2 Tiimooti2
1Aflaay baruuk wꞌooruun, Umasiih Yasuuꞌiib eefeent tinꞌimaateeb akiraa.2Ani gwida badehi suurii sooyee timaasweeb utꞌaliim oodehay usidkiib dehaay ammanaa. Baraah oodehay eeraw allami iyadna.3Umasiih Yasuuꞌi kajaraayi udaayiinaayt, igwirha geeboon amtaraama.4Kajaraayiib ikati gaal aree oodehayi shanhiib wꞌayooh kiidꞌi. Baruuh udaabit bariiyooh suurkina ikatiib afirhistiib harriiw.5Bak aree, gaal dhaabanaab ikatiyihoob, idhabi gaanuun kantiit imgirib biidiyeek, tinasraati taaj kanuunamiya.6Udirꞌaatkina ushagaamana wharrooy wꞌadhidh awwal iniineet toonaati.7Oon ani andiyeet toona uginꞌook hooy dꞌiyaa. Wꞌankwana toon toona kastooh rhisi hook indi.8Yasuuꞌaab Umasiih shꞌaa! Baruuh tooyat hooy yakamiya, aree Daawidiit dirriyaaytii ikati. Uun baruuh aniib usakana udaayiibu,9ani bariiyooh jillaay lhamani, amaagtakiit shinshilaatee han amhakwaar. Laakiin Ukwaasanaay ibhali shinshilaatee hakwar kiikeen.10Aflaay uwaasamti jillaay naatka amtarriim. Baraah han Umasiih Yasuuꞌiib eefeeb umidhhan umatuun udaayimi geeb imeernee dehaay adgireen.11Tooy sidki miyaad eefi:hinin bariiyooh geeb niyaayyeek,bariiyooh geeb han nikwaar niyad.12Hinin nimtariimeek,bariiyooh geeb han hadꞌaab niikti niyad.Hinin barooh nittawiyeek,baruuh han ittiw hoon indi.13Hinin sidkiib binkaayeek,baruuh sidkiib iikti indi.Baruuh ugarooyooh kiitiwi.
Ushagaamana Ukwaasana waasiyaneeb
14Teen teena bareeh Ukwaasanaay suurii sooyaa! Bhaliyeeb biiꞌamhassaayneet toona shꞌasaa. Tuun tuuna nafꞌaat kitbari, aree baliib bareeh isnaakiir eekna katꞌitni.15Ukwaasanaay suurii daayiib waasamaab tikatiyi jillaay daayiib shagaama. Ushagaamana ushagaayiisooh kiisikwꞌa, aree baruuh usidki bhali daayiib kaleewiini.16Ibhali titakwi baabariinwa whararfiridwa hooy sigiya, aan baraah oodehay Ukwaasanaay salalii oobhaat isiisagiin.17Baraah allameeneet tuuna tulhanaaytiit itbirir tindi. Bareeyooh bitik Hiimiinaayooswa Fiiliituuswa eefeen.18Baraah oosdik yꞌishniit fidnaab giigiyaan. Baraah uuyak suur iki iyadna, aree dehay galneeb wꞌiimaan kwidhseen.19Laakiin wꞌasaas wꞌakraab Ukwaasana kwaasaab ikatiyeeb gaal han kahankalisiya. Bariiyooh kehii aree aan ibhali kataba, “Wꞌankwana baliib bariiyeeh ikatiin ikteen. Baliin baraah Ukwaasanaay nikati iyad aree kassaah ibakii tumaagti shagaay itꞌagiirneet toonaati.” miyaad hooy kataabi.20Win gawiib gwida jinsa shhanwa koobaatwa eefeen. Gwadi dimꞌaraawwa ashteetiiwwa daamaaba, wari aree hindiiwwa haashiiwwa daamaaba. Gwadi tageegaat daayiinaaytii dehaay daamaaba, aaraw aree takweet kiibariin.21Uutak ugarooyooh tumaagtii isinhiiseek, baruuh daayiit takweeti tak iikti indi. Baruuh mugaddas ikati. Wꞌankwanaayooh dehaay ishboobi, aree udaayi shagaay dehaay iitmar indi.22Yꞌareereewa idꞌaneet teena tꞌamag hooy taraa! Tooshbu dꞌiyaa, oosdikwa, ooreerwa, umꞌasigwa dꞌiyaa. Wꞌankwana nhas ginꞌii waliikeen baliini geeb daayaa.23Yꞌafreewwa wꞌamaag amgwasuuraawwa hooy sigiya. Een bareeh wꞌagiyaayuuh hasiyaayt tikatiyeet toona baruuk tikteena.24Aree Wꞌankwanaay ushagaamana ibakii biihasaayeet toonaati. Laakiin baruuh ibakii kasseeh udehayii dehaay nhas niyaay ikati, allamiiniib ikati, aree tarmuumaab ibari tak ikati.25Baliib barooh imgwashiish diiseet sooyiini. Ukwaasana bareeh usidkiit kanaan beeti mitiyaayiit, tuubsiiniyeet toona sꞌayaamiini.26Baraah aakna tumaagtii agartiit oobliisi sharak hooy iidhhan iyadna. Bareeh uubliis abuukiib kwaasaabuuyt, baruuh yharriiweet toona isidꞌi.The Seed Company