1La̱na̱, mogono mi ta̱ a kulyaꞋa tsugono tsu usuɓi,ka̱ta̱ ngono n lyaꞋa tsugono n kasingai.2Yaba dem wi ta̱ o kokpo tsu ubuta̱ u kusheɗeku adama a̱ wunla̱i wu utsura,n ubuta̱ u kusheɗeku adama a̱ mini ma atali ma munuka,uteku ci nyeneke m mini n na n ɗekpei a kakamba,an kulu ku kakpanlai ka gbayin a iɗika i ɗekpu.3Ka̱ta̱ a̱shi a aza a na i e kene a̱ kpa̱ɗa̱ kuyumba̱tsa̱sa̱ka̱,ka̱ta̱ kpamu atsuvu a za na i a kupana, a pana.4Vuza na wi n uremi u ka̱ɗu ba, wi ta̱ a̱ kuciya̱ kuyeve ka̱ta̱ u fuɗa,ka̱ta̱ kelentsu ka vuza vu cikeku ka fuɗa ka dansa mayin.5A buwa e kuɗeke kalau vuza vu ma̱riki ba,ko e ɗeke vuza vu kalyaꞋa vuma vu gbayin.6Adama a na kalau ka ci yaꞋan ta̱ kadanshi ka tsulau,ka̱ɗu ka̱ ni kpamu ki ta̱ ushani tukpa n kawuya,u ci yongo ta̱ a kuyaꞋansa ili i na yi i Ka̱shile ba,ka̱ta̱ u ka̱na̱ kuripula̱sa̱ uma adama a Vuzavaguɗu,aza a kambulu u ka̱sukpa̱ le lekeɗi,ka̱ta̱ aza a kakuli u ka̱sukpa̱ le n kakuli ke le.7Ama vuza vu kalyaꞋa, uteku u na u ci yaꞋan ili i ni wi ta̱ tukpa n kawuya,u ci yaꞋan ta̱ kusheshe ku wuyaadama a na u doro aza a unambi n kadanshi ka aꞋuwa,ko ufolu u le u singai u ɗa baci.8Ama vuma vu ma̱riki, u ci yaꞋan ta̱ kusheshe ku singai,n kusheshe ku singai ku ɗa kpamu u tsu shamgba.
A̱ma̱ci a Urushelima
9Ɗenga̱i, a̱ɗa̱ a̱ma̱ci a na yi ida̱shi i ka̱ci ka̱ ɗa̱,panai ka̱la̱ka̱tsu ka̱ va̱,a̱ɗa̱ nkere n na yi ida̱shi i ba̱ri,ka̱ta̱ i zuwaka mu atsuvu i pana kadanshi ka̱ va̱.10An ka̱ya̱ ka lazai,a̱ɗa̱ a̱ma̱ci a na yi ida̱shi i ba̱ri yi ta̱ e kujeꞋeke ikyamba,kutaɓa umaci wi itacishi u kusuɓa̱ ba,ka̱ta̱ kpamu i namba nɗanga n kutaɓa.11JeꞋekei ikyamba, a̱ɗa̱ a̱ma̱ci a na yi ida̱shi i ka̱ci ka̱ ɗa̱,jeꞋekei avangatsu, a̱ɗa̱ a̱ma̱ci a na yi ida̱shi i ba̱ri.Foɗosoi aminya a̱ ɗa̱,i shiya akashi a̱ a̱kyuꞋun a̱ ɗa̱.12Na̱mgba̱i a̱tsuma̱ adama a na a̱ la̱nga̱sa̱ ta̱ ashina a̱ ɗa̱ koɓolo ashina a itacishi a̱ ɗa̱,13adama a na iɗika i uma a̱ va̱ i matsa ta̱ awana n kerepu,na̱mgba̱i a̱tsuma̱ adama a na a̱ la̱nga̱sa̱ ta̱ iꞋuwa i ma̱za̱nga̱ i ɗa̱.14Adama a na i ta̱ a̱ kuka̱sukpa̱ kefeku ko mogono ka,likuci i na yi tukpa n uma yo okpo ta̱ agali,kaginda koɓolo n ubuta̱ u kindi wi ta̱ o kokpo ubuta̱ u ka̱rikpa̱ni ko wannai,ka̱ta̱ wo okpo ubuta̱ u ma̱za̱nga̱ wu njaki n kakamba n ilikuzuwa adama a kalina ka na a kuyaꞋan punu,15ali sai ayin a na a̱ suꞋuki tsu ayinviki na ɗe gaɗi,ka̱ta̱ kakamba kokpo iɗika i tsuta̱,ka̱ta̱ iɗika i tsuta̱ ya i matsa umaci n a̱bunda̱i.16A ayin a nanlo a ɗa a kuyaꞋan ka mayun ɗe a kakamba ka,ka̱ta̱ a yaꞋan feu ku usuɓi a iɗika i tsuta̱.17UgaꞋin u kuyaꞋan ki ili yu usuɓi wi ta̱ o kokpo ma̱ta̱na̱,ka̱ta̱ kpamu usuɓi u tuka̱ n ida̱shi i ma̱ta̱na̱ i babu uteku n windi mayin.18Uma a̱ va̱ i ta̱ o kuyongo a̱ ubuta̱ wi ida̱shi i ma̱ta̱na̱,asuvu a iꞋuwa i na yi babu kadama,n ubuta̱ u na wi n ka̱bini n windanai mayin.19Ko mini ma atali ma varukusu baci nɗanga n kakamba,ɗa likuci i ɓosoi ra̱ka̱-ra̱ka̱,20una̱singai u ɗa a kubana wa̱ ɗa̱,a̱ɗa̱ na yi a kuyaꞋan vica̱Ꞌa̱ vi icuꞋu i ɗa̱ ɗevu n kuyene,ɗa kpamu i ka̱sukpa̱i anaka ni njaki n ɗa̱ a kulina ba̱ri.
expand_more
The books couldn't be loaded. Check your connection and try again.