Read Katagarda ka ISHAYA 45

Katagarda ka ISHAYA45

Sairusu ili yu ulinga i Ka̱shile.

¹I na Vuzavaguɗu u danai Mazagbi ma̱ ni i ɗaɗa na,a̱yi Sairusu, vuza na n ka̱na̱i kukiye ku usingai ku ni adama a nau lyaꞋa aduniyan n kuvon,ka̱ta̱ u takpa utsura wu ngono,ka̱ta̱ a̱ ɓa̱yuwa̱ka̱ yi utsutsu u na babu vuza na ukuɓa̱ya̱ngu u ɗa.²<<Mpa n kulaza ta̱ kelime ka̱ nuka̱ta̱ n sa̱ra̱ nsasan,n fa̱da̱ kpamu utsutsu u na a yaꞋin n iyum i shili,ka̱ta̱ m gbatya aburakpatsu a̱ iyum miri-miri.³Mpa n kuneke wu ta̱ kawalatsu,n uciyi u na wi a̱ ubuta̱ wu usokongi,adama na vi yeve a na mpa ɗa Vuzavaguɗu,Ka̱shile ki Isaraila, vuza na u ɗekei nu n kula ku nu.⁴<<Adama a kagbashi ka̱ va̱ Yakubu,n Isaraila vuza na n zagbai,n ɗeke wu ta̱ n kula ku nu,ɗa n neꞋi nu kula ku tsugbayin,ko a na vi yevei mu ba.⁵Mpa ɗa Vuzavaguɗu, vuza yoku wi lo kpamu ba,Ka̱shile ki lo ba sai mpa koci,n neke wu ta̱ katsura,ko a na vi yeve mu ba,⁶adama a na uma e yeve,a ili i na i ɗikai a kasana ali a kubana a̱ ka̱livi,vuza yoku wi lo ba sai mpa.Mpa ɗa Vuzavaguɗu, vuza yoku wi lo kpamu ba.⁷Mpa ɗa n yaꞋin kutashi ɗa kpamu n yaꞋin ka̱yimbi,mpa ɗa n yaꞋin kasingai n kawuya,Mpa ɗa Vuzavaguɗu, vuza na u yaꞋin ili i nampa ra̱ka̱.

⁸<<Avu gaɗi, yaꞋan ukuna u kasingai,yaꞋan eleshu a̱ tuka̱ n kaꞋa a iɗika.YaꞋan iɗika i ɓa̱yuwa̱ n wanshi,adama a na wishi u yimkpa,yaꞋan usuɓi u gbonguro n kaꞋa,mpa Vuzavaguɗu ɗa n yaꞋin i ɗa.

⁹<<Ili ya atakaci i ɗa u vuza na u shamgbai a kanananai n vuza na u yaꞋin ni,Ili ya atakaci i ɗa mogbodo ma na ma yaꞋan kanananai n kamaꞋi ka̱ ni,ko ciꞋin ci ta̱ kece kamaꞋi,<Yiɗa̱i vi a kuyaꞋan?>Ko kpamu avu vi yeve,ulinga u nu ba?>¹⁰Ili ya atakaci i ɗa u vuza na u kudana esheku a̱ ni,<Yiɗa̱i i zuwai ɗa vu matsai mu?>Ko u dana a̱na̱ku a̱ ni,yiɗa̱i vu matsai?>

¹¹<<Ili i na Vuzavaguɗu u danai i ɗaɗa na,Vuza Ciɗa vi Isaraila, n vuza na kpamu u yaꞋin ni,ka̱ta̱ ve ece mu ukuna wi ili i na yi lo a̱ kuta̱wa̱, adama a̱ ukuna wu muku n va̱ ba,ko kpamu vu dana mu ili i na i gaꞋin n yaꞋan?¹²Mpa ɗa n yaꞋin aduniyan,ɗa n yaꞋin kpamu vuma punu.N ekiye a̱ va̱ a ɗa n yaꞋin gaɗi,ɗa kpamu n zuwai ili i na yi ɗe va dem.¹³Vuzavaguɗu MalaꞋimili u danai, Mpa n kuɗa̱ngusa̱ ta̱ Sairusu adama a na u shatangu ulinga u kasingai u va̱,mi ta̱ a kuzuwa nwalu n ni ra̱ka̱ n yaꞋan derere.Wi ta̱ a kumaꞋasaka likuci i va̱ka̱ta̱ u shikpa agbashi a̱ va̱,u kuyaꞋan nannai va adama ikebe ko n katsupu ko yoku ba,i ɗaɗa i na Vuzavaguɗu malyaimili u danai>>¹⁴Ili i na Vuzavaguɗu u danai i ɗa na,<<Uciyi wa aza a Masar n aza a tsulaga a Kush,koɓolo n wa aza a uɓon u gaɗi,koɓolo n uma a ugaɗi a Sabinai ta̱ a̱ kuta̱wa̱ wa̱ ɗa̱ ra̱ka̱ka̱ta̱ okpo aza a̱ ɗa̱.I ta̱ a̱ kuta̱wa̱ koɓolo n aza a tsulaga e le ra̱ka̱,ka̱ta̱ o tono ɗa̱ kucina̱,ushiyi n ikani i tsugbashi.I ta̱ a̱ kukuɗa̱nku ɗa̱ka̱ta̱ o folono ɗa̱ a̱ ka̱na̱ kudana,<Mayun Ka̱shile ki ta̱ koɓolo n a̱ɗa̱, babu kpamu vuza yoku,Ka̱shile ko yoku ki lo ba.> >>

¹⁵Mayun, avu Ka̱shile kaꞋa ka na ko tsu sokongu ka̱ci ka̱ ni,avu Ka̱shile ki Isaraila n Kishi.¹⁶A yaꞋin a̱ a̱ma̱li ra̱ka̱ i ta̱ a kuyaꞋan wono, ka̱ta̱ o okpo n kugoyi,i ta̱ a̱ kuyikpa̱ o wono ra̱ka̱.¹⁷Ama aza a Isaraila i ta̱ a̱ kuciya̱ wishi a̱ ubuta̱ u Vuzavaguɗun wishi babu kukotso,a̱ɗa̱ ya kuyaꞋan wono ba,ko ta na i ciya̱ kugoyi ku na ka̱ kukpa̱ɗa̱ kukotso.

¹⁸Ili i na Vuzavaguɗu u danai i ɗa na,a̱yi na u yaꞋin gaɗi,a̱yi ɗa Ka̱shile.A̱yi ɗa u foɓusoi tsu na u kuyaꞋan aduniyan,a̱yi ɗa u yaꞋin a ɗa,u yaꞋan a ɗa tsu na a ɗa o kokpo lekeɗi ba,ama u yaꞋin a ɗa adama a na uma o yongo punu.Ɗa u danai,<<Mpa ɗa Vuzavagɗuvuza yoku wi lo kpamu ba.¹⁹N yaꞋan kadanshi ka̱ va̱ usokongia̱ ubuta̱ u ka̱yimbi ba.Mpa mi ishi a kudana ntsukaya n Yakubu,<Ka̱ta̱ i la̱nsa̱ mu gbani ba, ishi baci a̱ kuciya̱ mu ba,Mpa Vuzavaguɗu n tsu dansa ta̱ ili i na yi i mayun,ka̱ta̱ kpamu n sala ukuna u na wi derere.

²⁰<<Ɓolongi ka̱ci ka̱ ɗa̱ ka̱ta̱ i ta̱wa̱,yawai ɗevu, a̱ɗa̱ vu na i laꞋakai n wuma a aduniyan.Umici u ɗa wi o kuforo aza a na a ci ɗika a̱ma̱li a na a yaꞋin nu nɗanga a̱ kuka̱ra̱ka̱,ele vu na a tsu vasa u ka̱ma̱li ka na ka ci isa vuza ba.²¹Dansai ili i na yi lo, tuka̱i n ukuna wa,yaꞋan o goɗumo u ɗa koɓolo.Yayi u yaꞋin kene adama a ukuna u nampa n ayin a cau a ɗe,yayi u dansai kaꞋa m megeshe ma ɗe?Mpa ɗa ba, mpa Vuzavaguɗu?Babu Ka̱shile ko yoku ka na ki lo,Ka̱shile ku usuɓi n Kishi,vuza yoku wi lo ba sai mpa koci.

²²<<Bonoi wa̱ va̱ ka̱ta̱ i ciya̱ wishi,a̱ɗa̱ vu na yi dadaꞋin dem a aduniyan.Adama a na mpa ɗa Ka̱shile, vuza yoku wi lo kpamu ba.²³N kucuna ta̱ n kula ku va̱,n dansa ta̱ ukuna u mayun,mi o kubono ma̱ sa̱da̱kpa̱ kadanshi ka nanlo ba.A̱ka̱nga̱tsu dem i ta̱ a̱ kukuɗa̱nku mu,kelentsu ka yaba dem ki ta̱ a kudansa ukuna u singai.²⁴I ta̱ a kudana adama a̱ va̱,<Usuɓi n utsura u Vuzavaguɗu u ɗa wi koci.> >>Aza a na a yaꞋin wupa n a̱yii ta̱ a̱ kubana wa̱ ni ra̱ka̱ ka̱ta̱ okpo n wono.²⁵Ama u Vuzavaguɗu u ɗa ntsukaya mi Isaraila ra̱ka̱n kuciya̱ kasingai koɓolo n tsugbayin.