Read Ishipa i Sulemanu 1

Ishipa i Sulemanu1

¹Ishipa i Sulemanu i na i laꞋi n uyoꞋo.

Vishipa vu ugiti

²YaꞋan u como mu n una̱ u niadama a na ucigi u nu u laꞋa ta̱ ma̱kya̱n uyoꞋo.³Ma̱gula̱ni ma maniꞋin ma̱ nu, mi ta̱ n ugaꞋin u kutsumgba,kula ku nu tana ki ta̱ ci ili i ma̱gula̱ni i na a vishangi.ɗaɗa i zuwai ɗa a̱ma̱ci i a kuciga wu.⁴YaꞋan gogoꞋo vu ɗika mu tsu suma,yaꞋan mogono ma banka mu a̱ kunu ku ni,Ci yaꞋan ma̱za̱nga̱ koɓolo,mi ta̱ a kucikpa ucigi u nu u laꞋa ma̱kya̱n,ɗaɗa i zuwai nkere mi a kuciga wu.⁵Mpa vuza lima̱ ɗa, ama mi ta̱ n tsuloboi.a̱ɗa̱ nkere n Urushelima,mpa vuza lima̱ ɗa tsu a a̱pa̱m e Kedaru,tsu kakashi ku utsutsu ka̱ ka̱pa̱m ka Sulemanu.⁶Ka̱ta̱ yi inda mu bi-bi-bi baadama a na mpa vuza lima̱ ɗa,adama a na kanna kaꞋa ko songu mu ta̱ ɗa n lima̱na̱i.Ataku a̱ va̱ a yaꞋan ta̱ wupa nu mpaa zuwai mu n yaꞋan ulinga a kashina ki itacishi,n ciya̱ makyan ma na n kula̱na̱ ikyamba i va̱ ba.⁷Dana mu, avu macigi ma̱ va̱, teɗai vi a kaguɓa ka ushiga u nu?Kpamu teɗai vu tsu banka n ushiga u nu wu uvuka kanna ka suɗukpa baci?Yiɗa̱i i zuwai mo kokpo tsu vuka vu na a palaia̱ ka̱ka̱ra̱sa̱ a ushiga wa̱ a̱ja̱Ꞌa̱ a̱ nu?⁸Avu na vu laꞋi n tsuloboi a̱ ka̱tsuma̱ ka̱ a̱ma̱ci, vu yeve baci ubuta̱ ba,tono ura̱Ꞌa̱ wu nlala n na o tsu tonovu guɓa nraɗika n nuɗevu n a̱pa̱m a nguɓi.⁹Avu macigi ma̱ va̱,tsuloboi tsu nu u pura̱ ta̱ ugboji u va̱,tsu kodoku ka na ki o kurono ucanukuwe ekeke odoku o kuvon a FiriꞋauna.¹⁰Ili ya atsuvu i doku ta̱ nguji n nu ugaꞋin,kuɗeku ku nu ki ta̱ ucindali n idolu i singai.¹¹Ci ta̱ a kuyaꞋanka wu ili ya atsuvu ya azanariya,n ukali wa azurufa.¹²A makyan ma na mogono mi a̱ ubuta̱ u kirukpa ku ni,ili ma̱gula̱ ni i va̱ i ka̱na̱ ta̱ ubuta̱ dem m ma̱gula̱ni.¹³Macigi ma̱ va̱ mi ta̱ tsu kazuwatsu ma Muru wa̱ va̱,a ivaꞋin a̱ ma̱ka̱nga̱ ma̱ va̱.¹⁴Macigi ma̱ va̱ mi ta̱ tsu ka̱kutsu ka̱ a̱pa̱lu a kakamba wa̱ va̱ashina itacishi i Enu-gedi.¹⁵Avu vi ta̱ n tsuloboi macigi ma̱ va̱.Mayun, avu vi ta̱ n tsuloboi.A̱shi a̱ nu i ta̱ kure-kure tsu moɗoi.¹⁶Avu vi ta̱ n tsuloboi, Macigi ma̱ va̱.Avu vi ta̱ a kuɗika ugboji u va̱.ivaꞋamkpatsu i tsu yi ta̱ leku an mita̱ ma̱ ta̱ku.¹⁷Aburakpatsu a kpaꞋa a̱ tsu nɗanga n sida n ɗa,nɗanga n Firi n ɗa ashamkpatsu a kpaꞋa a tsu.