Nunei Reantenangfo13
1Ampefe Abrami da weru Mesiri to kahofa Negepi aha, i tuti ne wiwingfoi, ne inontaraifosa tuti ne fianggengfoi kiai. Loti da riati kontai.2Abrami ne ra bitoya paria, ne fiahung bitoya, peraki tuti emasi bitoya kontai.3Da na katai bei to katai bei aha, na kahofa Negepi paria kefang we Beteli aha. Katai fafong nanai biaung ne yawa tenda reantenangfoi nai, wiatai rahang Beteli tuti Ai.4I fafong nanai biaung mesbafoi kontai nai. Na katai nani dino fafong nanai Abrami somi we Yahwei ne.5Loti da ria Abrami. I kontai ne fiahung domba, sapi tuti ne inontarai mano enayai riati fosa.6Manamo kahofa nanai wiro fiabai demoyarai we uminohi ruhiai nai kaha, weo une fianggeng bitoya paria. Donio wiro umaya we unayai ruhia kaha.7Ampefe Abrami ne mantahung fiahungfosa tuti Loti ne fosa, emamuna wawerasa. Rabuang bonani mani inontarai Kanani fosa tuti inontarai Ferisi fosa, enayai kontai na katai nani.8Ampefe Abrami medu we Loti deyo, “Dohonao tune mantahungnesa emamuna wawerasa fe, weo turu mani rika fifau paria.9Boti katai ninai fuba we wau kahae? Ne mahikai mani tukatate turu. Masino ro to dowei mani, ira to domoya, ete ro to domoya mani, ira to dowei.”10Ainanaya Loti fioai ureng deti wari kataifoi sentenang, tuti deti enangno Yardeni we ne mereha bitoya paria sobu Soari. Netarai toyari Yahwei ne romifoi, ete toyari kahofa na Mesiri, Na kutu Yahwei wiro meikanggani Sodomi tuti Gomorai kaharai.11Ampefe Loti diri enangno Yardeni sentenang wei, ainanaya deunaung weru Beteli to do wanang murangfoi. Na tonanafo Abrami tuti Loti ukatate surua.12Abrami niayaia pepayai na kahofa Kanani foi, mae Loti niayai na bendario watai na enang Yordani foi, tuti biaung ne yawa tendafoi kefang we bendari Sodomi.13Wape inontarai Sodomi fosa enari karirafo paria tuti enari sasari we Yahwei.14Loti da weru Abrami kawurua nanafo, Yahwei medu we Abrami deyo, “Foai uremu boti wariaia, boti na katai boari nai nani, boti to do wanang murang tuti do wanang pui, to wanang ba tuti to wanang sai.15Katai fuba botioi nani ambori Yohongni sentenang we wau tuti nemu ririawai we fitawafa.16Tuti ambori Inari nemu ririawai bitoya toyari ninuaing. Ampefe masino manei wemambiriu we deto ninuaingfoi mani, wemambiriu kontai we deto afongso nemu ririafoi.17Ro wari kahofa nini, weo kahofa nini ambori Yohongni we wau ne.”18Mayeaia mani, Abrami sota ne yawa tendafoi, da wa biaungni aha, na katai kefang we ai Tarbantinifo na Mamre, kefang we Hebroni. Ainanaya biaungno mesba bei we Yahwei na nanai.
The Seed Company