1Keba se imese urubia na-irowomidirotiti nedi duriomoro ro nato, kaupoti owera to iarotiti-mo.2Neio ro saiki korioduti moro na-gemeserai-rimo, durio goto nato gowea-rimo Babironia duriomoro ato, taie iato aise gorowomidiro.3Neio ubi tato ie kororoburitai duriomoro gabogabo to, neio ubi ie atu moro ato aise korowomidiro. Neio iato geremowapotai-rimo auna sabowa osioidiro ri, ibose moto ididi ri ohu to owioro ri toboro owasomai ri, mabu neio keremowabu auna ie. Goto iato gidabuti-rimo kaupoti moro to, ina era to nato gito-rimo, bosou to na-giadiriti-rimo, koko neito giwaititi-rimo.5Neio Iawe ro na-giwia kaupoti ubi mutu na-gisioidiro-rimo, ibose kaupoti owera to na-garo-rimo,6nou nato gimaragoidiro ibo, ‘Neio ubauba tanaro kisioidiro aboto imese gatamuai-dumo. Ina ido beda ubi ro nama-iamo-ri neio abato, neio gabo amadimi-iauri-ri kisioidiro aboto, sabi imaragoidiro-ri pua.7Neibi miroruwo-ibiro owera imewesegerai ri.’8Taie neio ro auna sabowa kididi to oporeai pua. Iawe ro ioudo giburutai-ro, mabu neio owera na-geremowidiro-rimo, erere se garo-rimo.9Sabowa masiro Babironi owera nato gimewesegerai Iawe ro, nou masiro maumo owamo ibo ‘Daradara’, mabu urubia iato daradara imese goi-rimo, erere owera eremewidiro pua. Taie urubia ioudo giburutai-ro muso duriomoro gabogabo goroho-rimo owera erere mutu.
Sem aboudo womu tato Abaram totomu e
10Netewa teibo kisimisi na-goroporeai-rido abata saro gabo ato, Sem ro 100 kisimisi na-girobai, nou ro nato garasomai dubu mere masiro Apakisadi.11Nou ro arua merebusere ido girasomai. Nou 600 kisimisi na-girobai, nou iato aise garaburai.12Apakisadi 35 kisimisi na-girobai, nou ro nato garasomai dubu mere nou masiro Seraha.13Nou ro arua merebusere ido girasomai. Apakisadi 438 kisimisi na-girobai, nou iato aise garaburai.14Seraha 35 kisimisi na-girobai, nou ro nato garasomai dubu mere nou masiro Eberu.15Nou ro arua merebusere ido girasomai. Seraha 438 kisimisi na-girobai, nou iato aise garaburai.16Eberu 34 kisimisi na-girobai, nou ro nato garasomai dubu mere nou masiro Perege.17Nou ro arua merebusere ido girasomai. Eberu 464 kisimisi na-girobai, nou iato aise garaburai.18Perege 30 kisimisi na-girobai, nou ro nato garasomai dubu mere nou masiro Reu.19Nou ro arua merebusere ido girasomai. Perege 239 kisimisi na-girobai, nou iato aise garaburai.20Reu 32 kisimisi na-girobai, nou ro nato garasomai dubu mere nou masiro Seruge.21Nou ro arua merebusere ido girasomai. Reu 239 kisimisi na-girobai, nou iato aise garaburai.22Seruge 30 kisimisi na-girobai, nou ro nato garasomai dubu mere nou masiro Nahoro.23Nou ro arua merebusere ido girasomai. Seruge 230 kisimisi na-girobai, nou iato aise garaburai.24Nahoro 29 kisimisi na-girobai, nou ro nato garasomai dubu mere nou masiro Tera.25Nou ro arua merebusere ido girasomai. Nahoro 148 kisimisi na-girobai, nou iato aise garaburai.26Tera nou 70 kisimisi na-girobai, netewa didi dubu mere peteibi nou ro neibi girasomai-ibi, Abaram, Nahoro ina Haran.
Tera aramio merebusere neio totomu e
27Tera totomu nou e. Tera ro girasomai-ibi nedi dubu mere peteibi ro Abaram, Nahoro, saro mere Haran. Ina Haran nou saro mere ie, Roti nou ro garasomai.28Ina Tera na-gomidiro, nou mere Haran aise garaburai, simara koroto sabowa ato, nou masiro Uri, Babironia duriomoro ato na-owamo.29Abaram ra Nahoro ra upi iato aise giaremo-rido, Abaram ro gedea Sarai, Nahoro ro gedea Mirika. Mirika, Isika mutu Haran besere teibo ie.30Sarai mere tato imidirotiti, nou teri orobo ie.31Tera nou urubia mutu Uri sabowa ato gomidiro-birimo, Babironia duriomoro ato na-owamo. Ina ioudo aise gaimai-birimo Keineni duriomoro to, kaupoti neibi ipi ato aise gorodiobo-birimo auna sabowa Haran ato. Ina Tera, nou mere Abaram, aramu Roti, ina eterera Sarai, neibi iato aise gomidiro-birimo.32Tera 205 kisimisi na-gorobai, Haran sabowa ato nou iato aise garaburai.
expand_more
The books couldn't be loaded. Check your connection and try again.