Pauro keba peba owera ie Iesu urubia aboto Tesaronika ato na-irowomidirotiti3
1Neibi ro nio kiwia giropu auna se giamo kaupoti neibi atu se kou modobo pua, ina noudo ie Atenisi sabowa ato komidiro.2Timoti noti nemeiriai-do nio aboto. Nou nimo neama ie, nou ro niwarebidirotiti-ma neitiro urubia kimowauti mea owera Keriso sapuwo to. Mo Sairasi mutu neitiro ro nou mabu ato nemeiriai-rido nedi dubu ro nio kimibiria tanaro pupuwo imowaititi ri,3ina modobo pua nio ubauba ro na-giwia kimibiria tanaro kimeserai aboto. Nio umoro ie nedi ubauba ro modobo ie nimo aboto kororosioidiro,4ina neibi nio mutu iato na-nimidiro-bimo neibi ro ta-nimowapotaidiro-birimo idaibo sosoro owera ibo nimo mibo temeteme mutu anamadimi-iauri-ri ina noti gororosioidiro-rimo,5ina Timoti nou mabu ato nemeiriai-rido nio aboto. Nou korowameai tau ato neitiro nou ro nato imowauti-ma rie ibo, nio kimibiria tanaro beda sosoro ra. Nou nou ri nemeiriai-rido mabu neitiro kimaragoidiro iamotiti ibo, etu moro ra nio Satani ro kiwaibirio ato ubauba kisioidiro aboto ina neibi edi mea woko ro ubauba kowai ie.6Kaupoti Timoti ta-gorowameai-die nou ro mea owera ta-nimowou-madie nio kimibiria tanaro, nirimagare tanaro modobo ato tisioidiro-dumo. Nou ro ibose ta-nimowapotai-ma ibo nio auna se timaragoidiro-dioumo neitiro aboto, nio auna ubi ie neitiro ina kiwia-ma aboto, ina ibose neitiro idaibo kimaragoidiro tiamo nio kiraturiomai aboto.7Naminiramio neitiro awawo mibo, temeteme mutu ti-niaurititi-do ina nio edi kimibiria tanaro ro neitiro kamade nou ro niwaititi-ma nio iato beda sosoro to irowomidirotiti. Nio mea kimibiria owera na-nirowidiro-rido edi mea owera ro nou ro pupuwo aise niwai-ma.8Nio Iesu mutu ta-garadabuai-rimo ina koko se orowotoi, neitiro idomari kiopai na-nimidiro-do abora ta-nirarowea-do.9Neitiro kamade auna ia ie, ina noudo ie eso owera ti-niarotiti-do Godi aboto, neitiro ro emeserai-ri pua.10Duwo saiki neitiro Abera Godi aboto ti-naratorotiti-do mabu neitiro ubi towamotiti nio kiraturiomai aboto, ina nio kimibiria sapuwo to goro kainakaina bato iaidiro nou kimoputi aboto, idaibo sosoro mino to nio kimibiria tanaro momuo se modobo ato ama-iamotiti-ri.11Ina Abera Godi Iesu Keriso mutu neitiro ro gabo ba-mimodobura-maro, neitiro ro nio ina kiraturiomai sapuwo to.12Abera Naramu Iesu nou ro nio nirimagare awawo ba-mimowaititi iedi nirimagare ro nio nakara se keremati aboto ibose arua urubia aboto kiwawuti, io idaibo mino ie neitiro nirimagare tanaro neito niwawutiti-do nio aboto.13Abera Naramu ro nio pupuwo ba-miwaititi, ina noudo ie nio ubauba tato se ama-orowotoi-ri Abera Godi sosoro gabo ato nou edi tarena urubia ro neio mutu Iesu namadi-orowameai-ri.