Read Katagarda ka ISHAYA 31

Katagarda ka ISHAYA31

Ili ya atakaci i ɗa wa aza na a zuwakai aza a Masar katsura

¹Ili ya atakaci i ɗa a kubana wa aza na a banai Masar kula̱nsa̱ uɓa̱nki,ɗa kpamu a zuwakai odoku utsura,ɗa a̱ ushuki n ka̱bunda̱i ke ekeke e lekoɓolo n utsura wa akumbi o odoku e le,ama ɗa a iwain kula̱nsa̱ uɓa̱nki u Vuza Ciɗa va aza a Isarailako kpamu a̱ la̱nsa̱ uɓa̱nki a̱ ubuta̱ u Vuzavaguɗu.²Ko n nannai a̱yi wi ta̱ n ugboji, wi kpamu a kufuɗa kutuka̱ n kawuya,a̱yi u tsu yaꞋansaka kadanshi ka̱ ni ba.Ama u tsu ɗa̱nga̱ ta̱ adama na u shilika̱ n iꞋuwa ya aza asuvawuya,koɓolo n aza na a̱ tsu ɓa̱nka̱ aza na a tsu yaꞋan ka gbani-gbani.³Aza a Masar uma a ɗa Ka̱shile kaꞋa i ba.Odoku e le kpamu ikyamba i ɗa nu mpasa, alijani a ɗa ba.Ayin a na baci Vuzavaguɗu u ba̱rukpa̱i kukiye ku ni adama a na u takacika le,ka̱ɓa̱nki ka ki ta̱ a̱ kuta̱ɗa̱tsa̱ ka̱ta̱ u yikpa̱,a̱yi kpamu vuza na a̱ ɓa̱nka̱i va wi ta̱ a̱ kuyikpa̱,ka̱ta̱ dem vu le a̱ niꞋwa̱n koɓolo.

⁴Ili i na Vuzavaguɗu u danai mu i ɗa na,<<Uteku tsu na kawu u ci yaꞋan yura̱wana ɗai u ka̱na̱ malala,ko ka̱bunda̱i ka nguɓiko o ɓolongu baci adama a̱ ni,wa kupana wovon adama a kacaꞋa ke le ba,ko ka̱ɗu ka̱ ni ka̱ muɗa̱ adama a kacaꞋa ke le,nannai ɗa Vuzavaguɗu MalaꞋimili u kucipa̱ka̱ta̱ u shilika̱ a kusan ku Sihiyona n kaginda ka̱ ni.⁵Tsu na nnu n tsu imkpa gaɗi,nannai ɗa Vuzavaguɗu MalaꞋimili u kisa Urishelima,wi ta̱ a̱ kula̱na̱ i ɗa ka̱ta̱ wi isa i ɗa̱,wi ta̱ a kukpada kawuya ka na ka̱ kuta̱wa̱ punu.>>

⁶Aza a Isaraila, bonoi, adama a na i ka̱sukpa̱ ta̱ uye u Vuzavaguɗu ra̱ka̱-ra̱ka̱.⁷Adama a na a kanna ka nanlo ka yaba dem, wi ta̱ a kuvaruku a̱ma̱li a azurufa n azanariya, a na ekiye a̱ unushi a̱ ɗa̱ a yaꞋin.⁸<<Ka̱ta̱ aza Asiriya a̱ kuwa̱ n ukpa̱ u kotokobi,ka na ekiye a vuma a yaꞋin ba, ka ɗa ka kuna le.Ka̱ta̱ a suma adama ukpa̱ u kotokobi,ka̱ta̱ a zuwa a̱ɗa̱nga̱ni e le a yaꞋan ulinga u tsugbashi.⁹Ubuta̱ wu utsura u le wi ta̱ a̱ kuyikpa̱ adama a aza a gbani-gbani,aza e kelime o kuvon a̱ ni i ta̱ a kusuma a ayin a na baci e enei urotu u kakashi u kuvon u ɗa̱,>>Vuzavaguɗu u danai nannai,a̱yi na akina a̱ ni ta ɗe i a Sihiyona,ɗa kenle ka̱ ni ki a Urushelima.