Read Hosiya 7

Hosiya7

Unushi wa aza a Isaraila n ugbamukaci u le

¹A makyan ma na baci n cigai kupotsotongu aza a Isaraila,ka̱ta̱ unushi wa aza a Ifirayimu wu uta̱ e keteshen ka gbani-gbani ka aza a Samariya ka̱ uta̱ e keteshe,adama a na a yaꞋan ta̱ unambi wu usuɓi.ele oboki a ɗa n aza a̱ ma̱ga̱la̱ka̱,²Ama a zuwaka,a na mi a kuciɓa n ka gbani-gbani ke le ba,gogo na ka gbani-gbani ka̱ ka̱ra̱Ꞌa̱ le ta̱,ki ta̱ a̱ a̱shi a̱ va̱.³A kuzuwa mogono ma̱za̱nga̱ n ka gbani-gbani ke le,aza e kelime feu a̱ ma̱za̱nga̱ n unambi wu usuɓi u le.⁴Ra̱ka̱ vu le i ta̱ a mali ma tsugbani,tsu akina a kazatsu,tsu akina a na o kudoku nɗanga ba,a makyan ma na a̱yi biꞋi a kulapa kiya.ali a kubana a makyan ma na kiya ka ku shitai,⁵A kanna ka̱ ka̱ɗiva̱ ka kuzuwa mogono ma savu,a tsu zuwa ta̱ mogono n aza e kelime o soꞋo ma̱ra̱ ali ma maka le,ka̱ta̱ u gbaɓa kaci n aza a kavama.⁶Asuvu a usuɗukpi a na akina a kazatsu,wupa u le u tsu yongo ta̱ a kutasa ali kayin washi.n usana wu uta̱ tsu melentsu ma akina.⁷Ra̱ka̱ vu le asuvu a usuɗukpi tsu akina a kazatsu,a ku una aza o tsugono e le.ngono n le ra̱ka̱ a̱ yikpa̱ ta̱,ko vuza u sa̱la̱ka̱ mu ba.

Aza a Isaraila n uduniyan u na u buwai

⁸Aza a Ifirayimu a gbaɓai kaci n uduniya,okpoi tsu kemeshe ka na a vadalukpai ba.⁹Omoci a̱ ka̱na̱i kulyaꞋa utsura u le, ama a zuka ba,ka̱nji ka̱ri ka̱ uta̱i le, ama e yeve ba,¹⁰A̱ra̱ɗi aza a Isaraila wu uta̱i e keteshe,n nannai dem o bono wa̱ va̱ ba,mpa na mi Vuzavaguɗu Ka̱shile ke le.kpamu a̱ la̱nsa̱ mu ba.¹¹Aza a Ifirayimu i ta̱ tsu moɗoi,gogo lo a̱ ya̱nsa̱ le adama a na i n ugboji ba,anana a̱ la̱nsa̱ uɓa̱nki wa aza a Masar,makpaꞋa a panaka le a̱ ku la̱nsa̱ uɓa̱nki wa aza Asiriya.¹²Makyan ma na baci a kulaza, mi ta̱ a ku taɗuku maza ma̱va̱,mi ta̱ a̱ kucipa̱ka̱ le iɗika tsu na a ci yaꞋanka nnunu n na mi a ciꞋimkpi gaɗi.¹³Ili ya atakaci a kubana we le,adama a na a suma mu ta̱,i ta̱ a̱ kukuwa̱,adama a na a yaꞋanka mu ta̱ ugbamukaci.ko a na wo okpoi n ciga ta̱ kushiba̱ le,ama ɗa a̱ ka̱na̱i kuyaꞋanka mu aꞋuwa.¹⁴A̱ shika̱ ma̱shi me le a kubana wa̱ a̱ va̱ n ka̱ɗu ke te ba,a na i a̱ ma̱shi a iꞋuwa i le,a kiɗasai ikyamba i le tsu aza o kutono a̱ma̱liadama a ufolu ilikulya n ma̱kya̱na yaꞋankai mu ugbamukaci.¹⁵Ko a na wo okpoi mpa ɗa m gbarai le,n zuwai le a tsurukpai,ama n nannai dem ɗa i a kuyaꞋanka mu kawuya.¹⁶A vadalukpakai mu kucina̱, o kutono a̱ma̱li a gbani.i ta̱ tsu utan u na u koɗoi.I ta̱ a ku una aza a̱ gba̱ra̱-gba̱ra̱ e le n kotokobi,adama a kadanshi ka̱ a̱ra̱ɗi ke le.i ta̱ o ko okpo ili i ma̱ka̱n a iɗika i Masar.