Read Katagarda ka Zafaniya 1

Katagarda ka Zafaniya1

Kanna ka afada a Vuzavaguɗu wa aza a Yahuda

¹Vuzavaguɗu u yaꞋin kadanshi n Zafaniya kolobo ka̱ Kushi, matsukaya ma Gedaliya, vuza na esheku a̱ ni Amariya, maku ma Hezekaya, a ayin a na Josaya kolobo ka Amon wi o tsugono tsu Yahuda.²Vuzavaguɗu u danai,<<Mi ta̱ a ku una ili ra̱ka̱,a aduniyan.>>³<<Mi ta̱ a ku una uma nu nnama dem,Mi ta̱ a̱ ku una nnu n gaɗi,n adan a mala,mi ta̱ kpamu a̱ ku una aza a gbani-gbani n a̱ma̱li e le,ka̱ta̱ m pura̱ngu vuma vu lima̱ aduniyan.>>⁴<<Mi ta̱ a̱ kuba̱rukpa̱ kukiye ku va̱ n yaꞋan tsurala n Yahuda,n aza a na i a̱ ida̱shi a Urushelima dem.A̱ ubuta̱ u nanlo ɗa mi a ku una aza a na a buwai a kucikpa ka̱ma̱li ka Balu,n ula a anan ganu va̱ a̱ma̱li a nanlo.⁵Mi ta̱ a ku una aza a na a tsu kumba gaɗi vu kukpa̱,a cikpa kanna n wotoi n azangata.Mi ta̱ a ku una aza a na a̱ tsu kuɗa̱ngu a kucina n Vuzavaguɗu,i kpamu a kucina n ka̱ma̱li ka Moleka.⁶Mi ta̱ a ku una aza a na o bonoi n ka̱ca̱pa̱,a̱ ka̱sukpa̱i kutono Vuzavaguɗu,n aza a na a̱ kpa̱ɗa̱i kula̱nsa̱ ili u Vuzavaguɗu,kpamu a̱ la̱nsa̱ kusheshe ku ni ba.>>⁷Paɗa bini e kelime ka Vuzavaguɗu Ka̱shile,adama a na kanna ka Vuzavaguɗu ka yawa ta̱ ɗevu,Vuzavaguɗu wi ta̱ kufoɓuso kanna ka afada,kpamu u zagba ta̱ aza a na a kuyaꞋan a ɗa,⁸A kanna ka nanlo, mpa Vuzavaguɗu,<<Mi ta̱ a kutakacika aza e kelime n aza o tsugono,n aza a na i o kutono kuyongo ki iɗika yi uduma.⁹A kanna ka nanlo mi ta̱ a kutakacika,aza a na a banai a̱ ubuta̱ u ka̱ɗiva̱ ka̱ a̱ma̱li, n ele na a shatangi iꞋuwa yi nva̱li ma̱ a̱ma̱li n le,n ukuna u modoruko n kalyaꞋa.¹⁰Vuzavaguɗu u danai, <<A kanna ka nanlo,i ta̱ a kupana ma̱shi na ɗe a̱ Utsutsu u Kadan,a pana yoroli ɗe a kakambu ke ire,n izumgbi yi ili o kuɓososo a gaɗi vu nsasan.¹¹Shika̱i, a̱ɗa̱ na yi ida̱shi a uɓon u kuden ku Morota,adama a na i ta̱ a ku una aza a tsulaga ra̱ka̱,n edengi azanariya n azurufa ra̱ka̱ i ta̱ a ku una le.¹²A ayin a nanlo mi ta̱ a̱ kula̱nsa̱ Urushelima nu nkuni,mi ta̱ a kutakacika aza a na a tsu zuwaka nu ukuna ba,aza a na a tsu dana a̱ɗu e le,<Vuzavaguɗu wi a kuyaꞋanka tsu kasingai ba,ko u yaꞋanka tsu i gbani-gbani ba.>¹³I ta̱ a̱ kupura̱ uciyi u le,ka̱ta̱ o ɓoso iꞋuwa i le,ko a na wo okpoi a maꞋa ta̱ iꞋuwa,ama a̱ kuda̱sa̱ngu punu ba,i ta̱ a kucimba ashina a itacishi,ama o kusoꞋo ma̱kya̱n ma ba.>>

Kanna ka gbayin ka Vuzavaguɗu

¹⁴Kanna ka gbayin ka Vuzavaguɗu ka yawa ta̱ ɗevu,ka yawa ta̱ ɗevu ɗa kpamu ki a̱ kuta̱wa̱ gogoꞋo.Izumgbi i kanna ka Vuzavaguɗu yi ta̱ n okono,a kanna ka nanlo keyevi ko kuvon ki ta̱ a̱ kushika̱ ka̱u.¹⁵Kanna ka nanlo ki ta̱ o ko okpo kanna ka wupa,kanna ku una̱mgbuka̱tsuma̱ n atakaci,kanna ka̱ munuka n kula̱nga̱su,kanna ka̱ ka̱yimbi ka kpaɓam,kanna ke eleshu n ka̱yimbi ka gbayin,¹⁶kanna ka̱ ku uvula̱ avana n isali i kuvon,adama a̱ likuci yi ukanji n nshilya mu ugaɗi.¹⁷Mi ta̱ a̱ ku tuka̱ n atakaci a̱ ubuta̱ u uma,ali a wala tsa̱ a̱yimba̱,adama a na a nusaka ta̱ Vuzavaguɗu,i ta̱ a̱ kutsuwa̱n mpasa tsu mini,inyama yi ikyamba i le an tsuta̱.¹⁸A kanna ka wupa ka Vuzavaguɗu,azanariya ko azurufa e le,a kufuɗa ku isa le ba.A̱ ka̱tsuma̱ ka̱ usuɗukpi u cisheꞋe u ni,aduniyan dem i ta̱ a kuyaꞋan wu uni,wi ta̱ a̱ kutuka̱ n uteku wa aduniyan gogoꞋo lo.