Nunei Reantenangfo14
1Na kutu Abrami niayai na Mamre mani, mananu mana eweboyari we emamuna amani, Amrafeli mananu Sineari foi, Ariokhi mananu Elasari foi, Kedorlaomeri mananu Elami foi tuti Tideali mananu Goyimi foi.2Mananu ewemana ninisa emamuna we mananu ewering amani, Berai mananu Sodomi foi, Birsyai mananu Gomora foi, Syinabi mananu Admai foi, Syemeberi mananu Seboimi foi, tuti mananu na nu Belai foi, nu nini ahui kontai we Soari.3Mananu ewe ring ninisa eweboyari, era to enangno Sidimi. Enang nini dino fui ninai ahui we Rawanang Mireha ne.4Wiro eweboyari we emamuna kaharai, weo mananu Kedorlaomeri weparenta sau ea wairoi fuina suraya boru (12). Wape na fuina bo suraya botoru (13) foi, wiro emaya we etohong kariri Kedorlaomeri ne parentafo kaha.5Na fuina bo suraya boa (14) foi, Kedorlaomeri tuti mananu mantoru itoweboyari riatifo, era wa emamuna. Emamuna awao etahatawang inontarai Refaimi fosa na Asyterot-Karnaimi, inontarai Susimi fosa na Hami, inontarai Emimi fosa na Syawe-Kiryataimi6tuti inontarai Hori fosa na ene katai weuaifo, amani wonong fino Seiri. Etawi inontarai Hori fosa pari to El-Parani kefang we katai wiarora wekamamieifoi.7Mayeai Kedorlaomeri tuti ne mananu eweboyari riatifosa era wariai, era wa sobu En-Mispati amani nu Kadesi foi, tuti na nanai emamunara etahatawang inontarai Amaleki fosa, tuti inontarai Amorio enayai na Haseson-Tamari fosa.8Ainanaya mananu na nu Sodomi foi, Gomora foi, Admai foi, Seboimi foi tuti mananu na nu Belai foi, amani ahui we nu Soari, emainenang ene afai mamunafosa tuti erawa emamuna na enang Sidimi.9Emamuna we Kedorlaomeri mananu Elami foi, Tideali mananu Goyimi foi, Amrafeli mananu Sineari foi tuti Ariokhi mananu Elasari foi. Ampefe mananu mana emamuna we mananu ring.10Na enang Sidimi nani, na doni kontai obu kamirei aspalifo . Na kutu mananu Sodomi tuti mananu Gomora foi tuti une afai mamuna fosa ewawu ene tarai nanai, afai mamunafo manea etaukaha kamirei nanai. Tuti manea siai ewawu ene tarai to weuaifo.11Fi kiai na Sodomi tuti Gomora foi amani ene ra tuti fiangfo, Kederlaomeri tuti ne mananu mano eweboyari riati fosa etawarai kai, ainanaya erawa.12Kontai eha Loti, Abrami ne tahatuifoi ne kaisungfoi, tuti ne fianggeng fuba minohi tutirifoi ehari erawa. Weo Loti minohi na Sodomi fefe.13Mayeai inontarai wewu ne tarai manei da wa deisaharai we Abrami inontarai Iberani foi, kariri fi fuba kiawariai nani. Rabuang bonani Abrami niayai kefang we ai Tarbantinifo na Mamrei. Kahofa ninai inontarai Amori mano wonong Mamrei ne kahofa fine. Mamrei, Eskoli tuti Aneri itowe mambetahatui, itoru mani Abrami ne maniwowirio, itoweboyari riati.14Na kutu Abrami taraoai we ne kaisungfoi etafuri tonanafo, fianduhi ne inontaraio esawai we emamunafosa, amani mano etaubau enumi na ne munu rorongfo. Efaufo ewe piaring we betoru suraya indeatoru (318). Ainanaya etawi ene aitetafosa, amani mananu manafo paria sobu Dani.15Dirua mani, Abrami deto ne inontarai fosa we rabuang beiru teai, ambori erawa emamuna we ene aitetafosa, tuti etahatawangsa. Inontarai mano ewawu enetaraifosa, Abrami tuti ne inontaraifosa etawisa pari to Hoba na Damsyiki do wanang ba foi.16Abrami tuti ne inontaraifosa, eha fianggengno ene aitetafosa etawarai nanai aha ma. Tuti eha Loti, Abrami ne kaisungfoi tuti ne fianggengfo eha nariai aha ma. Kontai eha wiwing tuti inontarai siaio etafusa fosa.17Na kutu Abrami daraberahi na mamuna rorongno sahatawang Kedorlaomeri tuti mananu eweboyari riatifosa tonanai ma fo, mananu Sodomi da wa demang wei na enang Syawei, amani enang esahui kontai we Enang Mananufoi.18Mananu siai manei amani, Melkisedeki mananu Salemi foi, kia roti feai tuti angguri we Abrami. I mani Allai Mano Dedai Sewafoi ne imami dine kontai.19Ainanaya mioang Abrami deyo, “Kadono Allai Mano Dedai Sewanei, Mano Niari rorafaisi tuti nunei Mioang wau,20tuti fayai feai we Allai Mano Dedai Sewanei, Andino sawing nemu aitetanesa to waramurorongfe ne.” Ainanaya Abrami dohong sepersepuluh na fi kiafo kai we Melkisedekia.21Mayeai mananu Sodomi foi medu we Abrami deyo, “Bohongno nehu inontaraiwasa ma, wape fianggeng ka werusa ma fo, ka we waua.”22Manamo Abrami medu we mananu Sodomi foi deyo, “Ifafora na Yahwei, amani Allai Mano Dedai Sewa foi, mano Niari rorafaisi tuti nunei,23weo wiro ika sobu fi kuteai na nemu ra etawaraio ika nariai aha ma nina kaha. Masino banang rea kuteai ete wai sandali rea kuteai kontai ki, wiro imaya we ika kaha. Ambori wiro boyo, ‘Yau yohongna mani Abrami ne ra bitoya wanai.’ Wai sandali24We yau mani todoni kontaio nana fanai! Manta tarahio fianai aino nehu inontarainesa etangna fo nanai aino we nehu ne. Wape nehu maniwowirio ameweboyari nesa amani, Aneri, Eskoli tuti Mamrei, ansaino bohong enengwa.”
The Seed Company