2 Tiimooti1
1Baawloos ulinguuma Umasiih Yasuuꞌiib Ukwaasanaayt niyaatii linguumaab iiktiib, Umasiih Yasuuꞌiib tꞌamshawawiyooytiib ikatiib umidhhani uwaadiyaay isootii dehaay linguumaabi.2Tiimooti wꞌooru whayis ani barook beeti akantiib: Ukwaasana Ubaabaaywa Umasiih Yasuuꞌaab Wꞌankwanaayiisoonwa ikatiint tinꞌimaawwa, tirhamaawwa, umꞌasigwa miriya.
Wꞌiimaani jillaay tisꞌakrooy
3Ani Ukwaasana ahammiid, aniib yhooba idꞌiineet toonaatiit, ani han barooh nhast niyaatii shagaamani. Siileelaniyihoob, whawaadwa oombꞌeewwa diimaab barook shꞌani.4Bariiteek teemlu shꞌaniyihoob winneet rheesamtiyook aharriiw, aflaay firhaat han eettiib akati.5Wꞌiimaanook oonhas ani shꞌani, wꞌiimaan suur hootook Looyisiib iifi, malya aree deetook Afniikiib daaya. Oontꞌa han barook hook eefiyeet toona eetehak kaabari.6Oon usabbii, ani yꞌayi kehook daasanihoob timriyeeb Ukwaasanaay oomiyaaw daayiib tishidhhiineet toona ani shꞌasani hook.7Ukwaasana mirkwaayi shuuk hiiyyaayoon kiiki. Laakiin akriri shuukwa, reeri shuukwa wꞌadabwa yhii hoon.8Wꞌankwanaayiiteen tibadeha bandeheet toona hooy baasikwꞌa! Tari aneeb bariiyooh abuuki akatiib han hoosu baasikwꞌa! Laakiin Usakana Udaayiinaay jillaay ikatiint tilhanayteeb geebu daayaa. Bataah Ukwaasanaay akriree ikatiin.9Ukwaasana ishidhhan hoon, aree mugaddas midhhanii dehaay waliikiya hoon. Hinin naat nidꞌiyeet tunaati sabbii kiiki, laakiin barooh ooknaay hadafwa nꞌimaati sabbiiwwa ikwasi. Teen tinꞌima Umasiih Yasuuꞌiib nimriyeet udamaani badooti hankaay nimri.10Laakiin hinin Wꞌishidhhiin, Umasiih Yasuuꞌa lawiyanihoob, oontꞌa bataah dehoon lawiyaan. Baruuh tooyat idir, aree Usakana Udaayiinaay umidhhan udaayim lawisiya.11Aree oon Usakana Udaayiinaay isooti jillaay Ukwaasana aneeb linguumaawwa koojaawwa ikwaaseheeb.12Oon usabbii aree ani bak lhamani. Ani aab aamananiyeeb akteen akay, masi sikwꞌaab kaaki. Ani beet tooyintii dehaay barooh aamanaab akatiyeet teena, baruuh ingwꞌiideet toona eetehak kaabari.13Baruuk anii timaasweet toona, daayi tꞌaliimuuyt winneet kaleewa. Wꞌiimaanwa ooreerwa Umasiih Yasuuꞌiib eefeenaay daayiib kaleewa.14Baruuk dehaay ammanamaab tikatiyeeb udaayi miraay daayiib gwꞌadaa. Eeshuuk Imugaddasa hoon ikweer bareesooh shamaamtii oomraay daayiib gwꞌadaa.15Aasiyaay whaashiib eefeen kassaah aneeb yꞌishneet toona baruuk tikteena. Fiijiluuswa Harmoojinooswa han yꞌishni idꞌiinheeb.16Wꞌankwana Oonisifroosi dhiwa rhamaat barhisi. Baruuh gwida doora afirhisiyaheeb. Ani haay amhakwiraab iiktiyeet tishinshila han baruuh hooy sikwꞌaab kiiki.17Laakiin baruuh Roomaab eeyanihoob, willa aneeb imriyeeb ookiik yhariwheeb.18Baruuh beet tooyin Wꞌankwanaay rhamaat marriyeet toona, Wꞌankwana baꞌiyaaw. Baruuh Afasoosiib gwida salalaayee ishameetu toona baruuk daayiib tikteena.The Seed Company