Read Pauro keba peba owera ie Iesu urubia aboto Tesaronika ato na-irowomidirotiti 4

Pauro keba peba owera ie Iesu urubia aboto Tesaronika ato na-irowomidirotiti4

Godi kamade kowaititi tanaro ibo ie

¹Naminiramio, nio abora Iesu Keriso urubia ie abora neibi ro nio a-nimagege-bimo neibi ro beda sosoro nitamudirotiti-birimo nio idaibo sosoro mino to ba-dirowomidirotiti, ina Godi nio ro kamade amadimo-owaititi-ri. Nio abora idaibo tanaro to orowomidiro ina neibi ro nio a-nimagege-bimo inaina meamea tanaro auna se isioidiro ri.²Nio umoro ie nedi umoro owera ro neibi ro beda sosoro to naro-birimo kebase Abera Naramu Iesu nou aboudo gou-ro nio ro isioidiro ri.

³Godi ubi ie nio imese meana ia se korowomidiro nou sosoro gabo ato, simara ia orobo mutu gido-oroho-ri.⁴Ibose Godi ubi ie dubu nio umoro kiamo oro simara ia orobo mea mino to gi-oworohuti-ri.⁵Nio durupi modobo pua ubauba ubi tanaro nou kisioidiro aboto, io Godi umoro tato urubia idaibo sosoro ubauba tanaro neio ro isioidirotiti-dumo.⁶Ibose Godi ubi tato ie idaibo sosoro tanaro oro ro kisioidiro ata dubu ubauba kowai aboto. Urubia ro idaibo sosoro tanaro na-isioidirotiti-dumo Godi ro ubauba wisa ama-iaiwo-ri neio aboto.⁷Nimo Godi ro nirapoi-ro imese mea ia se orowomidiro ri nou sosoro gabo ato ina nou ubi tato ie nimo idaibo sosoro ubauba maumo ato korowomidiro.⁸Ina beda mere ra nedi owera ro huru to kiedea ato ibo pua neibi kiedea-ibi huru to, nou ro Godi ia huru kemowou e, ina Godi edi Urio ro na-emeiriotiti-die nimo aboto imese tarena ia ie.

⁹Naminiramio nirimagare beda sosoro erematiti-dumo nou sapuwo to neibi ro modobo pua kiatiti nio aboto. Nedi tanaro ro nio Godi ro neito kebase ta-gitamudiro¹⁰ina morobise ie nedi tau ro nato Masedonia duriomoro ato nio ro idaibo nirimagare tanaro tiwawutiti-dumo arua kimibiria naminiramio aboto. Naminiramio, neibi ubi ie nio ro idaibo sosoro tanaro auna ia se kisioidiro.

¹¹Ina nio modobo ie pupuwo kiasibai mea muro tanaro neito korowomidiro, simara tu ra sairo ra to ba-dotobua-mo, arua rubi iaserawado mamo, nio imese sirio se simara woko aise gidimi-isioidiro-ri. Neibi ro kebase nedi tanaro ro nio aboto ta-nitamudiro-birimo.¹²Nio idaibo sosoro tanaro namadimi-isioidiro-ri ina nio arua urubia iaserawado-ri pua. Kirowai tato urubia nio neio ro amadimi-imowabu-ri ibo nio meamea urubia ie meamea tanaro isioidiro-dumo.

Abera Naramu amadi-orowameai-ri

¹³Naminiramio, neibi ubi ie nio buro umoro kiwai etio ra kimibiria mutu kebase na-gorowaburo-rimo neio sapuwo to. Neibi ubi tato ie nio mibo kimaragoidiro mutu korowomidiro arua urubia beda sosoro irowomidirotiti kamade tato, mabu neio ibo imaragoidirotiti-dumo karaburai ato imese karatowouti ie.¹⁴Nimo ro ta-nimibiria-rimo Iesu ta-garaburai ina iato nou keremiro aise gowea, ina nou rie nimo ta-nimibiria-rimo Godi ro Iesu mutu kimibiria urubia na-gorowaburo-rimo atu se ama-iwameai-ri nou ia aboto.

¹⁵Neibi ro beda owera namabima-aro-ri ibo pua neibi simara owera, Abera Naramu nou owera ie. Nimo abora na-norowomidiro Iesu edi tau ato namadi-orowameai-ri, etu umoro ra nimo aise korowomidiro, nimo keba se ou-ri pua, etio ro gorowaburo-rimo kimibiria mutu neio ro amadimo-ou-ri kebase.¹⁶Abera Naramu kaunene amadi-utura-ri, nimo ro humuko owera namadimi-irowai-ri ina ibose Godi sowake urio auna ato edi na ro imidirotiti nou owera kodu namadimi-irowai-ri, iato Iesu ro amadi-ororuwo-ri Adiri sabowa rido. Kimibiria urubia na-gorowaburo-rimo neio kebase amadi-iwameai-ri pamo rido¹⁷ina etio ro orowomidiro nedi duriomoro ro nato kimibiria mutu iato neio ama-iwoubua-ri, iedi topira teibo ro iato namadima-aradabuai-ri tema ohu ato Abera Naramu mutu iato amadimo-ororowea-ri, taie nimo imese sirio se anama-irowomidirotiti-ri Abera Naramu mutu Adiri sabowa ato.¹⁸Ina noudo ie nio etio ro orowomidiro mibo kimaragoidiro mutu, nedi owera ro neito keremowauti modobo ie toutou keremowaititi sapuwo to.