Read Ioane keba peba titi owera ie kimibiria urubia aboto 2

Ioane keba peba titi owera ie kimibiria urubia aboto2

Modobo ie nimo ubauba tato korowomidiro

¹Merebusere nirimagare babio, modobo ie ubauba tanaro kisioidiro tato korowomidiro ina nedi owera ro nou mabu ato nisioidiro nio aboto. Kaupoti nimo ro kisioidiro ato ubauba tanaro Iesu Keriso nou tuputupu dubu e, nou ro karo ie owera Abera aboto nimo sapuwo to ubauba kimatopeamuti aboto.²Mabu nou simara keremiro gaiwai nimo sapuwo to, Abera serawo neito adibiai ri ina miro edea rie. Ibo pua nimo ubauba nakara se kimatopeamuti, ibose imese sirio urubia nedi duriomoro ro nato na-orowomidiro neio mutu e.

³Nimo ro Godi owera kibodoro ato nimo umoro koi ie ibo Godi nimo mutu e.⁴Etio ro karo ra ibo, ‘Godi nimo umoro ie,’ kaupoti nou owera kibodoro tato io neio karasaubuti urubia ie, ina nou edi morobise owera ro neio niro turi ato iamo pua.⁵Kaupoti etio ro ibodoro-dumo Abera owera nou edio nirimagare ro momuo se neio abato modobo ato kiamo ie. Nimo ro karo ato ibo, ‘Nimo Iesu mutu noroho-dumo,’ modobo ie Iesu beda sosoro goroho nimo ibo koroho. Nimo umoro neido koi ie ibo nimo Iesu mutu e.

Urubia nirimagare aise gi-imati-ri

⁷Nirimagare babio mo ro orio sabi owera iatiti pua nio aboto, nedi atu owera ro nio ro keba se ta-girorowai-rimo.⁸Kaupoti iedi orio sabi owera ro orio na ie, mabu Iesu nou simara durupi to nirimagare ta-gowapotai-ro ina nio abato edi nirimagare ro tiamo, nio ro nou owawuti-dumo. Mabu ubauba tanaro duwoduwo maumo ato na-isioidiro-dumo Iesu edi mea woroworo ro nou ro womu to amadi-osutai-ri.

⁹Etu ro karo ra ibo, ‘Mo Godi edi mea woroworo ro nato nomidiro,’ kaupoti nou serawo na-woi arua urubia aboto, iedi dubu ro Godi edi mea woroworo ro nato omidiro pua, nou ubauba duwoduwo maumo ato omidiro.¹⁰Etu ra kimibiria neama nirimagare na-emati, nou Godi edi mea woroworo ro nato omidiro, nou Godi edi mea gabo ro neido aratateai-ri pua.¹¹Kaupoti etu ra serawo na-owamo kimibiria neama aboto nou idaibo sosoro ie urubia dubu duwoduwo maumo ato na-waratowouti, kotoburio moro iauri pua, mabu edi duwoduwo ro nou nou ro atowouti.

¹²Merebusere nirimagare babio, nedi owera ro nio aboto nisioidiro mabu nio Iesu ro gabo na-gimesioidiro nio ubauba Godi ro ta-gimatopeamuti.

¹³Abeamio, nio aboto nisioidiro mabu nio keba se umoro ta-goi-rimo edi dubu ro keba ia keba ia tau ato na-imidirotiti, nou Iesu e.
Orio urubia, nio aboto nisioidiro mabu nio ro Satani ta-gowororuwo-rimo.
Merebusere, nio aboto nisioidiro mabu nio Abera Godi umoro ta-goi-rimo keba se.

¹⁴Abeamio, nio aboto nisioidiro mabu nio umoro ie keba ia keba ia tau ato edi dubu ro na-imidirotiti.
Orio urubia, nio aboto nisioidiro mabu nio niro turi aramirio-dumo, Godi edi owera ro nio niro turi ato tiamo, ibose Satani nio ro ta-gowororuwo-rimo.

¹⁵Etio abato iamo ubi sopu duriomoro tanaro kisioidiro aboto io idaibo ie Abera nirimagare neio ro emati pua. Ubi auna se iamo mamo duriomoro tanaro kisioidiro aboto,¹⁶edi tanaro ro duriomoro urubia ro na-isioidiro-dumo, idaibo ie durupi ubi tanaro kisioidiro, arua urubia nakomu aboto kimaragoidiro, ibose simara namabu sirio sapuwo to keremowabu.
Idaibo sirio tanaro Abera aboudo pua, duriomoro tanaro ie.

¹⁷Sopu duriomoro simara ubauba ubi tanaro sirio mutu aupise ie womu to korosutai. Kaupoti Godi ubi tanaro etio ro isioidiro-dumo neio ro ama-irowomidirotiti-ri womu tato womu tato imese tau.

Mea se Iesu nasa rubi toroho-dumo

¹⁸Merebusere nirimagare babio, womu tau aupise ou-die, nio ro keba se owera ta-girorowai-rimo ibo Iesu nasa dubu aupise ie amadi-orowapotai-ri, ibose abora Iesu nasa urubia ta-gorowapotai-dioumo, ina noudo ie nimo umoro ta-noi-dumo ibo abora womu tau aupise ou-die.¹⁹Nedi nasa urubia ro nimo kimibiria urubia edi soirio ro neio neido gosuwoduti-rimo, neio nimo morobise kimibiria borubi pua. Neio nimo morobise kimibiria borubi rasiri ie neio nimo mutu ba-sorowomidiro. Kaupoti neio ta-gosuwoduti-rimo noti gorowapotai-dioumo neio nimo morobise kimibiria borubi pua.

²⁰Ina nio sapuwo to, Tarena Urio nio abato tomidiro Iesu ro na-gemeiriai-ro, ina noudo ie nio ro morobise umoro ta-gimade-rimo.²¹Etou mabu rido nisioidiro nedi owera ro nio aboto? Nio ro morobise umoro imade pua, nou ri ra? E e, mabu nio morobise umoro ta-gimade-rimo, ibose nio umoro ta-goi-rimo ibo morobise owera rido ata karasaubuti owera ata osuruwo-ri pua.²²Karasaubuti urubia etio ra? Urubia etio ra na-waro-dumo ibo, ‘Iesu Godi ro kohodowa dubu pua’, idaibo sosoro urubia karasaubuti urubia ie, io neio Iesu nasa urubia ie, Abera mere Iesu atu se neio ro ibeiouti-madumo.²³Godi edi mere ro etio ro ebeiouti-dumo, Abera neio mutu omidiro pua. Etio ra paea se na-imowauti-dumo ibo ‘Iesu Godi ro Kohodowa Dubu e’, Abera neio mutu timidirotiti.

²⁴Keba se nio ro morobise owera na-girorowai-rimo nou se ba-miamotiti nio abato. Nedi owera ro nio abato nama-iamo-ri Iesu nou Abera mutu nio neitiro abato ama-irowomidiro-ri.²⁵Iesu ro keba se ta-gutura womu tato womu tato keremiro nimo abato ama-iamotiti-ri.

²⁶Iedi urubia ro nio na-isaubuti-dumo, mo ro neio sapuwo to nisioidiro nedi owera ro.²⁷Ina nio sapuwo to Tarena Urio nio abato tomidiro Iesu ro na-gemeiriai-ro. Modobo pua ata sosoro kitamudiro dubu nio nou ro kitamudiro aboto, mabu Tarena Urio nio abato tomidiro nio nou ro itamudiro. Tarena Urio karasaubuti pua, morobise ie, nou ro ata owera ata owopirowa pua, nio nou ro mea ia se itamudiro. Nio Tarena Urio ro beda sosoro to itamudiro, nio Iesu abato se ba-diateidiro-mo.

Godi merebusere etio ra Satani merebusere etio ra

²⁸Merebusere nirimagare babio, Iesu abato se gi-ateidiro-ri mabu nio idaibo tanaro namadimi-isioidiro-ri, Iesu edi tau ato namadi-orowameai-ri nio kamade mutu ama-orowotoi-ri, siripo ri imatarumawado-ri pua.²⁹Nio umoro tiamo ibo Iesu Keriso nou tuputupu dubu e. Ibose nio morobise umoro kiamo modobo ie ibo nio abato etio ra mea tuputupu tanaro na-isioidiro-dumo, neio Godi ro simara merebusere to ta-giapoi.