Read Katagarda ka ISHAYA 44

Katagarda ka ISHAYA44

Isaraila aza a na Vuzavaguɗu u zagbai

¹<<Ama gogo na pana, avu Yakubu kagbashi ka̱ va̱,Isaraila, avu na n zagbai.²Na ɗa i na Vuzavaguɗu u dansai,a̱yi vuza na u yaꞋin nu, a̱yi na u zuwai nu a̱ ka̱tsuma̱,a̱yi ɗa kpamu vuza na u ku ɓa̱nka̱ wu.Ka̱ta̱ vu pana wovon ba, avu Yakubu kagbashi ka̱ va̱,Jeshuru, avu na n zagbai.³Adama na mi ta̱ o kuyoꞋo mini a iɗika i ɗekpu,ka̱ta̱ kpamu n zuwa nyeneke a iɗika yu ɗekpu.Ka̱ta̱ mpa n zuwa ayinviki a̱ va̱ u muku n nu, una̱singai u va̱ kpamu u tsukaya tsu nu.⁴I ta̱ a̱ kuta̱ uteku tsu mita̱ a maɗanga a̱ ka̱kina̱ ka mini,uteku tsu maɗanga o kuɗolu ku na ki e kuyene.⁵Vuza yoku wi ta̱ a kudana n utsura, a̱yi vuma vu Vuzavaguɗu ɗa,vuza yoku kpamu ka̱ta̱ u ɗeke ka̱ci ka̱ ni n kula ku Yakubu,ka̱ta̱ kpamu vuza yoku u ɗana e kukiye ku ni, <Mpa vuza vu Vuzavaguɗu vu ɗa.>Ka̱ta̱ kpamu u ɗika kula ki Isaraila adanshi ku ni ku ɗa.>>

Vuzavaguɗu ka̱ma̱li ka ba

⁶<<Ili i na Vuzavaguɗu u danai i ɗaɗa na,mogono ma aza a Isaraila n vuza na u kushiba̱ uma, Vuzavaguɗu vo osoji a gaɗi. Mpa ɗa ugiti n ukocishi,Ka̱shile ko yoku ki lo ba, sai mpa.⁷Yayi wi lo tsu va̱?YaꞋan wu uta̱ u dansa,yaꞋan u dansa ka̱ta̱ wu uta̱ka̱ mu i ɗa e keteshe. U dana mu tsu na a yaꞋin ɗa n yaꞋin uma a caukoɓolo n i na i kuta̱wa̱,mayu yaꞋan u dana mu ili i na i kuta̱wa̱.⁸Ka̱ta̱ i jeꞋeke ikyamba ba,ka̱ta̱ kpamu i pana wovon ba. N saꞋwa kudansa ukuna u nampa ali ɗa n yaꞋin kene m megeshe ma ɗe adama a u ɗa ba?A̱ɗa̱ ɗa ngan n va̱. Ka̱shile ko yoku ki ta̱ lo, m ba mpa ba?Babu kakpanlai ko yoku, mpa n yeve ko yoku ba.>>

⁹Aza a na a yaꞋin a̱ma̱li dem ukuna u gbani u ɗa,ili i na kpamu a zuwakai katsura ya kuyaꞋan le ili ba.Ele vu na a gaꞋin a yaꞋanka le kadanshi a̱yimba̱ a ɗa,i ta̱ kpamu n tsulau ɗa okpoi n wono.¹⁰Yayi u sheꞋwei ka̱ma̱li ko u luwa̱i kululuku na ki e kuneke yi ili ba?¹¹N dana ɗa̱,a̱yi n aza a̱ ni ra̱ka̱ i ta̱ a kuyaꞋan wono, ayimi a ili uma ɗa.YaꞋan ra̱ka̱ vi le a gasa ka̱ta̱ a zagba i na i kuta̱ka̱ le.I ta̱ a kupana wovon, ka̱ta̱ ra̱ka̱ vi le a yaꞋan wono.

¹²Kawakana ka tsu ɗika ta̱ ucanuku wu ulinga,ka̱ta̱ u zuwa a kina u yuma ili.U tsu yima ta̱ ili ya m matalaka u ka̱na̱ kugbashai ɗa n utsura.Kambulu ka̱ ka̱na̱ yi baci u tsu okpo ta̱ babu utsura,kakuli ka̱ ka̱na̱ yi baci feu u tsu lima̱ ta̱.¹³KesheꞋwi ka tsu gisanku ta̱ maɗangaka̱ta̱ u zuwaka maꞋa urotu n ili yu ulinga i ni,ka̱ta̱ u sheꞋwe kaꞋaali kokpo an vuma vu singai.U yaꞋan yi tsu na a kuzuwa yi a kpaꞋa.¹⁴U tsu kapa ta̱ nɗanga n sida,ko kpamu u zagba nɗanga n sipuru ko maɗanga ma okuka̱ta̱ u ka̱sukpa̱ maꞋa mo gbonguro koɓolo nu nɗanga n kuntsu,ko u ca̱Ꞌa̱ nɗanga n sida ka̱ta̱ mini ma̱ Ka̱shile ma zuwa n ɗa m gbonguro.¹⁵N tso okpo ta̱ ili i kutasuku akina i vuma,u tsu kenuku ta̱ n yoku u tasuku akina a na u kunyashika,U tsu tasuku ta̱ akina a ka̱ta̱ u kangala boroji.Ka̱ta̱ kpamu u sheꞋwe ka̱ma̱li ka na u kucikpa,u bonoko kaꞋa ka̱ma̱li ka̱ta̱ u kuɗa̱nku kaꞋa.¹⁶Ka̱ta̱ u songu kagimi ka maɗanga ka a akina,adama a na u zungu inyamaKa̱ta̱ u doku u nyashika. Ka̱ta̱ u dana,<<Kai, akina a nampa yokpo ta̱.>>¹⁷Ka̱ta̱ kagimi ka maɗanga ka na ka buwai u bonoko kaꞋa ka̱ma̱li, ka̱ma̱li ka̱ ka̱ci ka̱ ni,u tsu kuɗa̱nku ta̱ kaꞋa ka̱ta̱ u cikpa kaꞋa.U tsu bana ta̱ u vasa ɗe ka̱ta̱ u dana,<<Isa mu, avu ɗa ka̱ma̱li ka̱ va̱.>>¹⁸E yeve ili ba, a fuɗa kpamu ukuna ba,adama a na a̱shi e le i ta̱ upali ɗa a̱ kpa̱ɗa̱i kufuɗa kenea̱ɗu e le dem a kufuɗa kuyeve ba.¹⁹Babu vuza na u coꞋokoi adama a na u sheshe,babu kpamu vuza na wi n kuyeve ko kufuɗa ku na u kudana,<<N yaꞋan ta̱ ulinga n kagimi ɗa n songi a akinaali ɗa n kangalai boroji vu va̱ n tsikina ci niɗa kpamu n zungi inyama n takumai.Nini ɗai n kubonoko kagimi ka ili yu unata?Kucikpa n kuɗa̱ngu n cikpa kogboli?>>²⁰Kokomo kaꞋa u tsu lyaꞋa, ka̱ɗu ka gbani-gbani ka̱ ni ka vakangi ni,adama a nannai wi a kufuɗa kisa ka̱ci ka̱ ni ba, ko u fuɗa u dana,<<Ili i na n ka̱na̱i e kukiye ku singai ku va̱ ka aꞋuwa ɗa ba?>>

²¹Ciɓa n ukuna u nampa, avu Yakubu koɓolo n Isaraila,adama na avu ɗa kagbashi ka̱ va̱.Mpa ɗa n yaꞋin nu, avu ɗa kagbashi ka̱ va̱.Avu Isaraila, mpa mi a kucinukpa n avu ba.²²Mpa n takpa ta̱ una̱mgbi u nu ce eleshu,ɗa kpamu n takpai unushi u nu ce egele a usana.Bono wa̱ va̱,adama a na mpa n shiba̱ wu ta̱ ɗe.>>

²³Gaɗi, cananai ishipa i ma̱za̱nga̱,dama a na Vuzavaguɗu ɗa uyaꞋin ili i nampa ya, orukpoi ka̱u,a̱ɗa̱ ɗaka vi iɗika.Ɓosongi ishipa, a̱ɗa̱ nsasan,koɓolo nu nɗanga n kutsun dem n na mi punu,adama a na Vuzavaguɗu u shiba̱ ta̱ Yakubu,ka̱ta̱ aza a Isaraila a cikpa yi.

Urushelima ɗa ubuta̱ wi ida̱shi u va̱

²⁴Ili i na Vuzavaguɗu u danai i ɗaɗa na,ka̱shibi ka̱ nu, a̱yi na u yaꞋin nu avu a̱ ka̱tsuma̱.<<Mpa ɗa Vuzavaguɗu,vuza na u yaꞋin ili ra̱ka̱,vuza na kpamu endeꞋen u ba̱rukpa̱i gaɗi,ɗa kpamu u poloi iɗika n ka̱ci ka̱ ni babu ka̱ɓa̱nki,²⁵<<Mpa ɗa m bonokoi nlum ma aꞋuwa ukuna u gbani,eneki kpamu okpoi alau.Vuza na u tsu bonoko eyevi ka̱ca̱pa̱ka̱ta̱ u zuwa kuyeve ku le kokpo tsulau,²⁶a̱yi na u tsu shatangu kadanshi ka kagbashi ka̱ ni,ka̱ta̱ kpamu u shatangu ukuna u na alingata a dansai,<<ele na a danai aza a Urishelima, <Uma i ta̱ o kubono n ida̱shi punu na kpamu>Iɗika i Yahuda tamkpamu, <I ta̱ a̱ kudoku kumaꞋasaka wu,ka̱ta̱ n ɗengusa̱ agali a̱ nu dem>²⁷vuza na u danai mala mu uga̱vi, <Ɗekpe,ka̱ta̱ kpamu n ɗekpetengu nyeneke n ɗa̱>²⁸Vuza na u danai Sairusu, <A̱yi ɗa maguɓi ma̱ va̱,wi kpamu a kushatangu kusheshe ku va̱ ra̱ka̱,wi ta̱ a kudana Urishelima, <<YaꞋan o doku a maꞋasaka yi,>>ukuna wa̱ a̱Ꞌisa̱ tamkpamu, <<YaꞋan a vara kumaꞋa ku ni.>>>