaamaat kwasaameen, baruuh whadafooh biibadiileet toona winneet akkadtiib yhariw. Baruuh beet batooh halafooytii akkadiya.18Ukwaasana toon toona haay idꞌiyeeb usabab, maloot na baabidaalaat Ukwaasana hooy biigwaasiireet eefeen. Aree bataah uwaadiyaawwa tehalafooywa ikatiin. Hinin bariiyooh geeb umꞌasig nimeer, toon toona aree isꞌaya wꞌattiyeewiyaab nikatiyeeb daayiib nꞌabikihoob nimeer.19Oon isꞌaya aree eenfis tisꞌakiirna akay nibari, baruuh akraabwa amiinwa ikati. Baruuh oomhiin umugaddasiit tehooywa tusitaaraati gidehiiwwa shuumiini.20Yasuuꞌa been hini hankaay giigiyaab, hini badal shuumiya. Baruuh daayim win fagiiri iki, Malkisaadikiit takwi iktim.The Seed Company