Nunei Reantenangfo3
1Na andowa fubao Yahweh Allai niariri kiaifoi mani, tawainei dino sewai sewa na tetofafo ne. Wiro andowa manei netarai kariri kaha. Tawaifoi medu we wiwingfoi deyo, “Taraie, Allai deyo, Ai fubao doari na romi fenini ne bongfoi wiro murani kahae?”2Ainanaya wiwingfoi yoa we tawaifoi deyo, “Ai fubao doari na romi fenini, ne bongfoi mani aurani.3Wape ai bo doa na romi rabuangtahifoi mani, Allai medu deyo, wiro aurani ete auruti fanai, weo nana mani aumereha rai.”4Manamo tawaifoi yoa we wiwingfoi deyo, “Nanai tarai kaha, wiro mumarareha kaharai,5Yahweh Allai medu tonanafo, weo deitawanai na rahida murang aibongfoi mani, muuremiwa tabau tuti munetarai kariri Allai, muwaitawang ne bengfo tuti ne karirafo.”6Wiwingfoi detioai we aibongfoi mehikai tuti miaing paria we angni, tuti aibongfoi kia enerorongfoi we dohong awai wei. Ampefe deting aibongfoi tuti dangnia, tuti dohongni we ne mangfoi mano unayai ruhiaifoi tuti ne mangfoi dangni kontai.7Na tatofang kutu nanai, uremifo tabau tuti uwaitawanai we unayai arora. Ampefe uka ai urung reraungfoa uranung tuti urawarai we kawui ambori wedua une taraifo nayai.8Ramindena nani, utarami Yahweh Allai da nubuayai na romi rorongfo, ampefe inontaraifo suru uradiwa na aio doari na nanafo, ambori wiro Yahwei Allai deti suru fanai.9Wape Yahweh Allai sahu mangfoi deyo, “Wau doni?”10Mangfoi yoa Wei deyo, “Tarahu Wau ro na romi rorongfe ninafo, imatai fefe yediwa, weo inayai arora fefe.”11Yahweh Allai medu wei deyo, “Mandoni dino deisaharai we wau we nayai arorane? Bangno aibong yeiweduari we bangni kahafoi ampane?”12Mangfoi yoa we Yahweh Allai deyo, “Wiwingno bohongni ma we fiata yau nini, andino dohong aibongfoi we yau ampefe yangnia nina.”13Mayeai Yahweh Allai medu we wiwingfoi deyo, “We fianie nari fi toninane?” Ainanaya wiwingfoi yoa we Yahweh Allai aha deyo, “Tawaifoi dino tetofa yau mani donio yang aibongfoi nina.”14Ainanaya Yahweh Allai medu we tawaifoi deyo, “Nari sarawai ampa, ampefe Yeikanggani wau, na andowa teriranei tuti ne ahuminei, meiri wauno wodai aiboi nini. Na ninai to fongna mani, fafa na aromune terai, kahofafoi we fiang we wau na barangne.15Wau tuti wiwingfoi ambori muenemirireu wawera muru, ne ririafoi tuti nemu ririanei ambori eweaiteta wawerasa pampang. Ne ririafoi ambori etaha kanggung numukamieiwai tuti nemu ririanei ambori ehiri wiwingnei ne ririafoi eawemididifuifo.”16Ainanaya Medu we wiwingfoi aha deyo, “Yau ambori inari wau wobu dadira paria na rahida boamafo tuti wau purahai paria na rahida munohituti nemu arikangwai fo. Tonanai ki, wape enemurorongwai dohongwe nemu mangwai aha, wape nemu mangwai wemambiriu sau wau rai.”17Ainanaya Medu we mangfoi aha deyo, “Wau mani taramuo nemu wiwingwai tuti bangno aibong Yeiweduari we bangni kaha foi. Ampefe na nari sarawai ninai, wedaya Yeikanggani kahofane. Na munohi barangne rurai we rufi na mamboni paria na kahofane ambori wobu fiangki.18Kahofane ambori tifu ninoi weababofo we wau, tuti fi tifu funomafo ambori we fiang we wau.19Na munohi barangne rurai we rufi na mamboni paria wumaya ambori kahofane tifu fiang we wau ki. Ne tonanafo wodairai paria barabera wau we kahofa aha. Weo na kahofa nani dino Inari wau naine. Wau mani kahofa di wau ampefe barabera wau we kahofa aha.”20Mangfoi dohong wiwingfoi wonong fino Hawai, weo andino we ai we inontarai fubao saubaunung na nuneine.21Yahweh Allai niari ansungfeai na andowa rerawafo we Adami tuti ne wiwingfoi tuti Allai sensung urunayai.22Ainanaya Yahweh Allai medu aha deyo, “Ninaia mani, mangnei netarai kariri Totoru ampa, tuti deitawang kariri ne bengfo tuti ne karirafo ampa. Ampefe dohongnao kia nari aibongno dohong arang we fitawafafoi ahama we dangnife.”23Ampefe Yahweh Allai datari weru romi Edeni, ambori yurai we yufi na kahofao Allai niari nai ma foi.24Tuti na romi Edeni do wanang murangfoi, Allai dohongno kerupifo we deitawang rahutu borongfoi, tuti sondu denggararu bei, dariwari aifoi we deitawang wedua aifoi. Ampefe na tonanafo, inontarai mandoni kontaio da kefang aifoi afui kaha.
The Seed Company