Read Katagarda ka Zafaniya 2

Katagarda ka Zafaniya2

Afada adama irala i Yahuda

¹Ɓolongi, ɓolongi a̱ ubuta̱ ute,a̱ɗa̱ uduniyan u na wi n wono ba,²kafu makyan ma na a zuwai ma yawa,kafu o loko ɗa̱ tsu kopo,kafu wupa u Vuzavaguɗu u ta̱wa̱ ɗa̱,kafu kanna ka wupa ka Vuzavaguɗu ka̱ ta̱wa̱ ɗa̱.³La̱nsa̱i Vuzavaguɗu,a̱ɗa̱ aza a na i goyoi ka̱ci ka̱ ɗa̱ aduniyan.a̱ɗa̱ na yi o kutono wila̱ u ni,la̱nsa̱i kasingai n kugoyo ka̱ci ka̱ ɗa̱,u gaꞋan ba o sokongu ɗa̱ a kanna ka wupa Vuzavaguɗu.⁴Likuci i Gaza yi ta̱ o kokpo ko vuza,Ashikelon wo okpo agali.I ta̱ o kuloko aza a Ashidodu n kanna a kaci,ka̱ta̱ a̱ mutsukpa̱ iɗika i Ekoron.⁵Ili ya atakaci i ɗa wa aza a na i o kuyongo a̱ ka̱kina̱ ka mala,a̱ɗa̱ uma e Keritiya.Kadanshi ka Vuzavaguɗu ki ta̱ a tsurala n avu,avu KanaꞋana, iɗika ya aza a̱ Filisitiya.I ta̱ a ku una wu,ko vuza u kubuwa n wuma ba.⁶Ka̱kina̱ ka mala, ki ta̱ o kokpo ubuta̱ u kaguɓa,wi ta̱ o ku okpo ubuta̱ wu nguɓi n ushiga wu nkyon.⁷Ka̱kina̱ ka mala ka ki ta̱ o kokpo ubuta̱ wu uka̱ni,wa aza a kagimi ka kpaꞋa ku Yahuda,ubuta̱ u na a kuyaꞋan kaguɓa.N kulivi a vaku lo,a iꞋuwa ya aza a Ashikelon.Vuzavaguɗu Ka̱shile ke le wi ta̱ a̱ kula̱na̱ le,wi ta̱ kpamu o kubonoko le n uciyi u le.

Afada adama a Mowabu n Amona

⁸<<M pana ta̱ ulami u na aza a Mowabu a yaꞋin, n ishikushi i na aza a Amona a yaꞋin,tsu na a yaꞋankai uma a̱ va̱ ulami,ɗa a yaꞋin a̱ra̱ɗi a danai i ta̱ a kulyaꞋa iɗika i uma a̱ va̱⁹<<Adama a nannai,mpa Vuzavaguɗu MalaꞋimili, Ka̱shile ki Isaraila,n danai, n kucina ta̱ n wuma u va̱,mayun Mowabu wi ta̱ o kokpo tsu Sodom,Amona tamkpamu tsu Gomora,iɗika ya yi ta̱ o kokpo ubuta̱ wa awana,n enle a mkpaɗi a na a buwa n ugaꞋin ba ko wannai.Uma a̱ va̱ a na a buwai i ta̱ a̱ ku pura̱ ucanuku u le,a lyaꞋa uka̱ni u le.>>¹⁰Na ɗa katsupu ka na a̱ kuciya̱ adama a̱ a̱ra̱ɗi e le,adama a ishikushi n ulami u na a yaꞋankai uma a Vuzavaguɗu MalaꞋimili,¹¹Vuzavaguɗu wi ta̱ o ku okpo ili i wovon we ele,wi ta̱ a ku una a̱ma̱li aduniyan ra̱ka̱,yaba dem aduniyan wi ta̱ a̱ ku kuɗa̱ngu wa̱ a̱ ni,a ubuta̱ u na wi n iɗika yi uduniya u na u buwai.

Afada adama a iɗika i Kushi

¹²A̱ɗa̱ aza a̱ Kushii ta̱ a ku una ɗa̱ n kotokobi.

Afada adama a Asiriya

¹³Vuzavaguɗu wi ta̱ a̱ kuba̱rukpa̱ kukiye ku ni u shilika̱ n uɓon u gaɗi,wi ta̱ a ku una Asiriya,wi ta̱ o kubonoko Niniva agali,uɗekpu tsu kakamba.¹⁴Ushiga wi ili i kuzuwa wi ta̱ a kuvaku e mere,nu nnama n kakamba dem.Asakali n ma̱kpa̱tuwa̱n,i ta̱ o kuyongo a̱ kumiꞋi ku ni.Ma̱shi ma̱kpa̱tuwa̱n a̱ kuta̱ n katusu,ma agawun tamkpamu a̱ utsutsu,i ta̱ a kupalukpa kukpa̱Ꞌa̱,a̱ ka̱sukpa̱ ogboli a nɗanga n sida e keteshe.¹⁵Na ɗa likuci yi shi n tsugbayin,i na yi shi n ma̱ta̱na̱.I na i tsu danaka ka̱ci ka̱ ni,<<Vuza vu yoku wi lo ba mpa ɗa koci.>>la̱na̱ tsu na wo okpoi agali,ubuta̱ wi ivaꞋin yi nnama n kakamba.Vuza na baci u walai lo dem,wi ta̱ a kuyaꞋan ka̱curu, ka̱ta̱ u gba̱ɗa̱ kaci.