Read Ioane keba peba titi owera ie kimibiria urubia aboto 3

Ioane keba peba titi owera ie kimibiria urubia aboto3

¹Ei! Nio gare neito ma-diedea-rimo! Nimo Abera ro auna ia nirimagare momuo se nimia-ro nimo nou merebusere to kararasoro aboto. Ina nimo nou e nou merebusere ie. Kimibiria tato urubia ro Iesu mea se neio ro eibimai pua, ina noudo ie nimo neio ro ieibimai pua ibo nimo Godi merebusere ie.²Nirimagare babio abora nimo Godi merebusere to nararasoro-dumo. Nimo beda sosoro nama-orowomidiro-ri umoro mea se iwai pua. Kaupoti nimo umoro tiamo Iesu korowapotai tau nimo nou sosoro anama-orowomidiro-ri. Mabu nou abora beda sosoro omidiro-die nimo ro anamadimo-owea-ri.³Ina etio ro imaragoidiro-dumo nedi tanaro namadimo-ororosioidiro-ri, neio modobo ie ubauba aboudo karatateawado Iesu beda sosoro imidirotiti ubauba tato.

⁴Ubauba tanaro etio ro isioidiro-dumo Godi edi sabi ro neio ro isebo-dumo, mabu ubauba tanaro kisioidiro ato maumo ibo owamo sabi kisebo tanaro ie.⁵Ina nio umoro ta-goi-rimo Godi ro kohodowa dubu ta-gorowapotai-ro imese urubia ubauba imatopeamuti ri. Iesu ata ubauba tanaro tato dubu e,⁶ina nou mabu ato ie urubia etio ra Iesu mutu na-iradabutiti-dumo neio ubauba tanaro kisioidiro pua. Etio ra ubauba tanaro na-isioidiro-dumo neio ata umoro tato ie Iesu.

⁷Merebusere nirimagare babio, nio amia urubia ro kisaubuti modobo pua erere tanaro sapuwo to, mabu etio ro isioidiro-dumo tuputupu tanaro io tuputupu urubia to neio ro se ararasoro-dumo, Iesu idaibo sosoro tuputupu dubu e.⁸Satani ro keba ia tau ato gatamuai womu tato abora nou ro ubauba tanaro noti isioidirotiti. Etio ro isioidirotiti-dumo ubauba io neio Satani patu urubia ie. Kaupoti Godi edi mere ro nou ri gorowapotai-ro Satani edi woko sirio ro na-gisioidiro nou ro itotouti rie.⁹Godi ro etio iasoro merebusere to neio ubauba inaina kisioidiro pua, mabu Godi ro neio niro turi ato orio keremiro ta-gibouti, ibose neio Godi merebusere to imese nato ta-gararapoi-rimo, ina nedi urubia ro ubauba tanaro isioidiro-ri pua.¹⁰Etio ra isioidiro tato tuputupu tanaro io neio Godi merebusere pua, ina ibose etio ra urubia nirimagare imati tato, io neio ibose Godi merebusere pua. Idaibo tanaro nimo ro na-niauri-dumo nimo umoro koi ie ibo Satani merebusere etio ra ina Godi merebusere etio ra.

Modobo ie kimibiria urubia nirimagare keremati

¹¹Nimo nirimagare keremati modobo ie. Nedi owera ro nio ro keba se nou girowai-rimo.¹²Keina Satani namutuna ie nou simara neama na-gopia. Nou ro edi tanaro ro na-gosioidiro nio ro nou ematiouti ate! Mabu boira nou simara neama na-gopia? Mabu nou ro edi tanaro ro na-gisioidiro meana pua, ubauba ia ie, ina neama ro edi tanaro ro na-gisioidiro tuputupu ia ie.¹³Ina noudo ie kimibiria borubi nio orowadaudiro ate kimibiria tato urubia ro nio namadimi-ihoio-ri.

¹⁴Nimo umoro ta-noi-rimo ibo nimo asaso pamo maumo ato orowomidiro pua, morobise keremiro maumo ato norowomidiro, mabu kimibiria borubi mutu nirimagare neremati-dumo. Etio ra nirimagare eremati tato neio asaso Godi sosoro gabo ato pamo urubia sosoro irobu, keremiro tato ie.¹⁵Etio ro ihoio-dumo urubia neio idaibo ie Godi sosoro gabo ato neio ro urubia iopiauti-dumo, ina nimo umoro tiamo kororopiauti urubia abato womu tato keremiro iamo-ri pua.

¹⁶Nimo idaibo sosoro nimowapotai-die morobise nirimagare ibo ie, Iesu simara keremiro ta-gaiwai nimo sapuwo to. Ina nimo modobo ie kimibiria borubi sapuwo to simara keremiro kiaiwo.¹⁷Kimibiria urubia etio ra namabu sirio mutu na-orowomidiro ina borubi kimibiria urubia mibo mutu na-orowomidiro idomari to se namadimi-iauri-ri, Godi edi nirimagare ro neio abato a-iamo ra? E e. Iamo-ri pua.¹⁸Merebusere, nirimagare babio nimo nirimagare owera to se owawuti-ri pua, modobo ie nimo ro nedi nirimagare ro durupi to aise kowawuti.

Kimibiria urubia tere na ie Godi sosoro gabo ato

¹⁹Nimo nirimagare keremati ato arua urubia mutu nimo umoro ie ibo nimo ro morobise gabo nobodoro-dumo. Ina nou mabu ato ie nimo niro turi ato sirio tau miro ro kiamo ie, ata tere kimaragoidiro tato ie Godi sosoro gabo ato.²⁰Nimo kimaragoidiro ato ibo, ‘Etu umoro ra nimo ro ubauba nisioidiro-dumo,’ kaupoti nimo ro isioidiro pua, Godi auna umoro ie nimo niro goro kimiauri aboto, nimo miro nou ro ina kimowame ie. Erere tau ato imese sirio tanaro na-ororosioidiro-dumo Godi nou auna umoro ie.

²¹Kimibiria namuturubi nirimagare babio, nimo keremasibai ato ibo, ‘Nimo ro ubauba isioidiro pua,’ nimo abato miro ro kiamo ie, ibose nimo kararatoro ato Godi aboto siripo ri imatarumawado-ri pua nou sosoro gabo ato.²²Nimo ro nou aboto beda namabu ri kararatoro ra, nou ro nimo kimio ie, mabu nimo ro nou owera ti-nibodoro-dumo ibose nou kamade ti-nowaititi-dumo.

²³Godi ro nimo keba se ta-nimowapotai-ro netewa teibo tanaro teibo kisioidiro-ma aboto. Nimo modobo ie kimibiria kiamo nou mere Iesu Keriso sapuwo to, ina ata nou e nimo nirimagare keremati modobo ie arua kimibiria urubia mutu. Nedi owera ro nou sapuwo to Iesu ro keba se ta-nimowapotai-ro.²⁴Etio ro ibodoro-dumo Godi edi owera ro neio Godi mutu orowomidiro, ibose Godi neio mutu tomidiro. Nimo umoro beda sosoro koi ra ibo Godi nimo abato na-omidiro? Mabu nou ro Tarena Urio ta-gemeiriai-ro nimo aboto abora tomidiro nimo abato.