Read Katagarda ka ISHAYA 48

Katagarda ka ISHAYA48

Ugbamukaci wa aza a Isaraila

¹<<Panai ili i nampa, a̱ɗa̱ aza a kpaꞋa ku Yakubu,a̱ɗa̱ na e ci ɗeke n kula ka aza a Isaraila,ɗa yu uta̱i a tsukaya ci Yahuda,ɗa kpamu i kucinai n kula ku Vuzavaguɗuali ɗa i ɗekei Ka̱shile ki Isaraila,ama ba mayun ɗa i yaꞋin nannai ko n usuɓi ba,²a̱ɗa̱ na i ci ɗeke ka̱ci ka̱ ɗa̱ aza a ida̱shi a iɗika i ciɗa,ɗa kpamu i nekei katsura u Ka̱shile ka aza a Isaraila,Vuzavaguɗu MalaꞋimili ɗa kula ku ni.³N dana ta̱ ɗe ukuna wi ili i cau m megeshe ma ɗe,una̱ u va̱ u ɗa u dansai kaꞋa, ɗa kpamu n zuwai uma e yevei kaꞋa,ɗa n yaꞋin gogoꞋo n yaꞋin kaꞋa ɗa ta na yu uta̱i nannai.⁴Adama a na n yeve ta̱ tsu na yi n ugbamukaci,eɗeku a̱ ɗa̱ ugbami ci iyum,a̱ca̱n a̱ ɗa̱ feu utsura ci iyum i shili.⁵Adama a nannai n dana ɗa̱ ta̱ ili i nampa ali n ayin a ɗe,kafu i ɗa i ta̱wa̱ n dana ɗa̱ ta̱ i ɗaadama a na ka̱ta̱ i kpa̱ɗa̱ kudana,<A̱ma̱li a̱ va̱ a ɗa a yaꞋin le,a̱ma̱li a̱ usheꞋwi a̱ va̱ koɓolo n a̱ma̱li a̱ iyum a̱ va̱ a ɗa a zuwai le.>⁶I pana ta̱ ili i nampa, indanai i ɗa.Ya̱ kushuku n i ɗa ba?<<Ili i na i ɗikai anana mi ta̱ a kudana ɗa̱ ukuna u savu,ili yu usokongi i na ka̱ta̱ i saꞋwai kuyeve ba.⁷Gogo na ɗa a yaꞋin i ɗa, ka̱ta̱ i ɗa i yaꞋan megeshe ba.I saꞋwa kupana i ɗa ba sai anana.Babu tsu na i kudana,<E, n yeve ta̱ tsu na i.>⁸I saꞋwa kupana ba, i saꞋwa feu kuyeve ba,ali n ayin a cau atsuvu a̱ ɗa̱ a saꞋwa kuɓa̱yuwa̱ ba.Adama a na n yeve ta̱ tsu na yi n kawuya,e ci ɗeke ɗa̱ ta̱ kpamu aza a ugbamukaci ali kafu a matsa ɗa̱.⁹Adama a kula ku va̱ ɗa n ka̱na̱i wupa u va̱,adama a na n ciya̱ ucikpi ɗa m kpa̱ɗa̱ta̱ngi i na mi ishi a kuyaꞋanka ɗa̱,ta lo ma takpa ɗa̱ a̱ ubuta̱ u va̱.¹⁰La̱na̱i, n luwa̱ ɗa̱ ta̱, ama ba tsa azanariya ba,n kondo ɗa̱ ta̱ e kenle ka atakaci.¹¹Adama a̱ ka̱ci ka̱ va̱, e, adama a̱ ka̱ci ka̱ va̱, ɗa n yaꞋin ili i nampa.Nini ɗai n kuka̱sukpa̱ kula ku va̱ ku na̱mgba̱?Mpa me kupece tsugbayin tsu va̱ n vuza ba.¹²<<Panaka mu, avu Yakubu,n Isaraila, avu na n ɗekei.Mpa ɗa,mpa ɗa ugiti, mpa ɗa kpamu ukocishi.¹³Ekiye a̱ va̱ a ɗa a varai kumi ka aduniyan,ɗa kukiye ku usingai ku va̱ ku poloi gaɗi,n ɗeke le bacia̱ tsu uta̱ ta̱ ka̱ta̱ a shamgba koɓolo.

¹⁴<<Ta̱wa̱i koɓolo dem vu ɗa̱, ka̱ta̱ i pana.Ka̱ma̱li ke ne ka i ka saꞋwai kudansa ili i nampa?Mpa Vuzavaguɗu n ciga yi ta̱,wi ta̱ a kushatangu ulinga u ni a Babila,kukiye ku ni ki ta̱ o kokpo tsurala n aza a Babila.¹⁵Mpa, Vuzavaguɗu n dansa ta̱,mayu, mpa ɗa n ɗekei ni.Mi ta̱ a̱ kuta̱wa̱ n a̱yi,ka̱ta̱ ta na u shatangu ili na u cigai kuyaꞋan.

¹⁶Ta̱wa̱i ɗevu nu mpa ka̱ta̱ i pana ukuna u nampa.<<Ali n kadanshi ka na n gita̱i kuyaꞋan n yaꞋan kaꞋa usokongi ba,a ayin a na ili i nanlo i yaꞋin mpa mi ta̱ ɗe.>>Gogo na ta na Vuzavaguɗu Ka̱shile u suku mu ta̱,koɓolo n ayinviki a singai a̱ ni.

¹⁷Ili i na Vuzavaguɗu u danai i ɗa na,Ka̱shibi ka̱ ɗa̱, Vuza ciɗa vi Isaraila.<<Mpa ɗa Vuzavaguɗu Ka̱shile ka̱ ɗa̱vuza na u tsu yotsongu ɗa̱ i na i gaꞋin ɗa̱,a̱yi na u tsu tono n a̱ɗa̱ a uye u na i kuwala.¹⁸Ishi baci i yeve ɗa i zukai mayin n wila̱ u va̱,ma̱ta̱na̱ ma̱ ɗa̱ mi ishi ta̱ o kokpo an kuyene,ka̱ta̱ usuɓi u ɗa̱ feu wo okpo tsa aɓau a mala.¹⁹Muku n nu mi ishi ta̱ o kokpo tsu kayala,ka̱ta̱ ntsukaya n nu tamkpamu mo okpo tsu ushen wi ili i kashina i ni,ula e le a kusaꞋwa kuyaꞋan utakpi ba,ko a yaꞋan ula̱nga̱shi wa̱ va̱.>>

²⁰Uta̱i punu a Babila,sumai i ka̱sukpa̱ aza a Kaldiya.Salai kakuna ka nampa m ma̱za̱nga̱ ma kacaꞋa,ka̱ta̱ i dansa kaꞋa.Suki kaꞋa daꞋin a uteku wa aduniyan,i dana, <<Vuzavaguɗu u shiba̱ ta̱ kagbashi ka̱ ni Yakubu.>>²¹Ele a pana kakuli ko yoku a ayin a na Vuzavaguɗu u tonoi n ele e meremune ba,u zuwai mini mu uta̱i le a kakpanlai,u ɓosoi kakpanlai kaɗa mini mu uta̱i punu.

²²Ɗa Vuzavaguɗu u danai, <<Vuza va asuvawuya wa̱ kuciya̱ ma̱ta̱na̱ ba.>>