Nunei Reantenangfo4
1Mayeai Adami dena ria ne wiwingno Hawai, tuti Hawai doama, ainanaya minohituti ne kaisung manei. Ampefe medu deyo, “Na Yahwei ne wiwiaingne, isobu kaisung manei.” Ampefe dohongni wonong fino Kaini. 2Mayeai mani minohituti kaisung manei aha, wonong fino Habeli. Habeli nini dehung kambing tuti domba, mae Kaini dohong romi. Habeli dehung kambing tuti domba3Na rahida bei aha mani, Kaini dohong ne korbanifo kuteai na fi yufo we Yahwei.4Habeli kontai dohong korbani na domba ne arikang reantenang dentengfoi, ne maingfo we Yahwei na fi yufo nanai. Ampefe Yahwei detioai tuti eneo Habeli ne korbanifo.5Wape Kaini tuti ne korbanifo Yahwei eneoa kaha. Ainanaya Kaini kesou paria tuti urengfo taterai beyari.6Ampefe Yahwei medu we Kaini deyo, “Kosou we fianie? We fianie uremutaterai nina?7Masino nari ne bengfo mani, uremuwa mararising, wape maya we nari ne bengfo kaha mani, sasarifoi demang kawurua we suai to enemurorongwai. Sasari nani yurai paria we wemambiriu sau wau, wape rurai we wemambirui sau sasarifoi.”8Mayeaia Kaini medu we ne tahatui Habeli deyo, “Roma tura to romifo.” Na kutu urawa sobu romifo nanai, na tantuma Kaini bioi ne tahatui Habeli tuti miungnia mirehara nina.9Yahweh Allai medu we Kaini deyo, “Kaine! Nemu tahatui Habeli andi donie?” Kaini yoa deyo, “Iserawawerahi. Yauno iwaitawang wedua nehu tahatui fine ne?”10Ainanaya Yahwei medu aha deyo, “We fianie nariri tonanai? Nemu tahatuifoi ne rikafoi bibe sahu we Yau na kahofa nuwowongfo, toyari rawafuifoi sahu we Yohong aiboifo tawera we wau aha.11Ampefe ninaia mani, Yeikanggani wau, kahofane wiro dohong fiang we wau kaha, weo kahofa nani songno nemu tahatui ne rikafoi ampa na rahida bo mungnifoi.12Masino rurai we bohong romiki, wape kahofa nanai wiro dohong nemu fitantanangwa wetarai kaha. Wau ambori ro towana tonina, na katai bei to katai bei aha na nunei.”13Ainanaya Kaini medu we Yahweh Allai deyo, “Aiboi isobuai ninai maraba paria, nehu mambiriu feai we isoduata kaha.14Bento Bata yau weru kahofa nina fefe, inayai wairoi weru Wau. Yau wiro nehu katai feai na nunei ahang kaha, ira towana tonina. Tuti mandoni sobu yau mani, ambori miung yauki.”15Wape Yahwei medu deyo, “Bereri! Masino manei miung wau mani, aiboi tawera wei aha mani, mano miung wau nani sobu aiboi maraba we itu kiparai.” Mayeai Yahwei dohongno fiainawiai bei na Kaini ne taraifoi, ambori mandoni kontai sobui mani, wiro miungni kaha.16Ainanaya Kaini da weru Yahweh Allai arongfo, da to kahofa Noti na Edeni do wanang murangfoi tuti niayai nanai.17Kaini rirau, dena ria ne wiwingfoi tuti wiwingfoi doama mani, minohituti ne kaisung manei, wonong fino Henoki. Mayeai Kaini biaungno bendari bei tuti dohong bendari nani wonong fino Henoki, kariri ne kaisungfoi wonongfo.18Henoki dawingno Irati, Irati dawingno Mehuyaeli, Mehuyaeli dawingno Metusaeli, tuti Metusaeli dawingno Lameki.19Lameki dau wiwing mandu amani, manei wonongno Adai tuti manei wonongno Silai.20Adai dawingno Yabali. Yabali nini ne ririafoi dino etahung fiahungne tuti eminohi na yawa tendane.Yawa tenda21Arikangno sua aha mani, wonong fino Yubali. Yubali nini ne ririafoi dino esawai emei kecapi tuti ebui sulingne.Kecapi22Silai kontai dawingno Tubal-Kaini. Tubal-Kaini nini ne ririafoi dino esawai enari fi na tembaga tuti besi fo ne. Tubal-Kaini ne tahatui wiwing manei, wonong fino Naamai.23Rahida bei mani, Lameki medu we ne wiwingfo suru deyo,“Adai tuti Silae, mutarami ma!Nehu wiwingne muruine, mufobibi mutarimiwa mutarami nehu kaiwone!Imungno mang manei mireha, weo dohongno fario yau fefe.Imungno bariboai nania mireha, weo bioi yaua ibabara fefe.24Masino mano miung Kaini sobu aiboi maraba tawera weifo we itu kiparai.Mano miung Lameki mani, sobu aiboi tawera wei maraba paria aha mani piatorua suraya itu kiparai.”25Adami tuti binengno Hawai une kaisung manei aha, tuti Hawai dohongni wonong fino Seti, weo enetituaitai deyo, “Allai dino dohong kaisung manei we yau we yiwangno Habeli, weo Kaini miungno Habelia fefe.”26Seti ne kaisung manei, dohongni wonong fino Enosi. Na rabuang bo Enosi minohi darang nini dino, arahio reantenang we inontarainesa esahu Yahwei wonongne.
The Seed Company