Read Hosiya 9

Hosiya9

Atakaci aza a Isaraila

¹Ka̱ta̱ i yaꞋan ma̱za̱nga̱ ba, a̱ɗa̱ aza a Isaraila,ka̱ta̱ i yaꞋan ma̱za̱nga̱ tsu uma a na a buwai ba.Adama a na i yaꞋan ta̱ unambi wu usuɓi, ɗa i ka̱sukpa̱i Ka̱shile ka̱ ɗa̱.i tonoi a̱ma̱li, tsu kashakanlai ka na ki o kutono ali.a̱ ubuta̱ wu ulanga u kulapu dem,i dengei ka̱ci ka̱ ɗa̱ a̱ ka̱ma̱li ka Balu,tsu ashakanlai,yi ta̱ a kupana uyoꞋo u katsupu ka na yi e, kusheshe a̱yi ɗa u nekei ɗa̱.²Ubuta̱ wu ulanga u kulapu n ubuta̱ u kupisha ma̱kya̱n wi a ku lyaꞋatangu ba.ma̱kya̱n ma savu mi a ku yawa le ba.³Uma a Isaraila a uɓon u gaɗi a̱ kuda̱sa̱ngu iɗika i Vuzavaguɗu ba,i ta̱ o kubonoko n aza o yoku a masar.aza o yoku kpamu i ta̱ a kubana Asiriya.ra̱ka̱ vi le i ta̱ a kulyaꞋa ilikulya yi unata.⁴I a kufuɗa kuneke Vuzavaguɗu alyuka a̱ ma̱kya̱n ba.wi a kuyaꞋan ma̱za̱nga̱ n kuneꞋe ku le ba.ili i kulyaꞋa i le n alyuka e le i natukpa le ta̱,tsu ili kulyaꞋa ya aza a kpalu.vuza na baci de dem u lyaꞋi i ɗa wi ta̱ o ko okpo n ma̱shinda̱.adama a na ili i kulyaꞋa ya yi ta̱ a kuyaꞋanka le a̱guma̱ a kambulu koci,i a kubanka i ɗa a kpaꞋa ku Vuzavaguɗu ba.⁵Yiɗa̱i tana yi a kuyaꞋansa,a kanna ka na o foɓusoi adama a̱ ka̱ɗiva̱?Kanna ka̱ ka̱ɗiva̱ ka Vuzavaguɗu?⁶Ko i laꞋaka baci n wuma u ɗa̱ a kanna ka nanlo,Aza a Masar i ta̱ o kuɓolongu ɗa̱,i ta̱ a kuciɗa̱ngu ɗa̱ a Memfisu a iɗika i le.Awana i ta̱ a ku isa ili i singai i ɗa̱.awana a i ta̱ a kupala a̱pa̱m e le.⁷Ayin atakaci a̱ ta̱wa̱ ta̱,kanna ka katsupu ka yawa ta̱.ayin a na yi a̱ kuciya̱ katsupu ka ili i na i yaꞋin,Isaraila wi ta̱ e kuyeve.A danai, keneki kalau kaꞋa,i dana ta̱ kpamu vuza na wi n ayinviki kadanshi n a̱yi kajarishi kaꞋa.adama ka̱bunda̱i ka̱ unushi ka̱ ɗa̱, i iwain mu.⁸Keneki, a̱yi ɗa vuza kindi adama a uma Isaraila e kelime ka Ka̱shile ka̱ ni,ama n nanai dem yi a kuzuwaka le maza. a uye u le ra̱ka̱ tsu nnunu.A kpaꞋa ku Vuzavaguɗu feu i ta̱ a tsurala n keneki.⁹A bana ta̱ daꞋangi a̱ ka̱tsuma̱ ku unambi u kamayun,tsu ayin a aza a Gibiya.Vuzavaguɗu wi ta̱ a kuciɓa n kawuya ka̱ ɗa̱.wi ta̱ a ku takacika ɗa̱ adama unushi u ɗa̱.¹⁰<<Vuzavaguɗu u danai, n cina ta̱ aza a Isaraila a kakamba a na umaci u ma̱biri.me ene ta̱ ikaya i ɗa̱ tsu umaci wu ugiti u ma̱biri,ama a na a̱ ta̱wa̱i a Balu-piyo,ɗa erengi ka̱ci ke le u ka̱ma̱li ka Baluɗa okpoi ili yu unata ci ili i na a cigai.¹¹Tsugbayin tsu Ifirayimu ci ta̱ a ku imkpa tsu manunubabu kumatsa, babu kpamu kuyaꞋan ku ka̱tsuma̱, babu kuɗika ku ka̱tsuma̱¹²Ko o woku muku,mi ta̱ a ku una n ɗa babu o gbonguro.ali a kubana a vuza vu ukocishi,ke le ko kotso ta̱ a makyan ma na baci n ka̱sukpa̱i le.¹³Mayun, me ene ta̱ kumaci ku Ifirayimu, tsu nɗanga n dabino a iɗika i singai.ama ɗanna anana,Isaraila a̱ utuka̱ ta̱ n muku n le a kukiɗa.>>¹⁴Neke le, Vuzavaguɗuyiɗa̱i vi e kuneke le?Neke le kamatsatsu ka na ka̱ kutuka̱ n ka̱tsuma̱ ba,koɓolo n mani me ɗekpu.¹⁵<<Adama a ka gbani-gbani ke le a Giliga,Ta ɗe n iwain le.Adama a unushi u na a yaꞋin,Mi ta̱ o kuloko le a kpaꞋa ku va̱.Mpa m buwa a kuciga le kpamu ba,aza a gbagbaꞋin e le ra̱ka̱ aza o kugoyi a ɗa¹⁶A una ta̱ uma a Ifirayimu,aralu e le e ɗekpe ta̱,a kumatsa muku ba.Ko ta na a matsa baci,Mi ta̱ a ku una muku n le n na a cigai.>>¹⁷Ka̱shila̱ ka̱ va̱ ki ta̱ a ku iwan le,adama a na o tono kadanshi ka̱ ni ba,i ta̱ o ko okpo aza a̱ ka̱ka̱ra̱sa̱ a̱ ka̱tsuma̱ a uma aduniyan.