Kaiwo Riwangsoai18
1Inontarai mano wiro miaya we firao inontarai siai kaha mani, enetituai mantauni terai,i kontai dapa inontarai siai mano enemitituaitai kariri neo bengfo.2Inontarai mano wiro miaya we aunawi kahafoi mani, wiro miaya we nungkamiei wewu tofong kaha,i mani miaya we inontarai siai etaramioi terai.3Masino nari karirafo mani, inontarai ambori enemirireu wau,tuti masino nari mamaya mani, inontarai ambori eteikanggani wau.4Kaiwo awaine mani toyari rawanang kehabi tuti waya deda,kaiwo ninai werorong tuti dohong andeisei we inontarai mano taraoafoi.5Beng kahai, masino kutu kaiwo mani tau we inontarai kerira foi,tuti ohong aiboi we inontarai mesi foi.6Inontarai mano wiro miaya we aunawi kaha foi bororawafoi mani wedaya mamuna,tuti borongfoi medu funomai mani sera we daiboi.7Inontarai mano wiro miaya we aunawi kahafoi mingganggung na kaiwo medurafo,tuti ne kaiwofo tipabera mantauni.8Airiri funong inontarai mani toyari fiang maing,ampefe inontarai emaya we etongnaifa.9Inontarai mano ureng marira we yufi mani netarai toyarioinontarai mano mei fianggengfo.10Yahwei mani netarai toyari katai mitubaru we adiwanai,na wana inontarai mesifoi mitoa niayai na mai.11Rafoi mani toyari wore bendari mitubarufoi we inontarai mano ne ra bitoyafoi,tuti deitarahio netarai toyari wore kamiei dedai we deitawang weduari.12Inontarai tewafoi ambori mingganggung,wape inontarai mano enerorong tewawafoi ambori fiai.13Inontarai mano yoa na ahera wiro tarao nari kaiwofoa kai kaharai,i mani webonggoi tuti dohong mamaya mantauni.14Nemirorong mirisingnei mani, niari inontarai wemambiriu we sodua ne dadirafo,wape nemirorong fituayanei, mandoni dino wemambiriune?15Inontarai mano nungkamiei wewu tofongfoi mani, miaya we sobu waitawangnai werorongfo pampang,tuti inontarai mano sewaifoi tarangfo sera we fi nanaifa.16Ohong fieai we inontarai mani ambori dohong rang we wau,tuti fio ohongnai nanai ambori kia wau we wobu inontarai baba fosa.17Na kutu madu kutu kaiwofo mani, inontarai mano medu fafongfoi ambori ewaitarahio andino medu antune,masino inontarai manei wiro medu dapa ne kaiwo medurafo kaharai.18Kabi onde we fotou inontarai mano emamuna fosa,tuti kutu kaiwo we mandoni dino niari sarawafo, na inontarai mano ewemambiriu fosa.19Wobu nemu doroi terai mano nari enerorongfoi piraha foi mani, dadira sewa weru wobu bendari ne wore mitubaru,tuti mamunafo kiatate inontarai, toyari ai teba na rahutu uai to bendarifo.20Toyari enemi memosi na fiang,tonanai kontai inontarai ambori sobu bengfo na kaiwo bengno medurafo.21Mureha tuti barangfo mani taperemunei dino sanane,mandoni dino medu biriu mani, ambori sobu dadirafo na kaiwo medurafo.22Masino wobu wiwing dentengfoi mani wobu mahikaifo,tuti i mani moangno Yahwei dohongni we wau.23Inontarai mano ne pari fifoi medu dutang we enemiwawuti,wape inontarai mano ne ra bitoyafoi yoa wei na kaiwo tapapa.24Maniwowiri manei wedaya wobu karirafo,wape maniwowiri siai manei denteng sewa weru nemu doroi terafoi.
The Seed Company