Nunei Reantenangfo38
1Na rabuang bo nani Yehudai da weru ne doroifosa to bendari Adulami tuti minohi ria inontarai manei wonong fino Hirai.2Na nanai Yehudai deti wiwing Kanani manei, Syuai ne kamitung dine. Ainanaya Yehudai kiari we ne wiwing tuti dena riati.3Wiwingfoi doama tuti minohituti kaisung manei, Yehudai dohongni wonong fino Eri.4Mayeai wiwingfoi doama tuti minohituti kaisung manei aha, wiwingfoi dohongni wonong fino Onani.5Mayeai aha mani wiwingfoi minohituti kaisung manei aha, tuti dohongni wonong fino Syelai. Na kutu Syelai saubaunungfo mani Yehudai niayai na Kesipi.6Mayeaia mani Yehudai kia wiwing manei we ne kaisung fubao Eri, wiwingfoi wonong fino Tamari.7Wape Eri, Yehudai ne kaisung fubafoi ne koang kerira paria na Yahwei urengfo, ampefe Yahwei dohong aiboi wei awao mireha.8Ainanaya Yehudai medu we Eri ne tahatui Onani deyo, “Ka nemu tafuai ne wiwingfoi tuti rauti weriwang nemu tafuai, kariri tane koangnei, ambori bohong riria we nemu tafuai aha.”9Wape Onani deitawanai weo arikang fosa mani wiro nesa kaha. Ampefe dena ria Tamari mani, sua ne ka fo tabata to boriei, ambori na tonanafo wiro dohong riria we ne tafuai kaha.10Wape fianai aino niari fo mani, karira na Yahwei urengreafo, ampefe Yahwei dohong aiboi weia mereha kontai.11Donio Yehudai enetituatai we dohongnao ne kaisungno Syelai mireha toyari ne tafuai suru fe. Ampefe Yehudai medu we urawingno Tamari deyo, “Roa nayai na tamamu ne munufoi we wiwingna paria Syelai fiabai akawuru wori rauti ki.” Ampefe Tamari da wa niayai na tamang ne munufoia.12Wefuina beiru teai aha mani, Syuai ne kamitungfoi, mano Yehudai ne wiwingnei mirehara. Yehudai minohi koya weia kai nanai, kia ne maniwowirio Hirai inontarai Adulami foi ura to Timnai, kataio inontarai ehutu ene domba ene nuawurufo nayai.13Na kutu Tamari sobu kaiwo we nyongno Yehudai da to Timnai we kiutu ne domba fosa ene nuawurufo nanai,14ampefe disu ne ansung wiwingna fo, sata ansung siai tuti tebung wedua urengfo. Mayeai da wa minohi na bendari Enaimi ne rahutu borongno ra to Timnaifo. Tamari deitawanai weo Yehudai antungno Syelai fiabai ampa, wape Yehudai wiro dohongni we ne mang kaha.15Na kutu Yehudai detioi nanai, deitarahio wiwing diru dine, weo tebung wedua urengfo fefe.16Ainanaya Yehudai da wa dutangni deyo, “Ro ma yena ria wau.” Medu tonanai weo deitawana kaha, weo wiwingnei mani urawingfoi dine. Tamari medu wei deyo, “Bena ria yau mani bai beiru?”17Yehudai medu wei deyo, “Yohongno kambing antung manei we wau ki.” Tamari yoa wei deyo, “Yo, wape bohong fiani we fiainawiai ma irutawangnai, paria bonatu kambingfoi we yau ma?”18Yehudai dutangni aha deyo, “Fiainawiai fianai aino yohongna ne?” Tamari yoa wei deyo, “Bohongno nemu cincino wonomu nayai naio weraori sawai na ramukanangwai tuti nemu aitatohio wonomu nayai nai wai.” Ainanaya Yehudai dohongno finanai we Tamaria, mayeai dena riatia, donio wiwingfoi doama.19Tamari daraberahi to tamang ne munufoi aha tuti sata ne ansung wiwingna fo aha.20Mayeaia mani, Yehudai demi ne maniwowirio Hirai inontarai Adulami foi, kia kambingfoi da wa we biai wiwingfoi, ambori kia fio dohongnai watai we fiainawiafo. Wape Hirai da ma mani wiro sobu wiwing diru foi kaha.21Hirai dutang inontarai na nanafosa deyo, “Wiwing diruo minohi na rang deraung Enaimi fi andi donie?” Eroa wei eteyo, “Wiro wiwing diru manei na nina kaha.”22Ainanaya Hirai daraberahi we Yehudai aha tuti medu wei deyo, “Wiro isobu wiwingfoi kaha, tuti inontarai fosa na katai nani eteyo, wiro wiwing diru manei na wana kaha.”23Ampefe Yehudai medu deyo, “Bento fianggengfo kia weia, ambori wiro tasobu mamaya fanai. Irurai we ibaiti na kambingnei, wape wiro wobu wiwingfoi kaha.”24Tarahio we embai botoru teai aha mani, Yehudai taraoai we urawingno Tamari doama, weo niariri we wiwing diru fefe. Ainanaya Yehudai medu deyo, “Meha wiwingwai ma ambori ohongni adia kasoia mireha.”25Na kutu eha Tamari to boriei we emungnifo mani, dohong kaiwo anatu we nyongno Yehudai deyo, “Mang mano ne fianggeng ninai andino dena ria yau mani donio iwearikang ninaifa. Ampefe mewati kariri mandoni dino neo cincino wonong nayai naio weraori na rahanangfo tuti aitatohi wonong nayai nai nei.”26Yehudai deroang ne fianggengfo tuti deyo, “Wiwingfoi wiro dohong sarawa kaha. Wape yauno wiro yohong Syelai we ne mang kariri tane koangnei kaha.” Ampefe Yehudai wiro dena ria Tamari ahang kaha.27Na kutu wiwingfoi niruainso amaina pirahai nanai, arahio eteitawangnai weo arikang tantamurui mandu na enemanabufoi.28Tuti na kutu de minohituti arikangfo suru mani, arikangfo manei dohong warang bei dariai ariei. Ampefe bidanfoi tebuhiri na banang kirmisi barika feai na warangfo, tuti medu deyo, “Arikangno saubaunung fafong dinini.”29Wape arikangfoi fiorung warangfoi to rorong nariai aha, tuti arikang mano weifoi dino saubaunung fafong ne. Bidanfoi medu we arikangfoi deyo, “Wemambiriu paria, donio kowariai fafong nina.” Ampefe Yehudai dohong kaisungfoi wonong fino Peresi. 30Mayeaia mani arahio kaisung mano warangfo tabuhirai na banang kirmisi barikafo dariai ki, tuti kaisung nani wonong fino Serahi.
The Seed Company